Da Bible iz one book dass one of a kine. No moa any odda book dat wen affeck so much peopo an fo so long time. But same time, no odda book wuz picked on an attacked by so much guys.

Some of da guys who wen study da Bible plenny, dey tell dat da Bibles we get today, no can trus um. One guy who study religion wen tell: ‘We no can be shua da Bible we get today iz same same az da original. Da ones we get today get choke mistakes an way diffren den da original.’

Some guys question da Bible to see if da Bible iz legit. Dass cuz wat da religions wen tell dem. Like one guy Faizal, his ohana no wuz Christians an wen tell him: ‘Da Bible iz one good book but peopo wen change um.’ He wen tell: ‘Cuz of dat erytime somebody wanted fo talk to me about da Bible, I neva trus dem cuz dey neva have da original. Peopo wen change um.’

You tink matta o wat if peopo wen change um? Try tink about dis: You tink you would trus all da good stuff da Bible promise about da future if you don’t even know if da ting wuz dea in da firs place? (Fo Da Rome Peopo 15:4) You would use da Bible fo help you out wit hana, yoa ohana, yoa worship, all if you thought peopo wen make plenny mistakes in um?

Even tho we no moa da original Bible, get tousan ol kine copies we can spock out. How all dose ol copies make um to today even tho guys wuz goin agains dem an tryin fo change um up? Cuz da Bible wen make um thru all dat, how dat goin help us trus dat da Bible we get today iz legit? We go try check out da ansas to dat.

Da Danger: Bible writas an da guys who wen copy da Bible wen put um down on stuff made from plants called papyrus o on stuff made from animal skins. Dey call um parchment. (2 Fo Timoty 4:13) But how writing um down on dose two tings made um hard fo las?

Papyrus iz easy fo fall apart an come faded. Two guys who wen study Egypt, Richard Parkinson an Stephen Quirke, wen tell dat da sheets from da papyrus can fall apart an jus turn to dust. An den if you try stash um an bury um, da small animals, like da rats an da bugs like da white ants, goin grind um. Some of da paypas afta dey wen find um, cuz had light on top o moisture in da air, wen cause um fo rot an fall apart too.

Parchment iz moa strong den papyrus but same ting if get supa cold weather, hot weather, moisture in da air o light on top um, all dat can cause um fo come supa buss.a Da bugs even like grind da parchment. Cuz of dat da book Everyday Writing in the Graeco-Roman East, wen tell: ‘Dass how come hardly any copies make um to today.’ If da Bible wen break down an neva las, would neva know wat say inside um.

HOW DA BIBLE WEN MAKE UM: Had one law dat ery king had fo copy da firs five books of da Bible. (Da Rules Secon Time 17:18) An den da guys who wen copy da Bible real good, dey would make choke copies. By Jesus time, had copies all ova Israel an far away. (Luke 4:16, 17; Jesus Guys Wat Dey Wen Do 17:11) So how da ol copies wen las to oua time den?

Dey wen find ol kine copies in clay jars. One guy who study da New Testament, Philip W. Comfort, wen tell dat da Jews an da Christians, dey wen put da copies inside da jars fo make um las.

CUZ OF DAT: Tousans of ol kine copies wen las til today. Some ova two tousan years ol. No odda ol writing had so much copies dat wen make um til now.

DA DANGER: Plenny govament guys an church leadas wen do all kine stuff dat da Bible wen tell wuz no good. An cuz dey neva like peopo find out, dey wen try stop peopo from gettin da Bible, from makin some moa, an even translatin um. We go try check out two exampos of dis.

• Moa den 150 years befo Christ: Seleucid King Antiochus Epiphanes, wen try force da Jews fo join da Greek religion. An cuz dat, he wen tell fo all da Hebrew Scripchas, fo destroy um. One guy who study history, Heinrich Graetz, wen tell dat da king’s guys wen tear up an burn wateva dey wen find of da Scripchas, an whoeva wen try read um an study um, dey wen kill um.

• 800 years ago: Catholic church leadas wuz all huhu wit da regula membas of da church cuz dey wuz teachin wat da Bible tell instead of wat da Catholic church wen teach. An anybody dat had one part of da Bible except Songs in da Latin language, dey wen view um az dey wuz traitors. Da church leadas wen tell dea guys fo go all out fo find parts of da Bible in guys’ hales, an if dey wen find one part of da Bible ova dea, dey wuz supposed to go destroy da hale.

If da plans had work, no would get da Bible’s message today.

HOW DA BIBLE WEN MAKE UM: King Antiochus had go all out fo get rid of da Scripchas inside Israel. But moa den half da Jews wuz awready livin outside Israel. Dey wen keep copies of da Scripchas, da same Scripchas da Christian guys wen use layta on.—Jesus Guys Wat Dey Wen Do 15:21.

About 800 years ago, da time dey wen call da Middle Ages, da guys who wen love da Bible neva stop translatin an copyin da Bible even tho da govament guys an church leadas wuz makin um supa hard fo dem. Even befo had such ting az printin, moa den 500 years ago, awready had da Bible translated an copied in at least 33 languages. An all dat, dey wen do um by hand. Afta all dat, dey wen translate an make da bible moa fas den eva.

CUZ OF DAT: Even tho church leadas an powaful govament guys wen try wipe out da Bible, dey no could do um. Today you can read da Bible anywea in da world. An iz da mos translated book eva. No odda book wen affeck so much peopo an places az da Bible.

DA DANGER: Had guys who had go agains da Bible, an da stuff written on um wuz easy fo fall apart. But still yet, da Bible had make um. But some guys who had copy um an translate um would try change up da message. Instead of teachin da trut from da Bible, dey wen try change um fo match up wit wat dey wen believe. We go try talk about some of da stuff dey had change.

• Wea fo worship: Long time ago, da Samaritans wanted fo build one temple on one place called Mount Gerizim. So wen dey wen write wat iz called Da Samaritan Pentateuch, dey wen change up some words from Outa Egypt 20:17 fo back up dat plan.

• Teachin of da Trinity: Less den 300 years afta da Bible wuz pau, one guy who believe in da trinity wen add stuff to 1 From John 5:7 an he wen add dese words: “In heaven, the Father, the Word and the Holy Ghost: and these three are one.” Da original scripchas neva say dat. One guy who study da Bible plenny, Bruce Metzger, wen tell dat about da year 500 dese words wuz in plenny of da Latin Bibles.

• God’s name: Plenny Bible translators wen hemo God’s name from da Bible cuz dey wen follow da Jew guys who wen believe it was kapu fo use God’s name. Dey wen swap out God’s name wit titles like “God” o “Lord”. But dose titles can use um fo any kine stuff. Can use um fo God, random kine guys, false kine worship, even fo da Devil.—John 10:34, 35; 1 Fo Da Corint Peopo 8:5, 6; 2 Fo Da Corint Peopo 4:4.a

HOW DA BIBLE WEN MAKE UM: Firs, even tho had guys dat had copy da Bible an dey neva kea dey neva wen do one good job, o dea wuz sneaky buggas who wen change um up, had odda guys who had copy um real good, spot on. Some of dese guys wuz da Masoretes. Dey would copy da Hebrew Scripchas an dey wen make wat iz called da Masoretic text. Fo make shua da ting was perfeck an spot on, some peopo wen say dat dey wen count ery word an ery letta fo make shua dey neva make mistake. If dey thought had one mistake in da stuff dey was copyin from, dey would write um down on da side fo make one note. Dey would neva mess wit da Bible. One guy who teach at da college, Moshe Goshen-Gottstein, wen say: ‘Fo dem mess wit da Bible on purpose, wuz da worses crime eva.’

Secon, cuz get so much copies of da Bible today, fo da guys who study da Bible real good, easy fo spot da mistakes. One exampo, one church leada wuz taught fo long time dat da Latin translation wuz da real deal. But at 1 From John 5:7 dey wen add in bogus kine words, da ones we talked about earlier. Dat mistake wen even come inside da English King James Version, da one plenny peopo trus. But wen dey started fo find odda kine copies, wat all dat wen show? Bruce Metzger wen tell dat dose bogus words at 1 From John 5:7 neva had um in da ol kine versions of da Bible in diffren languages. Ony had um in da Latin one. Cuz of dat, da newer versions of da King James Version an odda Bibles, dey wen fix um an hemo dose bogus kine words.

Olda copies of da Bible dey had find had show dat wat stay in da Bible neva change. In 1947, dey had find some supa ol scrolls by da Dead Sea an dey wen go match um up wit wat da Masoretes had copy ova tousan years layta. So wat dey wen find? One guy who know plenny about all dis stuff wen tell dat wen dey wen match up da two, wuz same an wat da Masoretes had do, dey wen do one real good job. An dass why can trus wat stay in da Bible.

One library inside Ireland get supa ol parts of da Bible, some so ol wuz from ony 100 years afta da Bible wuz pau. One dictionary wen tell dat even tho dey had copy da Bible plenny times, ony had manini kine changes dat neva affeck da meanin.

CUZ OF DAT: Wen you match up all da ol copies of da Bible, wen show da message of da Bible neva wen change. Like wen come to da Greek Scripchas, one guy who know plenny about um wen tell: ‘Da Bible wuz copied so much times, way moa den any odda book. An we know garanz dat wat tell still stay da same.’ Wen come to da Hebrew Scripchas, one guy who know plenny about um wen tell: ‘Da copies we get iz spot on.’

Cuz da Bible wen make um, you can get one copy an read um. If you pick one good translation, you goin know fo shua dat iz one copy of da original an you can trus um.a How come da Bible wen make um even tho da ting wuz easy fo fall apart, guys wen go agains um, an peopo wen try mess wit wat stay inside? Wat make um so spesho?

Plenny guys who study da Bible had figga da same ting az Paul had in wat he had tell at 2 Fo Timoty 3:16: “Eryting inside da Bible stay dea cuz God breave um inside da guys dat wen talk fo him befo time.” Dey believe dat da Bible wen make um cuz dass God’s words an he wen proteck um till today. Da guy we wen talk about earlier Faizal, he wanted fo find out fo himself if could trus da Bible. Wat he wen find out wen blow his mind. Plenny of da stuff da churches wuz teachin no wuz even in da Bible. An wen he wen find out wat da Bible tell about God’s plan fo da eart, wen touch his heart.

He wen tell: ‘Garanz da Bible iz one gift from God an if God get da mana fo make eryting out dea den ony duck soup for him give us dis book an make um las fo us today. Fo say he no can do dat, dass jalike sayin he no moa nuff powa, an who me fo say dat about da One who get all da mana?’​—Isaiah 40:8.