Hope​—Really Matta O Wat?

Daniel was ony ten years ol an was fighting cancer awready fo one year. Da guys close to him an da doctors wen give up awready, dey said neva have hope. Daniel neva give up hope. He wen believe he would grow up an find da cure fo cancer. Had one doctor who wen specialize in his kine cancer. Daniel no could wait fo him fo come an see him. Wen da doctor was suppose to come he had fo cancel cuz da weather was bad. Fo da firs time Daniel felt like kill fight, he wen give up, he neva have powa. An den few days layta he wen mahke.

One health kea worka who wen study how wen you get hope an wen you no moa hope, affeck yoa health​—she wen go tell Daniel’s story. Maybe you heard one story lidat. Like one makule person who hang on to life litto bit longa cuz dey looking forward to someting​—maybe one anniversary or somebody in da ohana goin come visit dem. But wen Iz all pau dey mahke. How come lidat? Hope dat powaful?

Moa an moa researcher guys tell dat one positive view an hope have one powaful effeck on yoa life an health. But not erybody feel lidat. Odda researcher guys say ah das all stories, science no back dat up. Dey tink hope no affeck da physical problems we get.

Fo long time peopo feel like hope not importan. Tousans of years ago da smart Greek guy Aristotle wen say “hope was jus like one dream.” Moa recent Benjamin Franklin wen say “jus cuz you get hope no mean goin happen.”

So wats da trut bout hope den? Iz jus one nice way fo tink fo make you feel betta or iz it moa den dat? Iz it legit? Iz it someting dat we need fo be happy an healthy an goin foreal kine help us?

How Come Need Hope?

Da young boy Daniel, da one we wen talk about earlier, if he neva lose hope you tink he would of beat da cancer? You tink he would still be alive today? Even da guys dat full on believe in hope, even dey no would go dat far az fo say dat. So da point iz, you no can say hope goin cure erytin.

CBS News wen intahview one doctor, Dr. Nathan Cherney, an he wen talk about how no good make like hope goin fix erytin fo da guys who stay supa sick. He tell ‘get times wen husbans dey get all nutz wit dea wives an dey scoldin um tellin um eh you guys not tryin hard enuff fo be positive.’ Den he wen tell ‘Iz wrong fo tink you can control yoa sickness jus from good thoughts, cuz den wen peopo not gettin betta das like sayin dass dea fault, an das one bulai.’

Da guys who stay fightin fo stay alive cuz dey supa sick, dey awready goin all out, so da guys dat love dem, dey no like make um moa hard fo dem an make um feel guilty. But den so wat, dat mean hope no can do anytin?

No das not true. Da doctor dat we was talkin about earlier, he help da kine peopo who no goin get betta fo no have pain while dey stay goin thru um. Dose kine doctors dey believe dat tinkin good does help even da guys who not goin get betta.

Hope Can Kokua

One guy who write about medical kine stuff, Dr. W. Gifford-Jones, wen tell ‘hope get da powa fo heal.’ He wen check out diffren kine studies of how iz supa importan fo be dea fo peopo fo give dem emotional kine support befo dey mahke. Dis can kokua peopo fo have hope an tink good kine thoughts. One 1989 study wen show dat da guys who get dis kokua, dey live moa long. But moa recent kine studies say dat we donno fo shua. But studies wen show dat da guys who wen get dis kine emotional support dey wen get less depressed an less pain den da guys who neva have um.

Try tink about one study dat focus on how tinkin good about life o being one downer wen come to life affeck da heart an heart disease. In dat study had 1,300 guys dat dey wen spock out real good fo see if dey view life good o dey view um bad. 10 years layta, outa dose guys 160 of dem had some kine heart disease an mos of dem wuz da guys who wen tink bad about life. Laura Kubzansky, one doctor from one medical school, wen tell ‘dis iz da firs study dat science show fo shua dat tinkin good iz good fo yoa heart.’

Some studies wen show dat da guys who view dea health wuz good wen do moa betta afta surgery den da guys who wen tink dea health wuz bad. Even livin moa long stay connected to tinkin good. One odda study wen show how makule guys wuz affected by dea view of dem gettin ol. Wen makule guys wuz shown stuff dat wen say, wen you get moa old you come moa akamai, dat wen make dem feel moa good an give dem mana. Wuz so good fo dem, wuz like dey wen exercise three months straight!

So how come tinkin good an havin hope stay good fo oua health? Scientists an doctors dey donno da body an da mind good enuff fo know fo shua. Still yet da guys who wen study um plenny can make good guesses from all da stuff dey wen find out. One guy who teach about da brain an da nerves wen tell ‘wen you get hope an wen you happy, dat make you feel good inside. An wen you happy you no moa stress. An wen you no moa stress dass good fo yoa body. Dass jus one moa ting you can do fo stay healthy.’

Da guys who study all dis kine stuff, dis iz all new an blow dea mind, but fo guys who study da Bible dis iz nottin new. 3,000 years ago God had tell akamai King Solomon to tell dis “Wen you feel jalike you like dance an sing inside, Dass good medicine fo yoa body. But wen you stay sad inside, Jalike yoa body all jam up.” (Wat Da Smart Guys Tell 17:22) Make sense ah? Da verse no say dat cuz you happy dat goin cure erytin. But da ting say dat iz like good medicine fo yoa body.

So can say dat if hope wuz one medicine den garanz doctors would give um to erybody. But hope can do way moa den jus make oua health moa betta.

Tinkin Good, Tinkin Bad, An Yoa Life

Research guys wen find dat tinkin good help in plenny ways. Peopo do betta at school, at work, an even in sports. Had one study of one wahine track team. Da coaches wen figga out how athletic each wahine wuz, an den dey wen aks dem ‘how good you tink you guys goin do in one race?’ Da wahines dat wen tink dey wuz goin do good did betta den wat da coaches thought dey wuz goin do. So how come hope affeck us lidat?

Can learn plenny from da guys who negative an no tink good. One experiment ova 50 years ago wen show dat animals an humans can learn fo no have hope. Dey wen do one test on some guys an dey had fo lissen to some irritating noises. An dey told um you can stop um if you press da right buttons. Dey wen do um.

Had one secon group an dey wen tell dem guys da same ting but dey wen set um up dat no matta wat dey wen do wit dose buttons wazzin goin work. Plenny of dose guys in dat secon group wen feel like “ah kill fight dis”. Layta on dey wen test dese guys again an dese guys neva like try do anytin. Dey wen figga “fo nottin”. In dat same group had guys dat wen tink positive, an dey neva give up tryin.

Dr. Martin Seligman, who wen help make some of da tests we wen talk about earlier, he wen make um his job fo study negative kine tinkin an positive kine tinkin. He wen study about why peopo tink dey no can do nottin. He wen figga, dat kine bad tinkin stop peopo from doin plenny stuff in life. Dr Seligman wen say dis, ‘25 years I wen study dis kine stuff dat da guys who tink negative wen bad stuff happen. Dey tink iz dea fault an no matta wat dey do dey tink bad stuff goin keep happenin to dem. Now I know fo shua dat da guys who tink negative, moa bad stuff goin happen to dem den da guys who tink positive.

Like we wen say earlier, fo some peopo all dis iz new. But fo guys dat study da Bible dis iz nottin new. In Wat Da Smart Guys Tell 24:10 it say dat “if you lose fight” you not goin feel strong! So da Bible show dat wen we tink negative, an wen we feel down, we not goin have da powa fo do anytin. So wat you can do den fo fight agains tinkin bad an fo get moa hope in yoa life?

[Pikcha]

Hope can do plenny good

Can Fight Hopeless Kine Tinkin

HOW you ack wen tings no go yoa way? Da guys who know plenny about dat, dey say how you ansa dat goin tell whether you one negative tinka o one positive tinka. Erybody get pilikia, some get moa plenny den oddas tho. So how come den, da guys wit da mayjah kine problems dey can still charge um, an den odda guys wit ony manini kine problems, dey give up?

Try picha dis, you stay lookin fo one job. Den you go ova dea an dey shut you down. How you feel afta dat? You start fo tink: ‘Eh sometin wrong wit me, nobody eva goin hire me!’? O you might tink even moa worse den dat cuz you neva get da job. You tink: ‘Ah good fo nottin! I one loser!’ Dat kine tinkin, dass one downa.

How Fo Fight Negative Tinkin

So how you can fight um den? Da firs ting iz you gotta spock um out wen you start fo tink lidat. Den da nex step, you gotta fight dose thoughts. Try tink maybe get odda reasons why you neva get da job. So you tink dass really true? You neva get da job cuz sometin wrong wit you? O you eva thought maybe da boss he wuz jus lookin fo sometin else?

Fo see if yoa negative thoughts iz fo real try match um up wit wat you know iz true. Cuz you wen get shut down one time, dat mean you good fo nottin? Wat about da odda stuff dat you stay doin good at? Like stayin tight wit God, tight wit da ohana, da guys dat stay close to you? Learn fo not tink dat erytin you do goin be one disasta, cuz how you know you neva goin find one odda job? We go try check out sometin else dat goin help us hemo negative kine tinkin.

Tink Positive, Set Goals

Researcher guys say dat hope, all dat iz, iz tinkin you goin reach yoa goals. Bumbye we goin talk about how hope iz way moa den dat. But fo now we goin talk about wat da researcher guys say we can do fo be moa positive.

Fo help yoaself out try set da kine smalla goals, da kine you can reach an dat goin help you out fo wen you set da bigga kine goals; goin make you tink you can do um. If you had neva meet any of yoa goals befo, maybe gotta tink about da goals you stay makin. Firs try tink, you even get goals? Sometimes can get so busy dat we no stop fo tink ‘Eh, wat I like do wit my life? Wat stay important to me?’ Da Bible can help us out wit dis. It tell: “Den dey can pick da bestes kine stuff an tell laytas to da junk kine stuff.”—Fo Da Philippi Peopo 1:10.

Once we figga out wats da mos importan stuff fo us, den ony easy fo figga out da goals wen come to God, da ohana, an da res of oua life. But we gotta make shua dat we no make too many goals, an make um too hard, bumbye we no can reach um. An dat goin make us feel like ‘Ah, kill fight!’ an den we goin give up. So dass why moa betta if you get big kine goals, break um down an make um moa small so you can reach um.

If you really like do sometin, you goin do um. Wen you get goals, go all out fo do um an stick wit um. Wen you tink about all da good dat goin come from reachin yoa goals, goin help you stick wit um. Garanz no goin be easy an goin get stuff come up an get in da way but no get all bum out an give up.

Still yet wen come to goals, gotta make one plan fo reach um. Author C.R Snyder, who wen study plenny about hope, wen say: ‘Gotta have moa den one way fo reach yoa goals cuz wen one way no work out, you can try one odda way fo reach um.’

Snyder wen tell: ‘Sometimes you gotta hemo one goal an make one odda one instead. If we get flat tire wen come to one goal, if we ony worry about um plenny, goin bum us out. But if we switch um up wit sometin we can do, ony goin give us moa hope.’

Da Bible get one good exampo of dis. King David had da unreal goal fo build da temple fo Jehovah an he really wanted fo do um but God told him: ‘A’ole! Yoa boy Solomon, he goin do um instead.’ But David he neva get all habut, all huhu an try fo do um anyway. Instead he wen jus switch up his goal. He wen go all out fo get all da stuff ready fo his boy so dat he could build um.—1 Kings 8:17-19; 1 Records 29:3-7.

But even tho we know how fo fight agains bein one downa, we get positive kine tinkin, we even get goals, still yet maybe we no moa hope. How come? Cuz da pilikia dat take away peopo’s hope, we no can fix um. Wen we tink about wat get in da world aroun us, peopo no moa enuff kala, get war, stuff not fair, peopo get sick, dey mahke, how can get hope wen lidat?

[Pikcha]

If you wanted one job an dey wen shut you down, wat you tink? You neva goin get one odda job?

[Pikcha]

King David wen show he could change tings up wen come to wat he wanted fo do

Wea Can Find Fo Real Kine Hope?

Try picha dis. You look yoa watch an da ting look like stay broken. You like fix um but get plenny diffren kine choices. Choke peopo make promise dat dey can fix um. Den you find out da akamai guy dat live nex door to you, he da guy who wen make um an he say he like fix um fo you fo free. Ony easy fo choose wat you goin do, ah?

Dis show wat you can do fo find hope. If you feel like you no moa hope, wea you goin go fo kokua? Plenny peopo say dey can kokua you wit yoa problems but hard fo figga out which one iz right. Ony make sense ah, dat we go to da guy who wen make us, da One dat can give us fo real kine hope? Da Bible tell at Jesus Guys Wat Dey Wen Do 17:27: “He no stay far away from all us guys.” An 1 From Peter 5:7 tell dat God, he like “take kea all da stuff dat bodda you guys cuz he get one big heart fo you guys.”

Wat Hope Really Mean

Da Bible explain hope moa betta den da doctors an all da akamai guys we wuz talkin about earlier. In da Bible hope iz one combo of two tings. One iz you really like sometin fo happen, an two iz you get one reason fo da ting happen. Da hope in da Bible iz not one fairy tale, iz fo real! Get plenny proof. We no get hope jus cuz.

Da ting iz like faith, gotta have proof behind um. (Fo Da Hebrew Peopo 11:1) But still yet, da Bible tell get one difference between faith an hope.—1 Fo Da Corint Peopo 13:13.

Try picha dis: You wen aks yoa fren fo help you out an you hope he goin. You get faith in him cuz you know him good. He wen help plenny guys out in da past. Yoa faith an yoa hope stay tied up togedda but still yet dey diffren. So how you can get dis kine solid hope in God?

Wea Fo Real Hope Come From

Fo real hope come from God. Bible times, Jeremiah 14:8 in da New World Translation, call Jehovah “the hope of Israel.” Jehovah wuz dea hope. Any hope da Israel peopo had, had come from him. Dea hope wuzzin jus cuz. Wuz real an dey could trus him cuz da whole time dey wuz his peopo all da stuff he said he wuz goin do, he wen do um. Dea leada guy Joshua wen tell: “All da good tings Da One In Charge wen promise fo give you guys, happen awready. You get um all, he neva even broke one promise!”—Joshua 23:14.

Even today we can trus wat God wen tell. Da Bible get choke promises in dea dat awready wen come true. Cuz wat Jehovah wen tell wuz so garanz, da Bible writahs wen write um like da ting wen awready happen.

Dass how come we can call da Bible one book of hope. Wen you spock out wat stay in da Bible, yoa trus in God ony goin come moa strong. An den wen dat happen, yoa hope goin come solid. Da aposal Paul wen write: “Eryting dat peopo wen write inside da Bible befo time, all dat stay inside da Bible fo teach us guys fo come mo strong fo hang in dea. Dass da good kine words we get from da Bible. Fo shua we goin know dat bumbye God goin do plenny good tings fo us.”—Fo Da Rome Peopo 15:4.

Wat Kine Hope God Give Us?

Wen you tink we need hope da mos? Garanz wen somebody mahke, no? Wen dat happen, feel like no moa hope. No moa nottin dass moa hopeless den dat cuz we all goin mahke an we no can bring anybody back. Dass why da Bible call death “the last enemy.”​—1 Corinthians 15:26, NW.

So get hope o wat fo guys who wen mahke? Da Bible tell dat God goin wipe out death an from dat time nobody goin mahke. Jehovah God he moa strong den death. But how we know dat? Get proof. Da Bible tell nine times dat God wen use his mana fo bring back da guys dat wen mahke.

One unreal time wuz wen Jehovah wen give his boy da mana fo resurrect his fren, Lazarus, who wuz dead fo four days awready. He wen do um in front erybody.​—John 11:38-48, 53; 12:9, 10.

You might be tinkin, ‘How come he wen bring dese guys back to life even tho dey wuz goin grow old an mahke anyway?’ All dis in da Bible help us fo see dat all da guys we love dat we like see come back, get proof now dat dey can come back. So dat show we get fo real kine hope.

Jesus tell: “I da Guy dat make peopo come back alive an stay live fo real kine.” (John 11:25) He da One Jehovah goin give da mana fo bring guys back to life all ova da eart. Jesus wen tell da time goin come “wen all da mahke guys goin hear my voice. An dey goin come outa dea graves.” (John 5:28, 29) So get chance fo all da mahke guys fo come back alive.

Isaiah wen say dis real nice: “Yoa mahke guys goin come alive one mo time! All new, jalike da watta dat come on top da grass wen da light come, morning time, an jalike da earth wen make um come up.”—Isaiah 26:19.

Make us feel good, no? No moa one safer place fo be den inside God’s memory cuz he no goin foget dem. (Luke 20:37, 38) Pretty soon dey goin come back alive into one world wea erybody ova dea no can wait fo see dem, jalike one big ohana. So even wen we mahke, get hope.

How Hope Can Kokua You

Paul wen teach us how importan hope stay. He wen tell dat hope wuz like one helmet fo one army guy’s head. (1 Fo Da Tessalonika Peopo 5:8) Wat he wuz talkin about? Bible times da army guy wen wear one metal helmet fo go battle. Cuz of da helmet, mos of da blows to da head would bounce off instead of killin him. Wat he wuz tryin fo say? Da way da helmet proteck da head, hope proteck da mind. If you get solid kine hope in wat God tell, even if you get mayjah kine problems, you no goin panic an you no goin presha out. Erybody need dis.

Paul wen use one odda picha fo show how importan hope stay. He wen write: “Wen we trus God dat make us stay strong an solid inside, jalike wen da boat anchor come stuck on da reef.” (Fo Da Hebrew Peopo 6:19) Paul he knew how importan da anchor wuz cuz moa den one time he wuz inside one boat an da ting wen get all buss up. Wen had one storm, da guys on da boat would drop da anchor. Wen da anchor would come stuck on da reef, would hold da boat so da ting no move an den no would go crash into da rocks.

Jalike da anchor, wat God tell goin help us fo hang in dea wen we get hard times. War, crime, sadness, even death, Jehovah promise pretty soon not goin have da stuff we see today. (See da box stay on page 10.) Hangin on to dat hope jalike how da opihi hang on to da rock, goin help us fo come strong so we can lissen to God an we no goin be like all da odda guys aroun us in da world.

Jehovah like you fo have dat hope. He like fo you have one happy life. “He like take all da peopo outa da bad kine stuff dey stay do.” How? Firs, dey gotta come “fo know da true stuff”. (1 Fo Timoty 2:4) We like you learn da true kine stuff in da Bible dat goin save yoa life.

Da hope dat God goin give you iz way moa betta den any odda kine hope. Wit dis kine hope, you neva gotta feel like you no can do anytin cuz God can give you da mana fo reach any kine goals you get dat stay tied up wit wat he like. (2 Fo Da Corint Peopo 4:7; Fo Da Philippi Peopo 4:13) Dass da kine hope all us guys need. If you need hope, an you been searchin fo um, no worry. Can find um!

[Box/Pikcha]

Why We Get Hope?

Dese Scripchas goin make yoa hope moa strong:

◼ God promise one happy future.

Da Bible tell dat da eart goin come one paradise wit happy peopo like one big ohana.​—Songs Fo God 37:11, 29; Isaiah 25:8; Wat Jesus Show John 21:3, 4.

◼ God no can lie.

He hate all bulais. Jehovah he good an spesho so he no can bulai.​—Wat Da Smart Guys Tell 6:16-19; Isaiah 6:2, 3; Fo Titus 1:2; Fo Da Hebrew Peopo 6:18.

◼ God’s mana no moa end.

Ony Jehovah get all da powa. Nottin can stop him from doin wat he tell.​—Outa Egypt 15:11; Isaiah 40:25, 26.

◼ God like you live foeva.

​—John 3:16; 1 Fo Timoty 2:3, 4.

◼ God hope we goin lissen.

He no focus on all da bad stuff we do, he focus on da good an how hard we try. (Songs Fo God 103:12-14; 130:3; Fo Da Hebrew Peopo 6:10) He hope dat we goin do wat iz right an he stay stoked wen we do um.​—Wat Da Smart Guys Tell 27:11.

◼ God promise fo kokua you fo do wat make him happy.

His guys neva need fo feel like dey no can do anytin. God no hold back from givin us his spesho spirit. No mo anytin moa strong den dat.​—Philippians 4:13, NW.

◼ Wen you hope in God, he neva goin let you down.

Can be shua he always goin be dea fo us.​—Songs Fo God 25:3.

[Pikcha]

Jalike one helmet proteck da head, hope proteck da mind

[Pikcha]

Strong hope can make you solid like one ancha

[Credit Line]

Courtesy René Seindal/Su concessione del Museo Archeologico Regionale A. Salinas di Palermo