How Pilikia Give Us Hope

“Befo da world goin come pau, erybody goin presha out.”​—2 FO TIMOTY 3:1.

YOU wen see o hear any of dese sad tings happen?

● Plenny peopo mahke cuz dey sick.

● Choke peopo die cuz no moa enuff food.

● One big eartquake wipe out plenny peopo an dea hale.

We goin talk some moa about dis kine stuff. An we goin talk about how da Bible had tell all dis goin happen during da “last days”a, o “befo da world goin come pau.”

We not goin talk about dis fo make you see dat we live in one pilau, kapakahi world cuz you awready know dis. But we goin talk about um fo give you hope. We goin show how six prophecies stay comin true right now an how dat mean all da sufferin we see goin be pau pretty soon. Not erybody believe um an we goin hear wat dey say, but we goin see how we know fo shua we goin get one betta future.

[Footnote]

1. Eartquakes

“Da groun goin shake.”​—LUKE 21:11.

● Had one eartquake in Haiti, an had news guys who wuz reporting on um an dey heard one bebe cryin. Guys wen pull da bebe out from all da broken buildings, an wuz one 16 month ol bebe name Winnie. She wen make um, but her parents wen mahke.

WAT IZ DA FACTS? Wen one mayjah 7.0 eartquake wen hit Haiti in January 2010, ova 300,000 peopo wen mahke. Anodda 1.3 million wen lose dea hale jus lidat. Even tho dat wuz unreal wat wen happen in Haiti, no ony wen happen ova dea. Between April 2009 and April 2010, had 18 odda mayjah eartquakes all ova da world.

WHY PEOPO NO BELIEVE TINGS GETTIN WORSE? Dey tell no moa moa eartquakes now. Ony cuz we get good kine technology we know wen da tings happen, not like befo.

DEY RIGHT O WAT? Da Bible no tell how much eartquakes wuz goin have wen da world come pau. But da Bible tell wuz goin have “great earthquakes in one place after another”. Das one of da tings dat show we stay livin in da last days.​—Mark 13:8 NW; Luke 21:11 NW.

WAT YOU TINK? We seein great eartquakes jalike da Bible wen tell?

Maybe da eartquakes not enuff fo prove dat we stay livin wen da world goin come pau. So we go check out one odda prophecy.

[Blurb]

“We [geophysicists] call dem great eartquakes. Erybody else call dem horrible.”​—KEN HUDNUT, U.S. GEOLOGICAL SURVEY.

[Picture Credit Line]

© William Daniels/​Panos Pictures

2. No Moa Enuff Food

“Plenny peopo goin get notting fo eat.”​—MARK 13:8.

● One man an his ohana wen go move to da village of Quaratadji in Niger. Dey wen move ova dea cuz wea dey wuz neva have enuff food. Da man stay lying on da groun all by himself. How come? Sidi, da village chief, wen tell dat he cannot feed his family so he no can even look dem in da eye.

WAT IZ DA FACTS? All ova da world, 1 outa 7 guys no moa enuff food fo eat. In sub-Saharan Africa, way moa worse ova dea. 1 outa 3 guys always stay hungry. Fo try undastan dis moa betta, try picha get one ohana wit one faddah, one maddah, an one bebe. If ony get enuff food fo two of dem, who goin go hungry? Da faddah? Da maddah? Da bebe? Dis sometin peopo gotta tink about eryday.

WHY PEOPO NO BELIEVE TINGS GETTIN WORSE? Dey tell dat get enuff food fo erybody on da eart. Jus gotta do moa betta fo get um to erybody.

DEY RIGHT O WAT? Yeah, farmas can grow an sen moa food den eva befo. In one perfeck world da govament should be able fo solve da problem an get food fo erybody. But even tho fo long time dey wen try, still yet dey no can.

WAT YOU TINK? Mark 13:8 happenin? Even tho technology got moa betta, still yet no moa enuff food all ova da world?

Nex we goin talk about sometin dat happen afta get mayjah eartquakes an no moa enuff food dat show dat we stay livin in da last days.

[Blurb]

‘Moa den one-third of keiki who mahke from pneumonia, diarrhoea an odda sickness could had live if dey had enuff food.’​—ANN M. VENEMAN, FORMER EXECUTIVE DIRECTOR OF THE UN CHILDREN’S FUND.

[Picture Credit Line]

© Paul Lowe/​Panos Pictures

3. Diseases

“Plenny peopo goin get real sick.”​—LUKE 21:11.

● In one African country wea get war, Bonzali, one guy who try keep da town healthy, he do wat he can fo try help da mine workas who stay dying from Marburg virus.a He try get help from one big city but nobody come help. Four months layta dey finally come help but Bonzali, he mahke. He wen get da Marburg virus from da guys he wuz tryin fo help.

WAT IZ DA FACTS? Infections dat mess up da breathing, (like pneumonia), diarrhea kine diseases, HIV/AIDS, tuberculosis, an malaria iz some of da worsest kine diseases out dea. Dese kine diseases wen kill 10.7 million guys in one year. Das jalike da diseases wen kill one guy ery three seconds, all year long.

WHY PEOPO NO BELIEVE TINGS GETTIN WORSE? Dey say dat get moa disease now cuz get moa an moa peopo on da eart. So can get moa peopo dat can get sick.

DEY RIGHT O WAT? Yeah get moa peopo now, but get moa ways fo find out if peopo get da disease fo control um an help um get betta. So make sense den should get less disease right? But dat not happenin. Ony gettin moa worse.

WAT YOU TINK? Peopo gettin supa sick like da Bible wen tell?

Eartquakes, no moa enuff food, all dat bussin up choke peopo. But plenny odda guys suffa cuz wat odda guys do to dem—even from da guys who suppose to malama dem. Try check out wat da Bible sed wuz goin happen.

[Footnote]

[Blurb]

‘Iz supa bad fo have one lion eat you up. But iz jus az bad fo have one bug eat you from da inside out, an fo see um happenin all around you.’​—EPIDEMIOLOGIST MICHAEL OSTERHOLM.

[Picture Credit Line]

© William Daniels/​Panos Pictures

4. No Moa Love Fo Da Ohana

“Dey no goin get love an aloha.”—2 FO TIMOTY 3:1-3.

● Chris, who live North Wales, he work at one place wea help peopo wit domestic violence. He wen tell dat had one wahine who wen come in hea befo. She wen come in, she wuz so buss up I no could even recognize her. He sed dat get odda wahines, dey so emotionally buss dey no could even look you in da eyes.

WAT IZ DA FACTS? In one African country, 1 outa 3 wahines wuz sexually abused az one keiki. In da same place dey wen find out dat 1 outa 3 guys, dey felt like wuz alright fo buss up dea wifes. But wahines not da ony ones dat get buss up. In Canada 3 outa 10 kane get buss up by dea odda halfs.

WHY PEOPO NO BELIEVE TINGS GETTIN WORSE? Dey say always had domestics. Ony today dey talkin about um moa den befo.

DEY RIGHT O WAT? Yeah now get one spotlight on domestics moa den befo, but you tink dat wen slow um down from happenin? No. Even moa an moa peopo no moa love an aloha fo dea ohana.

WAT YOU TINK? 2 Fo Timoty 3:1-3 happenin? No moa love an aloha fo da ohana dat should come automatic?

Numba five prophecy dat happenin stay about da eart. Try check out wat da Bible tell about um.

[Blurb]

‘Domestic violence, dey know um az one of da main tings dat peopo no report. One wahine goin be buss up by her odda half 35 times befo callin da cops.’​—A SPOKESWOMAN FOR WALES DOMESTIC ABUSE HELPLINE.

5. Bussin Up Da Aina

‘God goin buss up da guys bussin up da eart.’​—REVELATION 11:18, NW.

● Mr. Pirri, who live Kpor, Nigeria, he work az one guy who colleck sap from da palm trees fo make wine. He no moa job cuz had one massive oil spill in da Niger Delta. He tell dat ‘it kill da fish, buss up da skin, no can use da watta in da streams…I no moa one way fo make on living awready’.

WAT IZ DA FACTS? Dey tink dat 6 an a half million tons of opala goin in da ocean ery year. Dey tink 50 percent of da opala iz all plastic, an da ting goin drift fo hundreds of years befo da ting break down. Besides polluting da eart, humans dey stay suckin out da resources from da eart moa fas den da eart can hando. Studies show dat da eart need one year five months fo put back all da stuff da humans takin out in ony one year. One Australian newspaypa, da Sydney Morning Herald, wen tell dat if we keep goin lidis we goin need two Earts by da time 2035.

WHY PEOPO NO BELIEVE TINGS GETTIN WORSE? Dey tell humans akamai. We can fix da problems dat get, an save da eart.

DEY RIGHT O WAT? Plenny peopo dey workin hard fo let erybody know wat stay goin on. But still yet da eart gettin all buss up, moa den eva.

WAT YOU TINK? God gotta save da planet—like he wen promise?

Wit da five prophecies we jus wen talk about, da Bible also wen tell about good tings dat goin happen befo da world goin come pau. Try check out one exampo in prophecy numba six.

[Blurb]

‘Befo I wen live in one paradise. Now I feel like I stay in one toxic waste dump.’​—ERIN TAMBER, A RESIDENT OF THE GULF COAST, UNITED STATES, CONCERNING THE EFFECTS OF THE 2010 OIL SPILL IN THE GULF OF MEXICO.

[Box]

Iz God’s Fault O Wat?

Since da Bible wen tell all dis bad stuff wuz goin happen today, dass God’s fault o wat? He make us suffa? Can find da ansas in chaptah 11 of da book What Can the Bible Teach Us? from Witnesses Fo Jehovah.

[Picture Credit Line]

U.S. Coast Guard photo

6. Preachin All Ova Da Eart

“All ova da world goin get peopo dat goin tell all da Good Kine Stuff bout…God.”​—MATTHEW 24:14.

● Vaiatea live far away in da Pacific on one island dat part of da Tuamotu Islans. Tuamotu get bout 80 small islans dat stay spread across 310,000 square miles, an ony get about 16,000 guys dat live ova dea. But still yet, Witnesses Fo Jehovah wen go talk to Vaiatea an her neighbas. How come? Cuz Witnesses Fo Jehovah like share da good kine tings about da Kingdom wit erybody​—no matta wea dey live.

WAT IZ DA FACTS? Peopo all ova da world hearin da good kine tings about da Kingdom In 2010, Witnesses Fo Jehovah wen spend about 1.6 billion hours tellin da good kine tings in ova 236 lands. Das jalike ery Witness preachin eryday fo 30 minutes. In 10 years dey wen make an give out moa den 20 billion stuff fo read about da Bible.

WHY PEOPO NO BELIEVE DIS PROPHECY? Dey wen tell dat peopo wuz preachin about da Bible tousans of years awready.

DEY RIGHT O WAT? Yeah plenny peopo wen preach about da Bible, but wuz ony small kine an fo litto while. But Witnesses Fo Jehovah doin dis all ova da world an reachin choke peopo. Da Witnesses Fo Jehovah, dey wen keep on preachin even tho da govament an odda peopo wuz full on tryin fo stop dem.a (Mark 13:13) On top of dat, Witnesses Fo Jehovah, dey no get paid fo preach. Instead, dey give dea time, an all da stuff dey give fo read, dey no charge. All dea work iz backed ony by wat stuff peopo like give.

WAT YOU TINK? Iz da “good kine stuff” about da kingdom preached all ova da eart? Cuz dis prophecy stay happenin, you tink sometin betta stay comin?

[Footnote]

[Blurb]

‘We goin go all out fo tell erybody about da good kine stuff until Jehovah say pau.’​—2010 YEARBOOK OF JEHOVAH’S WITNESSES.

Pretty Soon Tings Goin Get Moa Betta!

“Ony litto bit moa, an no goin get da peopo dat do bad kine stuff…but da peopo dat no get big head an no need be da numba one guy, dey da ones goin get da land dat Da One In Charge wen promise dem, an dey goin stay good inside cuz eryting go good fo dem.”​—SONGS FO GOD 37:10, 11.

You like see all dis come true? Garanz you like. An get solid reasons dat goin.

Earlier we wen talk about some of da prophecies dat stay in da Bible dat show dat we stay livin in da last days. (2 Fo Timoty 3:1-5) God wen have da Bible writahs put um down so us guys can come moa strong an hang in dea. (Fo Da Rome Peopo 15:4) All da prophecies dat stay happenin right now show dat all da pilikia we face almos pau.

Wat goin come afta da last days? God’s Kingdom goin rule erybody. (Matthew 6:9) Try see wat da Bible tell goin be like wen all dat happen:

● Nobody goin be hungry. “Da land grow plenny food fo harves, dat grow food all da way to da mountain tops!”​—Songs Fo God 72:16.

● No goin get disease. “Nobody…goin tell, “I stay sick!””​—Isaiah 33:24.

● Da eart goin come new. “The wilderness and the waterless region will exult, and the desert plain will be joyful and blossom as the saffron.”—Isaiah 35:1, NW.

Dis ony litto bit of da unreal stuff da Bible tell goin happen pretty soon. Why you no go aks one Witness Fo Jehovah fo show you why dey know garanz tings goin get betta?