-
Wat Goin Help You Fo Keep Learning Da Bible?You Can Live Good Foeva!—Learn Da Bible By Talking Story
-
-
LESSON 12
Wat Goin Help You Fo Keep Learning Da Bible?
You eva wen go on one hike wea da view at da end was supa cherreh but no was easy fo get dea? Is same same wen you learn da Bible. Maybe you tink, ‘I can keep learning da Bible o wat?’ How come is worth it fo no stop? Wat can help you fo keep goin even if you get hard time?
1. How come learning da Bible is worth plenny?
“Wat God tell stay alive, an get da powa.” (Fo Da Hebrew Peopo 4:12) Da Bible worth plenny cuz tell wat God tinking an how he feel about you. Can help you know plenny tings, make you akamai fo real kine, an give you hope fo one betta life. But da numba one ting is da Bible can help you fo be Jehovah’s fren. Wen you learn da Bible, you goin let his mana make yoa life moa betta.
2. How come az importan fo see dat da Bible stay worth plenny?
Da truts inside da Bible stay jalike spesho kine treasures. Dass why da Bible tell us fo “go learn wass true, jalike you buying um. But no throw way wass true, jalike you selling um.” (Smart Guys 23:23) Wen we tink good about how much da truts inside da Bible stay worth plenny to us, we goin work hard fo keep learning um, even wen we get hard time.—Read um Smart Guys 2:4, 5.
3. How Jehovah can help you fo keep learning da Bible?
Jehovah, yoa Fren, da One who wen make eryting like help you fo learn about him. “God, he da One stay make you guys like do da tings he like you fo do. An he help you guys fo do um.” (Read um Fo Da Philippi Peopo 2:13.) So den, wen get times you need da extra push fo learn from da Bible o fo do wat you wen learn, he can help you. If you need da extra powa fo get thru dose extra hard times o wen you get peopo dat go agains you, he can give um to you. No matta wat happen, make time fo pray to God ery time fo no stop learning da Bible.—1 Fo Da Tessalonika Peopo 5:17.
DIG MOA DEEP
Try find out how you can keep learning da Bible even tho you stay busy o get odda guys dat go agains you. Den look how Jehovah can help you fo keep learning.
4. Make shua dat learning da Bible is supa importan to you
Sometimes you get so much tings goin on, maybe you feel like you too busy fo learn da Bible. What can help you? Read um Fo Da Philippi Peopo 1:10, an den talk story about dese questions:
How you can show dat learning da Bible is one of “da bestes kine stuff” in yoa life?
How you can make shua dat learning da Bible is supa importan to you?
If you fill up one bucket wit sand an den try put rocks inside, not goin have room fo da rocks
But if you put da rocks inside firs, you goin have room fo put plenny sand back inside da bucket. Same same, if you make “da bestes kine stuff” numba one in yoa life, you goin be able fo do um an still have time fo do odda tings.
Learning da Bible fill da need us get fo have God inside oua life—da need fo know an worship him. Read um Matthew 5:3, an den talk story about dis question:
How we come good inside wen we make shua dat learning da Bible stay supa importan to us?
5. No stop learning even tho get guys dat go agains you
Goin get times wen oddas goin try stop you from learning about da Bible. Try check out wat wen happen to Francesco an wat he wen do. Play um da VIDEO, an den talk story about da questions afta.
Inside da video, how Francesco’s frenz an ohana wen ack wen he told dem wat he was learning?
Wat good kine tings he wen get cuz he neva stop learning da Bible?
Read um 2 Fo Timoty 2:24, 25, an den talk story about dese questions:
How yoa ohana an yoa frenz feel about wat you stay learning?
From wat da Bible tell, how you suppose to ack wen somebody tell you dey not happy dat you stay learning da Bible? How come?
6. Trus dat Jehovah goin help you
Da moa close we come wit Jehovah, da moa we goin like do tings dat make him happy. Still yet, can be hard fo make changes in oua life so we can live da way Jehovah like us live. If you eva feel lidat, no give up. Jehovah goin help you. Play um da VIDEO, an den talk story about da questions afta.
Inside da video, wat kine changes Jim had fo make fo make Jehovah happy?
Wat was mean about how he wen change?
Read um Fo Da Hebrew Peopo 11:6, an den talk story about dese questions:
Wat Jehovah goin do fo da ones who “like know him fo real kine” an try hard fo make him happy?
Wat dis tell you about how Jehovah feel wen he see wat you stay doing fo learn da Bible?
WAT SOME PEOPO TELL: “How come you stay learning da Bible?”
Wat you would tell um?
WAT WE WEN TALK ABOUT
Even if sometime hard, learning da Bible can help you fo live good foeva. Keep on trusting Jehovah an he goin give you good kine tings.
Wat You Wen Learn
How come truts inside da Bible stay spesho to you?
How you can “pick da bestes kine stuff?”
How come you gotta ask Jehovah fo help you no stop learning da Bible?
LEARN SOME MOA
Try look four tings dat plenny peopo do fo help dem no wase time.
Try look how Jehovah wen help one wahine wen her husban neva undastan how come she wen work hard fo make Jehovah happy.
See how it wen turn out good fo dis guy wen his wife hang in dea.
Some guys tell dat Witnesses Fo Jehovah split up da ohana but dass true o wat?
“Do Witnesses Fo Jehovah Bus Up Ohanas O Make Dem Moa Strong?” (Web article)
-
-
Fo Make Good Kine ChoicesYou Can Live Good Foeva!—Learn Da Bible By Talking Story
-
-
LESSON 35
How Fo Make Good Kine Choices
All us get choices fo make, aah? Plenny of dese choices can change who us an how tight we stay wit Jehovah. Maybe we gotta pick wea fo live, how fo make money, o if we goin get married. Wen we make good kine choices, we can live good an make Jehovah happy.
1. How da Bible can help you make good kine choices?
Befoa you make one choice, pray fo Jehovah help you an look good inside da Bible fo see wat he tink. (Read um Smart Guys 2:3-6.) Sometimes, easy fo see wat Jehovah like us do. Wen dat happen, da bes ting is fo lissen an do um.
Wat if is not easy fo see wat Jehovah stay tell you fo do? Jehovah still goin “show you guys da way fo go.” (Isaiah 48:17) How can? Maybe goin get one basic trut inside da Bible dat show how God tink an feel dat can help you. Plenny times, we learn how God feel about someting wen we read um in da Bible. Wen we figga how Jehovah feel, we can choose da tings dat make him happy.
2. Wat you gotta do befoa you choose fo do someting?
Da Bible tell: “Da akamai peopo, dey tink firs bout wat dey goin do.” (Smart Guys 14:15) Dis mean dat befoa we choose fo do someting, we gotta tink about wat kine choices get. Fo each one, try ask yoaself: ‘Wat trut inside da Bible goin help wit dis? Which one goin help me have peace? Wat I pick goin bodda oddas o wat? An da mos importan one, goin make Jehovah happy o wat?’—Da Rules Secon Time 32:29.
Jehovah get da right fo tell us wat stay good an bad. Wen we get fo know his rules an da trut real good, an like follow um, dass how we get fo know wat is ok an not ok. (Fo Da Rome Peopo 2:14, 15) Knowing dat goin help us choose wat stay good.
DIG MOA DEEP
Learn how da truts inside da Bible an fo know wass good an bad can help us fo choose good kine tings.
3. Let da Bible show you wat fo do
How da truts inside da Bible can help us fo choose wat fo do? Play um da VIDEO, an den talk story about da questions afta.
Wat spesho kine gif Jehovah wen give us?
How come Jehovah wen let us choose wat fo do?
Wat he wen give fo help us fo choose da bestes ting fo do?
Fo check out one Bible trut, read um Fo Da Efesus Peopo 5:15, 16. Den talk story about how you can “get chance fo do good kine stuff” fo . . .
read da Bible all da time.
be one betta husban, wife, faddah, maddah, son o daughtah.
go meetings wit da local hui.
4. Learn wass good an wass bad so you can choose wass good
Wen da Bible stay supa clear about someting, is easy fo choose wass good. But wat if no moa? Play um da VIDEO, an den talk story about da question afta.
Inside da video, wat da sistah wen do fo know wass good an wass bad moa betta so she can choose wat goin make Jehovah happy?
How come az no good fo ask oddas fo choose fo us? Read um Fo Da Hebrew Peopo 5:14, an den talk story about dese questions:
Even if moa easy fo ask oddas fo choose fo us, wat we gotta figga out on oua own?
Wat get fo help you know wass good an wass bad moa betta so you can choose wass good?
Jalike one map, knowing wass good an wass bad can help us know wea fo go in oua life
5. Respeck wat oddas tink stay good an bad
Not erybody goin choose fo do da same ting. How us can show respeck fo wat oddas tink is ok o not ok? Try look two exampos:
Exampo 1: One sistah who like wear plenny makeup move to one local hui wea doing dat bodda da sistahs ova dea.
Read um Fo Da Rome Peopo 15:1 an 1 Fo Da Corint Peopo 10:23, 24, an den talk story about dese questions:
How dese scripchas can help dis sistah choose wat fo do? Wat you goin do if you stay wit somebody who tink az not ok fo do wat you tink is ok?
Exampo 2: One braddah know dat da Bible tell az ok fo drink alcohol, but he choose not fo drink um. He stay at one get togedda wea braddahs stay drinking.
Read um Da Teacha 7:16 an Fo Da Rome Peopo 14:1, 10, an den talk story about dese questions:
How dese scripchas can help dis braddah choose wat fo do? Wat you would do if you see somebody doing someting dat you no would do?
How fo choose wass good
1. Ask Jehovah fo help you choose wat fo do.—From James 1:5.
2. Go check out da Bible an odda tings dat talk about um fo find truts dat can help you. Go talk story wit odda Christians who undastan wat you stay goin thru.
3. Tink good how wat you choose, can change wat you an oddas tink is ok an not ok.
WAT SOME PEOPO TELL: “Who kea wat odda peopo tink? Do wat you like.”
How come we gotta kea how God an odda peopo feel?
WAT WE WEN TALK ABOUT
We choose fo do good tings wen we figga how Jehovah feel about someting an tink if goin help oddas o goin jam dem up.
Wat You Wen Learn
How you can choose fo do wat make Jehovah happy?
How you can get fo know wass good an bad moa betta?
How you can show respeck fo wat oddas tink az ok an not ok?
LEARN SOME MOA
How you can choose fo do tings dat make you moa tight wit God?
“Make Decisions That Honor God” (The Watchtower, April 15, 2011)
Undastan moa betta how Jehovah help you fo know wat fo do.
Learn wat wen help one braddah wen he had hard time fo choose wat fo do.
Learn about how fo make Jehovah happy even wen he no tell exackly wat suppose to do.
“Do You Always Need a Bible Command?” (The Watchtower, December 1, 2003)
-