-
Wat Is God’s Govament?You Can Live Good Foeva!—Learn Da Bible By Talking Story
-
-
LESSON 31
Wat Is God’s Govament?
Da main ting da Bible talk about is God’s Govament. Jehovah goin use his Govament fo make tings da way he wanted um from da start. Wat is God’s Govament? How we know stay up an runnin now? Wat dis Govament awready wen do? An wat goin do bumbye in da future? Us goin find out da ansas in dis lesson an in da nex two.
1. Wat is God’s Govament, an who is da King?
Jehovah God wen set up da Govament in heaven an Jesus is da King. (Matthew 4:17; John 18:36) Da Bible tell about Jesus: “He goin stay King . . . foeva.” (Luke 1:32, 33) Cuz Jesus da King of God’s Govament, he goin be in charge of erybody on top da earth.
2. Who goin be leadas wit Jesus?
Jesus no lead by himself. Guys “from ery ohana, an language, an peopo, an country . . . goin lead all da peopo inside da world.” (Jesus Show 5:9, 10) Since Jesus was on top da earth, uku million peopo wen follow him. All of dem goin be leadas wit him? No. Ony 144,000 of dem goin go heaven an be leadas wit Jesus. (Read um Jesus Show 14:1-4.) All da odda peopo dat follow Jesus goin live unda God’s Govament on top da earth.—Songs Fo God 37:29.
3. How come God’s Govament moa betta den human govaments?
Even wen human leadas try do good kine tings, plenny times dey no moa da powa fo do eryting dey like. Afta awhile, somebody else goin take ova fo dem an maybe da new leada ony tink about himself an no like help odda peopo. But nobody eva goin have to take ova fo Jesus Christ, da Rula of God’s Govament. “God . . . set up anodda kine govmen. Dat govmen, no goin come wipe out eva.” (Daniel 2:44) Jesus goin be da leada ova erybody on top da earth. He not goin treat one guy moa betta den da odda guy. He goin treat erybody same same. He goin teach peopo fo make jalike him an treat each odda wit plenny love an aloha, fo do good tings, an fo be fair.—Read um Isaiah 11:9.
DIG MOA DEEP
Try look how come God’s Govament is moa betta den human govaments.
4. One govament dat get plenny powa goin be in charge ova da whole earth
Jesus Christ get moa powa fo rule den any odda leada eva. Read um Matthew 28:18, an den talk story about dis question:
How come da powa Jesus get fo rule is betta den da powa any odda human leada get?
Human govaments change all da time, an each one of dem ony rule ova one small part of da earth. Wat about God’s Govament? Read um Daniel 7:14, an den talk story about dese questions:
How come az good dat “no mo nobody goin ovathrow” God’s Govament?
How come az good dat God’s Govament goin be in charge ova da whole earth?
5. Human govaments, no can
How come God’s Govament gotta take ova fo da human govaments? Play um da VIDEO, an den talk story about da question afta.
How tings stay now cuz of human govaments?
Read um Da Teacha 8:9, an den talk story about dese questions:
You tink God’s Govament gotta take da place of human govaments o wat? How come?
6. God’s Govament get leadas who undastan us
Cuz oua King, Jesus, was one human befoa time, he can “undastan how us guys not strong.” (Fo Da Hebrew Peopo 4:15) Jehovah wen choose 144,000 guys fo be leadas wit Jesus. Dey come “from ery ohana, an language, an peopo, an country.”—Jesus Show 5:9.
Make you feel good fo know dat Jesus an his leada guys know wat az like fo live az one human o wat? How come?
Jehovah wen choose kanes an wahines from all ova fo be leadas wit Jesus
7. Da laws God’s Govament get is da bes
Govaments make laws dat suppose to be good fo da peopo an proteck um. Da peopo unda God’s Govament gotta follow laws too. Read um 1 Fo Da Corint Peopo 6:9, 10, an Fo Da Hebrew Peopo 10:22. Den talk story about dese questions:
How you tink da world goin be like wen erybody ack da way God tell?a
Jehovah expeck peopo unda his Govament fo lissen him. You tink dass fair? How come?
How we know peopo who no lissen God’s laws now, can change?—Go look Fo Da Hebrew Peopo 10:22.
Govaments make laws fo do good fo da peopo an proteck dem. God get da bes laws fo do good an proteck da peopo unda his Govament
WAT SOME PEOPO TELL: “God’s Govament, wat is dat?”
Wat you would tell um?
WAT WE WEN TALK ABOUT
God’s Govament is one real govament in heaven dat goin be in charge ova da whole earth.
Wat You Wen Learn
Who da leadas of God’s Govament?
How come God’s Govament is da bes?
Wat Jehovah expeck from da peopo unda his Govament?
LEARN SOME MOA
Try look wat Jesus wen tell about wea God’s Govament stay.
How come Witnesses Fo Jehovah choose fo take sides wit God’s Govament an not human govaments?
Da 144,000 dat Jehovah wen choose fo be leadas wit Jesus, wat da Bible tell about dem?
Wat wen prove to one lady who was lock up dat ony God can make da world fair?
“How I Found the Answer to Injustice” (Awake!, November 2011)
-
-
Wat Mean Fo No Take SidesYou Can Live Good Foeva!—Learn Da Bible By Talking Story
-
-
LESSON 45
What Mean Fo No Take Sides
Jesus wen teach his guys fo “no stay jalike [da world].” (John 15:19) Dis mean we no goin take sides wen come to political kine stuffs an wars. Is not always easy fo no take sides. Peopo might make trouble to us cuz of dis. How we can stick to Jehovah an no take sides?
1. How fo real kine Christians look at da govaments?
Christians respeck da govament. We do wat Jesus wen tell: “Give um to Cesar, wat his.” Dis mean we goin follow da laws wea we live, like paying taxes. (Mark 12:17) Da Bible teach dat da govaments stay ruling ony cuz Jehovah let um. (Fo Da Rome Peopo 13:1) So we know dat da govaments no moa all da powa. Ony God an his Govament goin fix all da pilikia dat we get.
2. How we can show dat we no take sides?
Jalike Jesus, we no get mix up wit political kine stuffs. Wen da peopo wen see wat Jesus could do, dey wanted fo make him king of da earth, but he neva let um. (John 6:15) How come? Cuz he wen tell, “I not da kine king from dis world.” (John 18:36) Cuz we follow Jesus, we show dat we no choose sides in plenny diffren ways. Like, we no go war. (Read um Micah 4:3.) We show respeck fo tings dat rep one nation—like one flag—but we no worship um. (1 From John 5:21) We no go agains o support any political kine huis o person runnin fo office. Wen we do dat, we show dat we full on stay tight wit God’s Govament.
DIG MOA DEEP
Try look some stuffs dat goin make um hard fo no take sides, an look how wat you choose can make Jehovah happy.
3. Fo real kine Christians no take sides
Jesus an his guys wen show us wat fo do. Read um Fo Da Rome Peopo 13:1, 5-7 an 1 From Peter 2:13, 14. Den, play um da VIDEO an talk story about da questions afta.
How come gotta show respeck fo guys who stay in charge?
How we show dat we lissen to dem?
Wen get war, some nations tell dey no take sides, but still yet dey help both sides. Wat mean fo no take sides fo real kine? Read um John 17:16. Den, play um da VIDEO an talk story about da question afta.
Wat mean fo no take sides?
Wat if guys who stay in charge tell you, you gotta do someting dat go agains wat God tell? Read um Jesus Guys 5:28, 29. Den, play um da VIDEO an talk story about da questions afta.
If da human law no match up wit wat God tell, who you goin lissen?
You can tink of one time wea Christians no goin lissen to da govament guys in charge?
4. No take sides in how you tink an how you ack
Read um 1 From John 5:21. Den, play um da VIDEO an talk story about da questions afta.
Inside da video, how come Ayenge wen choose fo no join da political hui o salute da flag?
You wen tink dat was one smart choice?
Wat odda tings can make um hard fo no choose sides? Play um da VIDEO, an den talk story about dese questions afta.
Wen get sports games between diffren countries, how we can no take sides?
How we can no take sides even if wat da govament guys choose goin affeck us?
How da news o da guys aroun us can affeck da way we tink?
Wat tings can come up wea you gotta no pick sides in da way you tink an ack?
WAT SOME PEOPO TELL: “How come you no salute da flag o sing da national anthem?”
How you goin ansa?
WAT WE WEN TALK ABOUT
Christians work hard fo no take sides in political kine stuffs in da way dey talk, ack, an tink.
Wat You Wen Learn
Wat we gotta give to da govaments?
How come we gotta no take sides wen come to political kine stuffs?
Wen can be hard fo no take sides?
LEARN SOME MOA
Wat you might have to give up fo no take sides?
Wat da ohanas can do now fo make ready fo wen az hard fo no choose sides?
How come fighting fo yoa country is not da bestes ting you can do?
Wen come to yoa job, try look how fo no be like da peopo inside da world.
“Each One Will Carry His Own Load” (The Watchtower, March 15, 2006)
-