2. Wat da Bible show us about Jehovah?

Da Bible tell, dat outa all da gods, Jehovah da ony God dass fo real. How come? Nobody stay in charge of Jehovah, an ony him “da mos importan ova da whole earth.” (Read um Songs Fo God 83:18.) He “Da God Dat Get All Da Powa!” Dat mean, he can do wateva he like do. He “wen make eryting”—da universe, an eryting dat stay alive on top da earth. (Jesus Show 4:8, 11) Ony Jehovah always was hea, an he goin be hea foeva.​—Songs Fo God 90:2.

Cuz Jehovah wen make eryting, we gotta worship ony him. (Jesus Show 4:11) Dat mean we gotta love him an ony worship him, an no use any kine idol kine stuffs.—Read um Isaiah 42:8.

How Jehovah like us worship him? He like us “go all out fo him . . . cuz dass how you show God love an respeck.” (Fo Da Rome Peopo 12:1) Dis mean we gotta live da way he like. Fo exampo, da ones who love Jehovah love an follow wat he tell about marriage. An dey stay away from pilau kine stuffs, like using tobacco o abusing drugs an alcohol.a