Spesho Campaign In Septemba Fo Help Peopo Start Learnin Da Bible By Talkin Story

In Septemba, we goin work real hard fo reach erybody fo see if dey like learn da Bible by talkin story. We goin use da You Can Live Good Foeva! brochure fo do dis. If you like be one part-time pionea preacha dis mont, you can sign up fo make 30 hours. How we goin do dis spesho campaign?

• On Da Talk Story Fo Da Firs Time: Use da las page of da brochure fo help dem see can be good fun fo learn da Bible by talkin story, an try show dem how dey can do dis. No foget da guys you use to talk story to befo, an even da guys you stay talk story to now. If dey neva like learn da Bible befo, maybe dey like learn um now cuz of da new brochure, an da new way we do um. Make shua you no leave da brochure if da peopo no stay home. An if you stay writin lettas, no give um unless dey like one. Da Eldas Who Kea Fo Da Preachin Work In Da Local Hui might make moa field service meetins fo dat mont.

• Odda Kine Ways: If yoa local hui use da carts fo preach, make shua da cart show da You Can Live Good Foeva! brochure. Fo dose who like da brochure, tell dem it come wit one way fo learn da Bible fo free. Show dem fas kine right dea how dey can learn da Bible by talkin story, o make plans fo show dem laytas. Da bradda who take kea da preachin work wea you live can set up trained kine preachas fo go wea peopo work, fo see if anybody like learn da Bible. You can even aks da guys you work wit, o anybody you talk to, if dey like learn da Bible by talkin story.

Jesus wen tell us we gotta “teach all da diffren peopos fo dem learn bout me an come my guys.” (Mat 28:19, 20) Dis spesho campaign goin kokua us fo do jus dat, usin You Can Live Good Foeva!