LESSON 01
How Da Bible Can Help You
Choke peopo wonda about big kine stuffs, like how come we suffa an mahke, o wat goin happen in da future. Choke peopo like know too about da smalla kine stuff, like how we goin live eryday, o how my family goin be happy? Wea get da ansas to all dis kine questions? Plenny peopo stay find out dat get all da ansas inside da Bible. Da Bible can help anybody who like ansas to dese kine questions.
1. Wat kine questions da Bible talk about?
How life wen start? How come we hea? How come peopo suffa? Wat happen wen peopo mahke? If nobody like war, den how come dey fight all da time? Wat goin happen to da earth bumbye? Choke peopo stay wonda about dis kine stuff, an is good you ask questions lidat, cuz da ansas you find inside da Bible can help you come real good inside.
2. How da Bible can help you live good eryday?
Da Bible can help all us stay real good inside eryday. Even if us guys gotta work hard at one job dat us guys no like, da Bible can still help us fo be happy. It can help yoa ohana deal wit any kine problems so dey can stay happy fo real kine. You goin learn about dis an plenny odda stuffs az we talk story about dis togedda. An maybe you goin tink too, dat “eryting inside da Bible . . . az good.”—2 Fo Timoty 3:16.
Dis tool no take da place of da Bible but is fo help you undastan da Bible moa betta. So wen get one scripcha, look um up an see how da ting match up wit wat you learn.
DIG MOA DEEP
In dis part you goin learn how da Bible wen help peopo, how you can have good fun wen you reading um, an how come az good if somebody help you fo undastan um.
3. Da Bible can show us da way fo go
In oua life, hard fo know wat goin happen in da future. Da Bible az jalike one supa strong light dat can show you not ony wea you goin, but wat kine stuffs fo stay away from.
Read um Songs Fo God 119:105, an den talk story about dese questions:
Da person who wen write dis, how dey wen tink of da Bible?
Wat you tink of da Bible?
4. Da Bible get da ansas to da questions we get
One lady, she had plenny questions dat wen bodda her fo long time. Da Bible wen ansa um all fo her. Play um da VIDEO, an den talk story about da questions afta.
In da video, wat kine questions da lady had?
How learning an talking story about da Bible wen help her?
Da Bible tell, az good if we ask questions. Read um Matthew 7:7, an den talk story about dis afta:
Wat kine questions you get dat maybe da Bible can ansa?
5. You can have good fun wen you read da Bible
Choke peopo have good fun wen dey read da Bible an dat help dem plenny. Play um da VIDEO, an den talk story about da questions afta.
How da younga guys in da video wen feel about reading?
How come dey feel diffren wen dey read da Bible?
Da Bible give us good kine words dat help us no worry too much about da bad kine stuff an can help us stay good inside. Read um Fo Da Rome Peopo 15:4, an den talk story about dis question:
Da Bible promise dat we goin come moa strong an bumbye God goin do plenny tings fo us. How you feel about dat?
6. Odda peopo can help us fo undastan da Bible moa betta
If you read da Bible by yoaself, az good. But talking story about um wit somebody else can help you undastan um moa betta. Read um Jesus Guys 8:26-31, an den talk about dis question:
How us guys can undastan da Bible?—Go look verses 30 an 31.
Da Etiopia guy, he no could undastan da Scripchas by himself. Plenny peopo today tell az betta if dey can talk about da Bible wit odda peopo.
WAT SOME PEOPO TELL: “Dass wase time, study da Bible.”
Wat you goin say if dey tell you dat? How come?
WAT WE WEN TALK ABOUT
Da Bible can help us live good eryday. It can ansa da big kine questions we get. It can give us good kine words fo help us come moa strong.
Wat You Wen Learn
How da Bible can help us fo live one good life?
Wat kine questions da Bible can ansa?
Wat you like learn from da Bible?
LEARN SOME MOA
Da Bible can help us fo live good now.
“Wat Da Bible Tell—Good Foeva” (Da Place Fo Watch From No. 1 2018)
From small kid time had one braddah who no could feel happy. Da Bible wen help him.
Try look wat da Bible tell about how yoa ohana can be happy.
Plenny peopo donno who really stay in charge of dis world, but da Bible get da ansa.