TRYING FO TALK STORY DA FIRS TIME
LESSON 3
Be Nice
Bible trut: “Wen you get love an aloha . . . you get one good heart fo help da odda peopo.”—1 Cor 13:4.
Wat Jesus Wen Do
1. Watch um da VIDEO, o read um John 9:1-7. Den tink about da questions:
Wat da firs ting Jesus wen do—make da blind guy come good, o share some good kine tings wit him? —Check out John 9:35-38.
How come you tink da guy wanted fo lissen to Jesus?
Wat We Learn From Jesus?
2. If one person feel dat we really kea about dem, dey going like lissen to wat we going share.
Copy Jesus
3. Undastand how dey feel. Try put yoaself in dea slippas.
Tink about dis: ‘Wat dis person stay worried about? Wat going help dem? Wat dey stay interested in?’ Doing dat going help us be nice fo real kine.
Wen you lissen real good to one person, you show dat you really kea about wass importan to dem. If he start telling you how he feel about someting, o open up about one pilikia he going thru, no change da subjeck..
4. Talk nice an show respeck. Wen you feel fo da person an really like help um, dey going know by da way you talk. We like watch wat we say, an how we say um so dey no get huhu.
5. Be ready fo help. If get one chance, help da person wen can. Wen we stay nice to somebody, maybe dey going like talk story wit us.