God Make Da Sky An Da Eart

Jehovah God iz oua Mayka. He wen make eryting, da tings we can see an da tings we no can see. Befoa he wen make da tings we can see, he wen make choke plenny angels. Who dat, angels? Angels, dass peopo dat Jehovah wen make who stay jalike him. We no can see dem, jalike we no can see God. Da firs angel Jehovah wen make had come his helpa. Dat angel wen help Jehovah make da stars, da planets an all da odda tings. One of dose planets iz da eart, dis beautiful place we live.

Den Jehovah wen make ready da eart fo all da animals an peopo live on. He made da light from da sun shine on top da eart. He wen make da mauna, da oceans, an da rivas.

Wat he wen do nex? Jehovah tell: ‘I goin make grass, plants, an trees.’ Choke diffren kine fruits, vegetables an flowas had start fo grow. Den Jehovah wen make all da animals. Animals dat fly, swim, an da creepy crawly kine. He wen make da small kine ones like da rabbit an big kine ones like da elephant. Wat yoa favorite animal?

Den Jehovah tell da firs angel: “Now, I like make peopo.” Peopo goin be diffren from da animals. Dey goin be able fo make tings. Dey goin talk, laugh an pray. Dey goin take kea da eart an da animals. You kno who wuz da firs man, o wat? We go check um out.