Not too far from Babylon, had one town called Ur. Ova dea da peopo worship plenny gods, but dey no worship Jehovah. But had one guy in Ur town dat wen worship ony Jehovah. His name wuz Abraham.

Jehovah tell Abraham: ‘Go way from yoa country an yoa ohana. I goin show you anodda country.’ Den God promise: ‘Da peopo dat goin come from you, bumbye I goin make dem come one big, importan nation, an I goin do good tings fo dem cuz of you.’

Abraham neva know wea Jehovah wuz telling him fo go, but he wen trus Jehovah. So Abraham, his wife Sarah, his faddah Terah, an his nephew Lot wen pack up all dea stuff an wen lissen to Jehovah an start da long trip.

Abraham wuz 75 year old wen him an da ohana wen get to da place Jehovah wanted dem fo go. Da place wuz called Canaan. Dass wea God wen talk to Abraham an wen promise him: ‘Dis land ova hea, I goin give um to da peopo dat goin come from you bumbye.’ But Abraham an Sarah dey wuz ol, dey neva have any kids. So how Jehovah goin keep his promise?

Abraham an Sarah wuz married long time. Dey wen leave dea nice house in Ur town an now dey live in one tent. But Sarah neva grumble, cuz she trus Jehovah.

Sarah wanted one kid so bad dat she wen tell Abraham: ‘If my slave wahine Hagar get one kid, I can hanai um.’ Den bumbye, Hagar had one boy. His name wuz Ishmael.

Long time afta, wen Abraham wuz 99 an Sarah wuz 89 year ol, dey had three guys come visit dem. Abraham wen ask um fo take one break unda one tree, an fo eat someting togedda. You kno who dese three guys wuz? Dey wuz angel guys! Dey wen tell Abraham: ‘Same time, one year from now, garanz yoa wife goin get one bebe boy.’ Sarah stay lissen from da tent. She laugh inside cuz she figga: ‘I ol already, how I goin born one bebe?’

Da nex year, Sarah born one bebe boy, jalike Jehovah’s angel wen promise. Abraham name um Isaac, dat mean “Fo laugh.”

Wen Isaac wuz about five year ol, Sarah see Ishmael make fun of Isaac. She wanted fo proteck her boy, so she tell Abraham dat Hagar an Ishmael gotta go away. At firs, Abraham neva like dat. But Jehovah tell Abraham: ‘Lissen to Sarah. I go take kea of Ishmael. But eryting I wen promise goin happen thru Isaac.’