Isaac wuz 40 year ol wen he wen marry Rebecca. He love her plenny. Bumbye, dey had twin boys.

Da olda boy name Esau, da younga one Jacob. Esau wuz one good hunta, he love fo be outside. But Jacob, he like fo stay home.

Back den, da oldes boy get mos of da land an money wen da faddah mahke. Dey wen call dat da right fo inherit. Fo Isaac’s ohana, paht of dose rights wuz fo have one paht in da promises Jehovah wen make to Abraham. Esau neva kea about dose promises, but Jacob wen know dey wuz real importan.

One day Esau come home from hunting, real tired an hungry. He smell da good food Jacob stay cooking an he tell: ‘Eh braddah, give me some of dat red stew fo grind, cuz I real hungry!’ Jacob tell, “Shoots. But firs, you gotta sell me yoa right fo get oua faddah stuffs.’ Esau tell: ‘I no kea about my right fo inherit! You can have um. I jus like eat already.’ You tink dat wuz one smart ting Esau wen do? No ways! Esau wen give away someting dat wuz wort plenny, jus fo one bowl of stew.

Wen Isaac wuz real ol, da time wen come fo bless his oldes boy. But Rebecca wen help Jacob, da younga boy, fo get bless. Wen Esau find out, he wuz supa mad an plan fo kill his braddah. Isaac an Rebecca wanted fo keep Jacob safe, so dey tell him: ‘Go stay wit yoa unko Laban fo now, until yoa braddah calm down.’ Jacob lissen to wat his parents tell an he run fo his life.

Jehovah wen promise he goin keep Jacob safe, jalike he wen proteck Abraham an Isaac. Jacob move to one place called Haran. He get married ova dea, raise one big family, an come real rich.

One day Jehovah wen tell Jacob: ‘Go back to da land you wen grow up.’ So Jacob an his ohana wen start da long trip back. On da way, some peopo wen tell him: ‘Eh, yoa braddah Esau coming, an he get 400 guys wit him!’ Jacob wuz sked cuz he wen tink Esau wanted fo buss up him an his ohana. So he wen ask Jehovah: ‘No let my braddah hurt me!’ Da nex day Jacob wen send Esau one present. He wen send plenny sheeps, goats, cows, camels, an donkeys.

Layta dat nite wen Jacob wuz all by himself, he had see one angel! Him an da angel had wresso wit each odda, all da way til da sun wen start fo come up. Jacob neva give up, even if he had get hurt. Da angel tell um: ‘Let me go.’ But Jacob tell da angel: ‘No way I goin let you go, until you make good tings happen to me.’

Right den an dea, da angel tell Jacob da spesho tings God like do fo him. Dass wen Jacob wen know Jehovah no wuz goin let Esau buss him up.

Dat same morning Jacob wen see Esau an his 400 guys coming. Jacob wen go fas in fron his wifes an kids, an put his face on top da groun fo show respeck to his braddah. He wen do dat seven times. Esau wen run to Jacob an give him one big hug. Da two braddahs wen cry togedda an make peace. Da way Jacob wen hando dis, how you tink Jehovah wen feel about um?

Laytas, Esau an Jacob wen go back to dea own house. All togedda Jacob had 12 boys. Dea names wuz Reuben, Simeon, Levi, Judah, Dan, Naftali, Gad, Asher, Issakar, Zebulun, Joseph, an Benjamin. Jehovah had use one of dose boys, Joseph, fo save his peopo. How He wen do dat? We go find out.