Moses wen live in Midian fo 40 years. He wen get married an had kids. One day wen he wuz taking kea his sheep close by Mount Sinai, he wen see someting awesome. Had one bush dat wuz on fiyah, but no wuz burning up! Moses wen go by um fo check um out, but he wen hea one voice coming from da bush say, ‘Moses! Stay right dea! No come nea. Take off yoa slippas. Cuz da place you stay standing, dass spesho fo me!’ Wuz Jehovah talking tru one angel.

Moses wuz sked, so he wen cova his face. He wen hea da voice tell, ‘I wen see how da Israel guys suffa. I goin save dem from da Egypt peopo an take um to one good land. You da one who goin help take my peopo outa Egypt.’ You tink dat wen shock Moses, o wat?

Moses wen ask, ‘Wat I goin say wen peopo ask who had sen me?’ God tell um, ‘Tell dem dat Jehovah, da God fo Abraham, da God fo Isaac, an da God fo Jacob wen sen you.’ Den Moses tell, ‘Wat if da peopo no lissen me?’ Jehovah wen show Moses proof dat He wuz goin help him. He wen tell Moses fo throw his stick on top da groun. Den da stick wen come one snake! Wen Moses had grab da snake by da tail, da buggah wen come one stick again. Jehovah tell, ‘Wen you do dis, dat goin show proof dat I wen sen you.’

Moses wen tell, ‘I no can talk good.’ But Jehovah wen promise him, ‘I goin tell you wat fo say, an I goin sen yoa braddah Aaron fo help you.’ Moses wen take his wife an boys back Egypt side, cuz he kno dat Jehovah goin be wit him.

Da Israel peopo had fo work hahd az slaves. Jehovah wen sen Moses an Aaron fo tell dis to Pharaoh, ‘Let my peopo go so dey can worship me in da boonies.’ Pharaoh wuz hahd head an had tell um back, ‘I no kea wat Jehovah say. I no goin let da Israel peopo go.’ Den Pharaoh wen make dem work even moa hahd. Jehovah wuz goin teach Pharaoh one lesson. You kno how he wuz goin do dat? He wen give Egypt da Ten Mayjah Troubles. Jehovah wen tell Moses, ‘Pharaoh neva lissen me. In da morning he goin be by da Nile Riva. Go by him an tell um dat cuz he neva let my peopo go, all da watta in da Nile goin come blood.’ Moses wen lissen an had go by Pharaoh. Pharaoh had watch Aaron hit da Nile wit his stick, an da riva wen turn into blood! Da riva wen start fo smell hauna, da fish wen mahke, an neva have fresh watta fo drink from da Nile. Still yet, Pharaoh neva let da Israel peopo go.

Seven days layta, Jehovah wen sen Moses back to Pharaoh fo tell um, ‘If you no let my peopo go, Egypt goin be full of frogs.’ Aaron wen put his stick in da air, an frogs wen start fo take ova da ‘aina. Da peopo wen find frogs in dea houses, in dea beds, an in dea bowls. Had frogs erywea! Pharaoh wen tell Moses fo beg Jehovah fo end um. Pharaoh wen promise he wuz goin let da Israel peopo go, so Jehovah wen stop um. Da Egypt guys wen pile up all da dead frogs, an had ony choke frogs. Da land wuz ony hauna! But still yet, Pharaoh neva let da peopo go.

Den Jehovah wen tell Moses, ‘Aaron gotta hit da groun wit his stick, an da dus goin come gnats, or da small kine flies dat bite.’ Right den an dea, had gnats erywea. Even Pharaoh’s own peopo wen tell him, ‘Dis trouble come from God.’ But still yet, Pharaoh neva let da Israel peopo go.