Moses an Aaron wen go tell Pharaoh wat God tell, ‘If you no let my peopo go, I goin sen gadflies, bugs dat fly togedda an bite.’ Choke gadflies wen go inside da Egypt guys’ houses, no matta dey rich or poor. Had gadflies all ova da land. But Goshen side, wea da Israel peopo wen live, neva have gadflies. From da numba four mayjah trouble on, da troubles ony wen hurt da Egypt guys. Pharaoh wen beg, ‘Yoa peopo can go! Jus beg Jehovah fo hemo dese flies.’ But wen Jehovah had hemo da gadflies, Pharaoh wen change his mind. Pharaoh goin eva learn, o wat?

Jehovah tell, ‘If Pharaoh no let my peopo go, da Egypt peopo’s animals goin come sick an mahke.’ Da nex day, da animals wen start fo die. But da Israel peopo’s animals neva die. Still yet, Pharaoh make hahd head, an he neva let da peopo go.

Den Jehovah wen tell Moses fo go back Pharaoh an throw ashes in da air. Da ashes wen come dus an had land on top all da Egypt guys. Da Egypt guys an dea animals wen get boils all ova from da dus. Still yet, Pharaoh neva let da Israel peopo go.

Jehovah wen sen Moses back to Pharaoh fo tell um, ‘You still no like let my peopo go? Den tomorrow, goin get one huge hail storm on top da land.’ Da nex day, Jehovah wen sen hail, tunda, an fiyah. Wuz da worstes storm Egypt wen eva see! Da trees an crops wuz all poho, but not Goshen side. Pharaoh tell, ‘Try tell Jehovah nuff awready. You guys can go.’ But az soon da hail an da rain wen pau, Pharaoh change his mind again.

Den Moses tell, ‘Now goin get da locust kine grasshoppa bugs dat goin eat all da plants lef ova from da hail storm.’ Den millions of locusts wen eat up eryting dat wuz lef in da fields an on da trees. One moa time Pharaoh wen tell, ‘Try beg Jehovah fo hemo da locusts.’ But even afta Jehovah wen hemo da locusts, still yet Pharaoh neva let da peopo go.

Jehovah wen tell Moses, ‘Put up yoa hand to da sky.’ Right away da sky wen come full on dark. Fo three days, da Egypt guys no could see notting. Ony da Israel guys had light in dea houses.

Pharaoh tell Moses, ‘You an yoa peopo can go. Ony ting, jus leave yoa animals ova hea.’ Moses tell, ‘We gotta take oua animals fo make sacrifice to Jehovah.’ Pharaoh come all huhu. He yell, ‘Get outa hea! Brah, I see you again, I goin kill you.’

Moses wen promise Pharaoh dat he no goin try see um again. But befoa he wen go, he wen tell Pharaoh, ‘Wen turn midnite, da firs kid born from ery ohana in Egypt, from Pharaoh’s boy to da slave guys’ boys, goin mahke.’

Jehovah wen tell da Israel guys fo make one spesho meal. He tell, ‘Kill one one-year-ol boy kine sheep or goat, an put some of da blood on da doorway. Pulehu da meat an eat um wit da bread dat no moa yeast. Be ready fo go. Wea yoa clotheses an put on yoa slippas. Tonite I goin cut you guys loose!’ Can you tink how happy da Israel guys wuz?

Wen midnite had come, Jehovah’s angel wen go ery house in Egypt. In da houses wea neva have blood on top da doorway, da firs kid born wen mahke. But da angel wen pass ova da houses wea had blood. Ery Egypt ohana, rich an pooa, wen lose one of dea kids. But none of da Israel kids wen die.

Even Pharaoh’s own boy wen mahke. Pharaoh no could hando anymoa. Right den an dea, he wen tell Moses an Aaron, ‘Wake up! Go worship yoa God. Take yoa animals an get outa hea!’

Wuz one full moon wen da Israel guys wen hele outa Egypt, an dey wen line up by ohana an tribe. Had 600,000 Israel guys an choke wahine an keiki. Not ony dat, had plenny odda peopo who wen go wit dem fo worship Jehovah too. Finally da Israel guys wuz free!

Fo rememba how Jehovah wen save dem, dey wuz goin have dat same spesho meal ery year. Dey wen call um da Passova.