How Fo Make Shua Dat Technology Not Da Mos Importan Ting

Using technology can eidda be good fo yoa marriage or bad. How it affeck yoa marriage?

• Wat you gotta kno

• Wat you can do

• Wat coupos tell

• Tings fo talk about

Wat you gotta kno

• Technology can be good fo yoa marriage if you use um da right way. Like some husbans an wifes use um fo talk to each odda tru da day wen dey not togedda.

  

  “Jus one text message dat say “I love you” or “I tinking about you” can mean plenny.”—Jonathan.

• If we use technology too much, it can be bad fo oua marriage. Like some peopo always on dea phones or tablets, an dat take away da time dey can spen wit dea odda half.

  “Garenz had some times I wuz using my phone wen my husban probly wanted fo talk to me.”—Julissa.

• Some peopo tell dat dey can lissen good an talk story wit dea odda half an same time use dea phone or tablet. Sherry Turkle, one sociologist, tell peopo no can do dat. Some peopo tink being able fo multitask iz one good ting, but az not. She tell, da moa tings we try fo do same time, da moa worse we do um.”a

  “I like fo talk wit my husban, but not wen he tryin fo multitask. Wen he do dis, it make me feel like he no kea about me.”—Sarah.

Da main ting iz: How you use technology can eidda help or hurt yoa marriage.

Wat you can do

Kno wass mos importan. Da Bible tell, “pick da bestes kine stuff.” (Fo Da Philippi Peopo 1:10) Try tink, “Me an my odda half spen moa time on oua phones den we spen wit each odda?”

“So sad fo see one coupo stuck on dea phones wen dey stay out togedda at one restaurant. We no like kea so much about oua phones an stuff dat we foget about wass moa importan, oua relationship.”—Matthew.

Set Limits. We like be akamai wit oua time. Da Bible tell, “watch out how you guys ack. Be shua you erytime know wat fo do. No make jalike peopo dat donno notting.” (Fo Da Efesus Peopo 5:15, 16) Try tink, “if az not one emergency, I can set one time fo read an reply to messages radda den reply to ery message wen it come tru?”

“Iz betta fo me wen I put my phone on silent an den reply to messages bumbye at one betta time. Cuz mos times one call, text message, or e-mail iz not one emergency dat I gotta ansa right away.”—Jonathan.

If can, leave work at work. Da Bible tell, “Get one time fo eryting.” (Da Teacha 3:⁠1) Ask yoaself, “I let my job affeck da time I spen wit my family cuz I working on my phone at home? If I do dis, how dis affeck my marriage? Wat my odda half would say?”

“Wit technology, we can work any wea at any time. Cuz a dat, I gotta make shua dat wen me an my wife stay togedda, I not checking my phone all da time fo take kea work stuff.”—Matthew.

Talk about how you use technology wit yoa odda half. Da Bible tell, “Mo betta us no try fo do ony da stuff dat us guys like do. Mo betta us do da stuff dat help da odda peopo too.” (1 Fo Da Corint Peopo 10:24) Talk wit yoa odda half about how you guys use yoa phones an stuff an if need fo change tings up. You guys can try use da lis “Tings fo talk about” in dis article fo do dis.

“Me an my husban tell each odda how we really feel, an if we tink one of us using oua phone or tablet too much, we speak up an say someting. Both of us kno dat using oua phones too much can be one problem, so we tink about how da odda person goin feel.”—Danielle.

Da main ting iz: Use technology in one good way, but no let um take ova yoa life.