Jehovah tell Moses: ‘Go come up da mountain. I goin write da Rules on top flat stones an give um to you.’ So Moses wen go up da mountain an stay dea 40 days, day time an nite time. Ova dea, Jehovah had write Da Ten Main Rules on top da two stones an wen give um to Moses.

Afta one long time, da Israel peopo wen tink Moses had leave dem. Dey wen tell Aaron: ‘We like somebody be oua leada. Make one god for show us wea fo go!’ Aaron tell: ‘Bring all yoa gold.’ He melt da gold an make one idol of one bebe bull. Da peopo tell: ‘Dis bebe bull iz oua God who wen bring us outa Egypt!’ Dey had start fo worship da bebe bull, an wen throw one party. You tink wuz wrong fo do dat? Fo shua, cuz da peopo wen promise fo ony worship Jehovah. An now, dey wen broke dea promise.

Jehovah see wat wuz goin on an wen tell Moses: ‘Hurry up! Go back down da mountain cuz da peopo no stay lissening an stay worshipping one idol god!’ So Moses wen go down da mountain real fas wit da two stones.

Wen he come close to da camp, Moses hea da peopo singing. Den he see dem dancing an bowing down to da bebe bull idol. Moses come real huhu. He throw da two flat stones on da groun an wen broke um in pieces. He burn up da bebe bull right den an dea. Den he ask Aaron: ‘How da peopo had presha you fo do dis real bad ting?’ Aaron wen tell: ‘No get mad. You know awready how dis peopo stay. Dey wanted someting fo worship, so I wen throw dea gold inside da fiyah an dis bebe bull idol wen come out!’ Aaron shoulda not done dat. Moses wen go back up da mountain an beg Jehovah fo no stay mad an let da peopo go.

All da guys dat wen lissen to Jehovah he wen let go. You can undastan now how importan wuz fo da peopo lissen to Moses?

Wen Moses wuz on top Mount Sinai, Jehovah wen tell him fo build one spesho tent wea da Israel peopo could worship Him. Wea eva dey wen go, dey could move Da Tent wit dem.

Jehovah had tell Moses: ‘Tell da peopo fo give wat dey can fo help build Da Tent.’ So da Israel peopo wen give gold, silva, bronze, all kine pretty stones, an jewelry. Dey wen even give wool string, linen cloth, animal skins, an plenny odda stuffs. Dey had give so much dat Moses had fo tell dem: ‘Nuff awready! No need bring notting else.’

Had peopo who wen help work on Da Tent dat had plenny skillz. Jehovah had give dem da smarts fo get da job done right. Some of dem wen make da string, make da cloth, or sew some stuffs on um. Odda guys wen work wit da gold, da stones, or carve da wood.

Da peopo wen build Da Tent jalike Jehovah had tell um. Dey wen make one nice big curtain fo make two rooms. One room wuz called Da Spesho Place. In dis room, had da gold stand fo da lamps, one table, an one altar fo burn incense. Da room on da odda side of da curtain wuz called Da Supa Spesho Place. In dis room, had one box made outa koa wood an gold called Da Box Fo Da Promise Wit God. Da Box had help da Israel guys rememba da spesho promise dey wen make fo lissen to Jehovah. Outside Da Tent in da open lanai wuz one huge bronze watta tank an one big altar.

Jehovah wen pick Aaron an his boys fo be da pries in Da Tent. Dey had fo take kea Da Tent an make sacrifices to Jehovah ova dea. Ony Aaron, da main pries, could go inside da Supa Spesho Place. One time ery year, he wen make one sacrifice fo da bad kine stuff dat him, his ohana, an da Israel peopo wen do.

Da Israel peopo wen pau build Da Tent one year afta dey wen leave Egypt. Now dey get one place fo worship Jehovah.

Jehovah wen show dat he wuz happy wit Da Tent an had put one cloud ova um. Az long az da cloud wuz on top Da Tent, da Israel peopo had fo stay wea dey wuz. But wen da cloud had go up, dey wen kno wuz time fo move camp an hele on. Dey would break down Da Tent an follow da cloud.