Afta leading Jehovah’s peopo fo plenny years, Joshua wen mahke at 110 years ol. Da Israel peopo had worship Jehovah da whole time Joshua wuz alive. But afta he wen mahke, dey start fo worship idols jalike da Canaan guys. Cuz da Israel peopo neva like keep lissening him, Jehovah had let da Canaan king Jabin make dea life hahd. Da peopo wen beg fo Jehovah help dem. So Jehovah wen give dem one new leada, Barak. He wuz goin help da peopo go back to Jehovah.

Deborah, one wahine dat talk fo God, wen tell Barak fo come by her. She had someting fo tell him from Jehovah: ‘Go, take 10,000 guys to da Kishon stream fo fight Jabin’s army. Ova dea, you goin be da winnah ova da leada of Jabin’s army, Sisera.’ Barak tell Deborah: ‘If you go wit me, I goin go.’ She tell: ‘K den, fo shua I go wit you. But you not goin be da one fo kill Sisera. Jehovah say goin be one wahine dat goin take him out.’

Deborah wen go wit Barak an his army guys to Mount Tabor fo get ready fo fight. Right wen Sisera hea dis, he wen get togedda his war wagons an army guys in da valley. Deborah tell Barak: ‘Go, cuz today Jehovah goin make you win.’ Barak charge um down da mountain wit his 10,000 guys fo attack Sisera’s strong army.

Den Jehovah wen make da Kishon stream flood. Sisera’s war wagons had get stuck in da mud. Israel’s army wen take down Sisera’s guys, but Sisera ditch his war wagon an get away! He run an go hide in da tent of one wahine named Jael. She wen give him some milk fo drink an put one blanket ova him. Sisera had knock out cuz he wuz real tired. Jael tippy toe to him. Den she go pound one tent stake in his head wit one hammah, an dass how he had mahke.

Barak had come looking fo Sisera. Jael come out her tent an tell: ‘Come inside. I go show you da guy you stay look fo.’ Barak go inside an see Sisera dead ova dea. Barak an Deborah wen sing one song to Jehovah cuz he had make dem win. Da Israel peopo had peace fo da nex 40 years.

Had one time in Israel wen neva have nuff food fo eat. Naomi, one Israel wahine, wen move Moab side wit her husband an dea two boys. Layta on, Naomi’s husband wen mahke. Her two boys wen marry two Moab girls, Ruth an Orpah. Wuz so sad, cuz bumbye, Naomi’s boys wen mahke too.

Wen Naomi had hea dat get food again in Israel, she wen go back. Ruth an Orpah had go wit her. But wen dey wuz on da road, Naomi had tell dem: ‘You wuz good wifes to my boys an good daughtahs to me too. I like you guys go find somebody fo marry again. Go back home Moab.’ Da wahines tell: ‘No ways we goin bag from you! We love you.’ Naomi keep telling dem fo go back home. Den Orpah wen go, but Ruth neva. Naomi tell her: ‘Eh, look! Orpah goin back to her peopo an her gods. Moa betta you do da same ting, an go back home.’ But Ruth tell: ‘I not goin leave you. Yoa peopo, dea goin be my peopo an yoa God, he goin be my God too.’ How you tink Naomi feel wen Ruth had tell her dat?

Ruth an Naomi had get back to Israel right wen wuz da time fo harves da barley. One day, Ruth wen go pick up extra barley in da field of one guy named Boaz, dass Rahab boy. He wen hea dat Ruth wuz from Moab an dat she had stick tight wit Naomi. He tell his worka guys fo leave some extra barley in da field fo Ruth pick up.

Dat night, Naomi ask Ruth: ‘Wat field you wen work in today?’ Ruth tell: ‘Wuz Boaz field.’ Den Naomi had say: ‘You know, Boaz, dass from my husband’s ohana. Good you stay working wit da odda wahines. Nobody goin bodda you ova dea.’

Ruth work in Boaz field until da harves pau. Boaz had see dat Ruth wuz one hahd worka an one awesome wahine. Back den, if one guy mahke an no moa boys, one of his ohana gotta marry da widow. So Boaz wen marry Ruth. Dey had one boy named Obed, an dat wuz goin be King David’s grandpa bumbye. Naomi’s frenz wuz supa happy. Dey tell: ‘Firs, Jehovah give you Ruth, who wen take good kea of you, an now you get one grandkid. We like erybody know, Jehovah you da bestes.’