King Saul’s oldes boy, Jonathan, wuz one warrior an no wuz sked of notting. David tell dat Jonathan wuz moa fas den one eagle an strong like one lion. One day Jonathan an da guy dat carry his weapons wen see 20 Filisha guys on top one hill. He tell his guy: ‘We ony goin attack dem if Jehovah give us one sign. If da Filisha guys tell us fo come up, dat goin be da sign fo attack dem.’ Da Filisha guys yell: ‘Wat, like beef?!’ So da two of dem wen go climb up da hill an kill um all.

Jonathan wuz suppose to be da nex king fo Israel cuz he wuz Saul’s oldes boy. But Jonathan no wuz jealous wen he had find out dat Jehovah pick David fo be da nex king. Jonathan an David come real close frenz. Dey make one promise dat dey always goin proteck an have each odda’s back. Jonathan give David his own robe, sword, bow, an his belt fo show dat he had love him plenny.

Wen Saul wuz hunting David down, Jonathan had go find David an tell: ‘Stay strong an no be sked. Jehovah pick you fo be king. Even my faddah kno dat.’ You like have one good fren like Jonathan?

Had moa den one time wen Jonathan had put his life on da line fo his fren David. He wen kno dat his faddah wanted fo kill David. So he had stand up to his faddah, an tell: ‘Dad, dis not right wat you doing. Why you like kill him? David neva do notting wrong.’ Saul wuz all wild wit Jonathan fo taking David’s side.

Years layta, Saul an Jonathan wen mahke togedda in one battle. Afta Jonathan wen mahke, David go look fo Jonathan’s boy, Mefiboshet. Wen David had find him, he tell Mefiboshet: ‘Me an yoa dad wuz real tight. I goin take kea you fo da res of yoa life. You goin stay wit me inside my palace an eat my house all da time.’ David neva foget his good fren Jonathan.

Afta Saul mahke, David come king wen he wuz 30 years ol. He wuz king fo litto while awready, wen one day he had spock one good looking wahine from da top of his palace roof. David find out dat she wuz one married lady named Batsheba. Her husband wuz one army guy named Uriah. Still yet, David had Batsheba come up to his palace. Dey had sex togedda an she come hapai. David try fo hide wat he wen do. How he do dat? He wen get Uriah killed in battle. He tell his army general fo put Uriah in da fron lines, an den make da res of da guys back off. Afta Uriah had mahke, David wen go marry Batsheba.

But Jehovah wen see all da bad tings dat had happen. So wat he goin do now? Jehovah had his prophet Nathan go talk to David. Nathan tell: ‘One rich guy had choke sheep, an one pooa guy had ony one small bebe sheep dat he wen love plenny. Da rich guy wen steal da pooa guy’s ony bebe sheep.’ David wuz all wild an tell: ‘Dat rich guy gotta mahke!’ Den Nathan tell David: ‘Dat rich guy iz you!’ Dat had cut David deep an he tell Nathan: ‘I had mess up real bad. I wen sin agains Jehovah.’ Dis sin wen bring all kine problems on David an his ohana. Jehovah punish David, but had let him live cuz he wen fess up an tell dat he wuz wrong.

David had like build Jehovah’s tempo, but Jehovah wen choose David’s boy Solomon fo build um. David help get tings ready fo Solomon an tell his guys: ‘Jehovah’s tempo gotta be da bestes in da world. Solomon still one young boy, but I goin help by getting stuff ready fo him.’ David help wit da building work by giving plenny money from his own pocket. He find guys dat had kno how fo do all kine stuff. He give plenny gold an silva, an even wen bring in cedar wood from Tyre an Sidon. Wen he wuz ol an ready fo mahke, David wen hand ova da building plans fo da tempo to his boy Solomon. He tell: ‘Jehovah had me write dese plans down fo you. He goin kokua you so no be sked. Be strong an go work.’