References fo Live, Preach an Teach Meeting Workbook

© 2025 Watch Tower Bible and Tract Society of Pennsylvania

NOVEMBA 3-9

TREASURES FROM DA BIBLE DA LOVE SONG 1-2

One Story About Tru Love

w15 1/15 30 ¶9-10-mwbr

Can Have Tru Love?

⁹ Marriage iz not jus one deal peopo make fo stick togedda but dey no moa love fo each odda. Da main ting you see in one Christian marriage iz love. But wat kine love? Iz it da kine love you show cuz of Bible truts? (1 From John 4:8) Or da same kine love you show yoa ohana? Or da kine love dat real frenz show each odda? (John 11:3) Iz it romantic love? (Smart Guys 5:​15-20) Fo have tru love, one marriage gotta have all dese tings. You can feel love da mos wen somebody show um to you. Az supa importan fo husbans an wifes no get so busy dat dey stop showing love fo each odda ery day. Wen you show love lidis, dat can make yoa marriage happy an solid. In some cultures wea da marriage stay set up an dey donno each odda, da coupo gotta rememba fo tell dey love each odda. Dat goin make dea love grow an dea marriage moa strong.

¹⁰ Get anodda reason az good fo one coupo show love to each odda. King Solomon wanted fo make da Shulam wahine “gold earrings, wit silva kine bead.” He wen tell her plenny nice tings, dat she beautiful jalike da moon an da sun. (Love Song 1:​9-11; 6:10) But even tho Solomon wen do all dat, she wen stick wit her shepherd guy. Wen dey wuz apart, wat wen help her stay strong? She tell us dat she wen rememba how da shepherd guy wen show his love. (Read Da Love Song 1:2, 3, NWT) Fo her, dat wuz “moa betta den wine,” an wen she tink about him dat wen make her feel good like “perfume kine oil.” (Songs 23:5; 104:15) Jalike da Shulam wahine, good memories can help yoa love fo stay strong. Iz supa importan fo one husban an wife show love fo each odda all da time!

Good Kine Tings

w24.05 29 ¶10-11

How Dating Can Help Fo Make One Akamai Choice

¹⁰ Wat one coupo can do fo keep dea relationship pono? Wen yoa feelings grow, az ony natural fo feel moa attracted to each odda. Wat can help you fo no do anyting Jehovah no like? (1 Cor 6:18) Stay away from talking about tings Jehovah no like, no be alone togedda, an no drink plenny. (Efe 5:3) Dese tings can make you like have sex an make um supa hard fo do wass right. So would be akamai fo talk on da regula about wat kine tings you guys can do fo keep yoa relationship pono. (Read um Smart Guys 22:3.) Try look wat wen help Dawit an Almaz from Etiopia. Dey tell, “We would spen time togedda in places wea had plenny peopo o we would cruz wit odda frenz. We was neva by ouaself in one car o house. Cuz we wen do dat, we wen proteck ouaselfs from doing someting wrong.”

¹¹ Wat about showing yoa feelings fo each odda? Some ways might be okay az yoa feelings fo each odda grow. But if dis going make you like have sex, den going be hard fo tink right an make one akamai choice about da odda person. (Love Song 1:2; 2:⁠6) An wen you show yoa feelings can be easy fo lose control an do someting Jehovah no like. (Smart Guys 6:27) So den, wen you firs start dating, talk about wat you guys can an no can do an how dat line up wit Bible truts.a (1 Tess 4:3-7) Az one coupo, ask yoaselfs, “Wat odda peopo would tink about da stuff we do fo show oua feelings az one coupo? Could dese tings make eidda of us like have sex?”

NOVEMBA 10-16

TREASURES FROM DA BIBLE DA LOVE SONG 3-5

Az Importan Fo Be Beautiful On Da Inside

w15 1/15 30 ¶8-mwbr

Can Have Tru Love?

⁸ Da song neva jus talk about looking good on da outside. Try look wat da shepherd wen tell about da way da Shulam wahine talk. (Read Da Love Song 4:7, 11.) He tell her lips “stay sweet like pure honey.” How come? Cuz pure honey, da kine dat come strait from da hive, stay moa sweet an taste moa betta. He tell dat her “tongue iz like milk an honey,” cuz da way she talk make you feel good. Wen da shepherd tell da girl dat eryting about her stay beautiful an “no mo notting . . . bad bout” her, he tinking bout moa den jus her looks.

w00 11/1 11 ¶17-mwbr

Tinking About Sex Da Way God Does

¹⁷ Anodda person dat wen stay solid wuz da Shulam wahine. She wuz young an pretty, an so one shepherd guy an da rich king fo Israel, Solomon, wen get feelings fo her. Tru da whole story in Da Love Song, da Shulam wahine neva fool aroun, an cuz of dat plenny peopo wen respeck her. Even tho she wen shut him down, Solomon still wanted fo write down her story. An her shepherd guy had plenny respeck fo her cuz of da way she wen ack. He even wen tell dat she wuz like “one garden dat stay all lock up.” (Da Love Song 4:12) Back den in Israel, beautiful gardens had all kine vegetables, nice smelling flowas, an big trees. Plenny times dose kine gardens had one hedge or wall aroun um an da ony way fo get in wuz tru one lock gate. (Isaiah 5:5) Cuz da Shulam wahine wuz beautiful an she neva like fool aroun, to da shepherd, she wuz like one garden dass one of a kind. She wanted fo wait an show dat kine love ony to her future husban.

g04 12/22 9 ¶2-5-mwbr

Az Moa Betta Fo Be Beautiful On Da Inside

Iz good fo be beautiful on da inside? Georgina, who been married fo almos ten years tell, “Ova da years, wat wen make me feel moa close to my husban iz how honest an real he stay wit me. Da numba one ting in his life iz fo make God happy. An cuz of dat, he always love an kea fo me. He tink about me wen he make decisions an make me feel like he tankful fo wat I do. I kno dat he really loves me.”

Daniel, who been married since 1987 tell, “My wife iz beautiful to me. She no ony look good, but da way she ack make me love her even moa. She always tink about oddas an she look fo ways fo make peopo happy. She one unreal Christian. Cuz of dis, I love bein aroun her.”

Plenny peopo in da world ony look on da outside, but we gotta look pas dat. We gotta undastan az real hahd fo look “perfeck,” an in da end no mean notting. But we can get qualities dat make us beautiful on da inside. Da Bible tell, “Get wahines dat talk nice to you, but az all bulai. Get wahines, dey good looking, but fo ony short time. Da kine wahine dat stay sked fo no do wat Da One In Charge tell . . . erybody tell good tings bout her.” On da flip side, anodda scripcha tell, “Wase time, fo put gold nose ring on one pig. Same ting, fo one good looking wahine dat no like learn wass good kine an wass bad kine, her wase time!”—Smart Guys 11:22; 31:30.

Da Bible help us fo see “yoa good looks gotta come from da inside, an dis stuff goin las foeva.” An “dat kine worth plenny” to God. (1 Peter 3:4) Fo shua, looking good on da inside iz moa betta den looking good on da outside. An dass someting all us can do.

Good Kine Tings

mwb16.11 8, Box-mwbr

Iz Good Fo Copy Da Shulam Wahine

Wat wen make her one solid exampo fo copy?

2:7; 4:12

• She wuz akamai an wen wait fo tru love

• She neva let odda peopo presha her fo get feelings fo jus anybody

• She wuz humbo, wen kno her limits, an she neva fool aroun

• She neva let gold, gifs, or nice kine words win her ova

Try tink:

“Wat I can do fo copy da Shulam wahine moa betta?”

NOVEMBA 17-23

TREASURES FROM DA BIBLE DA LOVE SONG 6-8

Be Strong Like One Wall An No Be One Door

w15 1/15 32 ¶15-16-mwbr

Can Have Tru Love?

¹⁵ Read um Da Love Song 4:12. How come da shepherd tell dat da Shulam wahine stay jus like “one garden dat stay all lock up”? One garden wit one wall or fence aroun um no stay open to erybody. Ony can get in tru da lock gate. Da Shulam wahine wuz like dat garden cuz she wuz ony goin give her love to da one she wuz goin marry, da shepherd guy. Da king wen try hahd fo win her ova, but cuz she neva give in, she wuz like “one wall” an not “one door” dat swing open fo anybody. (Love Song 8:​8-10) Az da same fo single braddahs an sistahs who save dea love fo da one dey goin marry.

¹⁶ Wen da shepherd guy wen ask da Shulam wahine fo go cruz wit him on one walk, her braddahs neva let her go. Dey wen make her work in da grape farm. How come? Dey neva trus her? Dey wen tink she wuz goin fool aroun? No, dey wanted fo make shua she neva have da chance fo do someting bad. (Love Song 1:6; 2:​10-15) Dis someting good fo single Christians rememba: Wen you dating, make shua you do eryting can fo keep tings pono. No go places wea you guys by yoaself. Even tho get ways dass okay fo show yoa love fo each odda, make shua fo no give yoaself da chance fo do someting bad.

yp 188 ¶2-mwbr

Wat About Sex Befoa Marriage?

Not having sex befoa you married no jus proteck you from mayjah problems. Da Bible talk about one young wahine dat wen hold back even tho she wen love her boyfren plenny. An cuz of dat, she wuz proud fo tell, “I strong jalike one wall, an my breases stay jalike towas.” She no wuz one door dass easy fo open unda presha. She wen stan strong like one wall you no can climb an towas you no can get to! She wen deserve fo be called “perfeck one” an she could say fo her future husban, “Da way da guy I love tink bout me . . . eryting stay good!” Cuz she wen feel good inside about waiting, dat wen help dem fo be happy togedda.—Da Love Song 6:9, 10; 8:9, 10.

yp2 33-mwbr

Copy Da Shulam Wahine

Da young Shulam wahine wen kno she gotta tink strait wen come to loving somebody. She wen tell her frenz “I like you make one promise to me,” no make me “come real excited fo make love till da time stay right.” Da Shulam wahine wen kno wuz easy fo feelings jam up her tinking. Fo exampo, she wen see dat oddas could presha her fo go wit somebody dat no stay right fo her. An her feelings could make her no tink strait. So da Shulam wahine wen stay solid like “one wall.”—Da Love Song 8:4, 10.

Yoa tinking stay solid like da Shulam wahine wen come to love? You can make one good choice witout letting yoa feelings get in da way? (Smart Guys 2:10, 11) Sometimes oddas can try fo presha you fo be wit somebody befoa you stay ready Can even presha yoaself. Fo exampo, wen you see one guy an one girl holding hands, dat make you want somebody real bad too? Would you choose jus anybody even if dey no worship Jehovah? Da Shulam wahines tinking wuz solid wen come to love, an you can be like her!

Good Kine Tings

w23.05 20-21 ¶1, extra info

Keep “Da Flame Of Jah” Strong?

¹ “LOVE stay jalike one strong fire, da flame of Jah.” An “plenny watta no can pio love. Da rivas no can wash um away.”b (Love Song 8:6, 7, NWT) Dass one nice way fo tink about true love, no? Dese scripchas tell one importan trut fo married peopo. You can have one strong love fo each odda.

NOVEMBA 24-30

TREASURES FROM DA BIBLE ISAIAH 1-2

Get Chance Fo Da Guys Dat Wen Do Bad Kine Stuff

ip-1 14 ¶8-mwbr

One Faddah An His Rotten Kids

⁸ Isaiah had some strong words fo da Judah peopo. “Goin get trouble fo da nation dat do plenny bad kine stuff, Da bad stuff dey do pile up an come heavy, Dey come from pilau faddahs, dey rotten kids! Dey wen bag from Jehovah, Dey no show respeck fo da Holy God of Israel, Dey wen turn dea back on him. (Isaiah 1:​4, NWT) Da bad kine stuff somebody do can pile up an come supa heavy. In Abraham’s time Jehovah wen tell da sins of Sodom an Gomorrah wen pile up plenny an wuz real horraz. (Da Start 18:20) An Jehovah wen tell “dey come from pilau faddahs, dey rotten kids.” Da Judah peopo stay like wild kids. Dey wen “turn dea back,” or like anodda translation tell, dey “wen full on cut da line” wit dea Faddah Jehovah.

w24.08 9 ¶6

Jehovah Like Erybody Fo Come Sorry

⁶ Plenny times Jehovah wen use his prophets fo warn an correck his peopo. God wen tell Jeremiah fo say to da Israel peopo, “Go come back by me, you Israel peopo dat wen tell “Laytas” to me. I no goin give you guys stink eye no moa. Cuz I like give you guys chance, I no goin stay huhu all da time . . . You gotta tell wat you wen do az wrong, an dat you guys wen go agains me, yoa God.” (Jer 3:12, 13) Jehovah wen tell Joel fo say to da peopo, “Change how you feel inside . . . Go come back to yoa God.” (Joel 2:​12, 13) He had Isaiah tell, “Go come clean inside! Throw out all da bad kine stuff you stay do. No do wass wrong no moa.” (Isa 1:16-19, NWT.) An Jehovah wen use Ezekiel fo ask, “You guys tink I stay good inside wen somebody dat do bad kine stuff get cut off from me, o wat?! . . . [I] stay good inside wen dey walk away from da way dey wen live befo time . . . throw out da bad kine stuff an get da real kine life!” (Eze 18:23, 32) Jehovah stay real happy fo see peopo come sorry cuz he like dem live foeva. But Jehovah no jus wait fo somebody change befoa he try help dem. We go look some exampos.

Good Kine Tings

mwb16.12 3-mwbr

Go Up Da Hill Wea Da Temple Fo Jehovah Stay

Isaiah 2:2, 3

“Wen da world almos pau”

• Da time we stay live now

“Da hill wea da Temple Fo [Jehovah] stay”

• Jehovah’s way fo worship iz da bes

“All da peopo from odda countries goin come dea”

• Da peopo dat worship da right way come togedda

“Come on. We go up da hill wea da Temple stay . . . fo [Jehovah]”

• Peopo dat worship da right way tell oddas fo come wit dem

“He goin teach us guys wat he like us fo do, an we goin do um”

• Jehovah use da Bible fo teach us an help us do da tings he like

DECEMBA 1-7

TREASURES FROM DA BIBLE ISAIAH 3-5

Jehovah Had Da Right Fo Expeck Moa

w06 6/15 17 ¶1-mwbr

Take Kea Yoa Grape Plant!

¹ Fo make plenny wine Israel farmers had fo take good kea of dea vines. Da book of Isaiah wen tell how one Israel grape farmer would dig up land on one hillside an hemo any big rocks befoa he plant “good kine grape plants.” Den he probly goin build one wall wit da rocks he wen dig up. Dis wall wuz goin block his grapes from getting run ova by cows an proteck um from foxes, wild boars, an thiefs. He might make one winepress an build one small towa fo proteck da grapes an keep um cool wen dey harves um. Afta all dis prep work, he could expeck fo harves plenny good grapes!—Isaiah 5:1, 2.

ip-1 76 ¶8-9-mwbr

Bummahs Fo Da Good Fo Notting Grapes!

⁸ Isaiah call Jehovah, da owner of da grape field, “da one I get love an aloha fo.” (Isaiah 5:1) Isaiah wen talk about God like dat cuz he wuz real tight wit Him. (Check out Job 29:4; Songs Fo God 25:14.) But Isaiah’s love fo God no wuz even close to da love God wen show his “grape field,” da Israel peopo.—Check out Outa Egypt 15:17; Songs Fo God 80:8, 9.

⁹ Jehovah wen plant his peopo in da Canaan land an wen give dem rules. Dis wen proteck dem like one wall so dey no come pilau like da peopo aroun um. (Oua Egypt 19:5, 6; Songs Fo God 147:19, 20; Fo Da Efesus Peopo 2:14) Anodda ting Jehovah wen do wuz give dem judges, prieses, an prophets fo teach dem. (2 Kings 17:13; Malakai 2:7; Jesus Guys 13:20) Wen armies wanted fo attack Israel, Jehovah wen give guys fo save dem. (Fo Da Hebrew Peopo 11:32, 33) So make sense dat Jehovah wen tell, “Tell me wat odda ting I gotta do fo my grape field, dat I neva do befo time?”

w06 6/15 18 ¶1-mwbr

Take Kea Yoa Grape Plant!

Isaiah wen tell “da Israel peopo” wuz jalike one grape field dat wen grow ony wild kine grapes, or “real sour kine grapes.” (Isaiah 5:2, 7) Dese kine grapes wuz junk cuz wuz small, an almos all seed. You no can make wine wit um an no can eat um, so wuz good fo notting. Dis wen rep da Israel peopo cuz dey wen break da rules an neva lissen Jehovah, dey wuz good fo notting. Dey neva come out junk cuz of da one who wen plant um. Jehovah wen do eryting can fo make dem turn out good. Jehovah wen tell, “Wat odda ting I gotta do fo my grape field, dat I neva do befo time?”—Isaiah 5:4.

w06 6/15 18 ¶2-mwbr

Take Kea Yoa Grape Plant!

Cuz Israel wuz like da grape plant dat neva grow good, Jehovah wen tell he wuz goin broke down da wall dat wen proteck dem. He no wuz goin take kea his plant or da land anymoa. No wuz goin get rain on da field, an weeds an thorn bushes wuz goin take ova da grape field.—Isaiah 5:5, 6.

Good Kine Tings

w24.03 22 ¶10

Stay Away From Da Dark, Keep Living In Da Light

¹⁰ Satan’s world try fo bulai us an make us tink dat wat stay pilau to Jehovah is okay fo do. (2 Pet 2:19) Dis no shock us. Fo long time Satan try trick peopo so dey no can figga wat stay right an wrong. (Isa 5:20; 2 Cor 4:4) Make sense why plenny movies, tv shows, an websites stay pilau. Satan bulai us fo try make us tink dat living pilau no ony stay okay but az good fun an notting bad going happen.—Read um Fo Da Efesus Peopo 5:6.

DECEMBA 8-14

TREASURES FROM DA BIBLE ISAIAH 6-8

“I Can Go, Sen Me”!

w17.04 29 ¶5-mwbr

You Can Make Jehovah Look Good Wen You Like Help Out!

⁵ Jehovah wen ask Isaiah da prophet fo talk fo Him, dis had show dat He like use faitful guys fo make His plan happen. (Isa 6:​8-10) Isaiah wen like do um an wen go. Same ting today, choke peopo stay telling, “I can go, sen me,” an dey ready fo work fo Jehovah even if da work no stay easy. Still yet we can tink, “Da stuff I do matta? Iz real nice dat Jehovah let us work fo him, but no matta if I help or not, Jehovah goin get um done anywayz yeah?” Try look wat wen happen Deborah an Barak’s time fo ansa dese questions.

ip-1 95 ¶15-16-mwbr

Jehovah God Stay In His Temple

¹⁵ Jehovah tell Isaiah wat fo say to da peopo an how dey goin reack: “Go den. Tell da peopo dis: ‘Lissen plenny, but you no goin undastan notting! Look plenny, but you no goin learn notting!’ Make dem so dey no can tink good, make dem so dey no can hear good, an shut dea eyes so no can see good. I no like fo dem see wass happening, I no like fo dem start fo lissen, an fo tink good. Cuz if dey wen change, den dey goin come good. But dey no goin change.” (Isaiah 6:9, 10) Dis mean dat Isaiah goin tell um off an push dem away from Jehovah? No ways! Isaiah kea plenny fo his peopo. But Jehovah wen tell um how da peopo goin ack no matta how good he do his job.

¹⁶ Can ony blame da peopo. Isaiah goin talk to dem plenny, but dey still not goin like lissen or undastan notting. Mos of dem goin be hahd head, jus like dey deaf an blind. By goin back to dem ova an ova, Isaiah let da peopo show proof dat dey no like change an no like lissen to God’s message fo dem. Same ting wit peopo today! Plenny peopo no like lissen wen Witnesses fo Jehovah preach to dem bout God’s govament.

ip-1 99 ¶23-mwbr

Jehovah God Stay in His Temple

²³ Jesus wen use Isaiah’s words fo show dat paht of da prophecy wuz goin come tru in his day. Da peopo’s attitude wuz da same jus like Isaiah’s time. Dey wen make deaf ear an wuz blind to da message, an cuz of dat had get wipe out. (Matthew 23:35-38; 24:1, 2) Dis wen happen wen da Rome army unda General Titus wen go agains Jerusalem in 70 C.E., an dey wen smash da city an da temple. But some had lissen to Jesus an wen come his followas. Jesus sed dese guys wuz goin be happy (Matthew 13:16-23, 51) He had tell dem fo “run to da mountains” wen dey wen see “Jerusalem town wit da army guys all aroun.” (Luke 21:20-22) So da peopo dat wen show fait an trus wen come da spiritual nation, da Israel fo God. Dese peopo wen get save.—Fo Da Galatia Peopo 6:16.

Good Kine Tings

w06 12/1 9 ¶4

Highlights From Da Book Of Isaiah—I

7:3, 4—How come Jehovah wen save pilau King Ahaz? Da kings from Syria an Israel wen plan fo take King Ahaz from Judah off da throne an put in one rula dey could control. Dey wanted fo put in Tabeel boy, one guy who no wuz from David’s ohana. Dis pilau plan wuz goin jam up da deal Jehovah wen make wit David, dat all da kings goin come from his ohana. Jehovah wen save Ahaz fo make shua dat da “Rula of Peace” wuz goin come from David’s bloodline.—Isaiah 9:6, NWT.

DECEMBA 15-21

TREASURES FROM DA BIBLE ISAIAH 9-10

Prophecy About “One Big Light”

w11 8/15 10-11 ¶13-mwbr

Dey Wen Wait Fo Da Messiah

¹³ Da prophet’s wen tell dat da Messiah wuz goin preach in Galilee. Isaiah wen tell dat da peopo “Zebulun an Naftali side . . . da peopo inside Galilee . . . stay walk aroun inside one dark place, dey goin know wat fo do, cuz jalike dey see one big light . . . da light stay come dea awready.” (Isa 9:1, 2) Jesus wen start fo preach in Galilee, an wen live in Capernaum, wea he wen share da spiritual light wit plenny peopo from Zebulun an Naftali. (Mat 4:12-16) Galilee wuz wea Jesus wen give his famous talk on da mountain, choose his aposals, an wen do his firs miracle. An Galilee wuz probly wea 500 of his followas wen see him afta he wen come back to life. (Mat 5:1–7:27; 28:16-20; Mark 3:13, 14; John 2:8-11; 1 Cor 15:6) Isaiah’s prophecy had come tru cuz he wen preach to da peopo “Zebulun an Naftali side”. Of course, Jesus wen preach all ova Israel too.

w01 7/15 14-15 ¶19-20-mwbr

Stay Happy In Da Harves

¹⁹ Had plenny reasons fo be happy wen Jesus wuz preaching an even afta dat. Plenny peopo wen lissen to da good kine tings. Had one big reason fo be happy at Pentecos 33 C.E., cuz bout 3,000 guys wen lissen to Peter, got Jehovah’s spesho spirit, an wen come part of spiritual Israel. Da numbas kept getting bigga, an dey wuz stoked cuz “ery day [Jehovah] bring odda peopo aroun dat he take outa da bad kine stuff dey do.”—Jesus Guys 2:​37-41, 46, 47; Fo Da Galatia Peopo 6:16; 1 From Peter 2:9.

²⁰ Dat time, Isaiah’s prophecy wen come tru: “God, you goin make da Israel peopo come mo plenny peopo. You goin make da peopo come real good inside. Dey goin dance an sing in front you, jalike wen da peopo harves da food inside dea fields an dey stay good inside . . . an give dea frenz some a da stuff.” (Isaiah 9:3) Even tho mos of da guys goin heaven awready wen get pick, we stay happy cuz da numba of odda harves workas stay getting bigga ery year.—Songs 4:7; Zekariah 8:23; John 10:⁠16.

ip-1 128-129 ¶20-21-mwbr

One Promise Fo One Rula Of Peace

²⁰ Da tings da Messiah do goin las foeva, like Isaiah’s words tell: “Cuz you wen broke da heavy yoke dey wen carry, da stick da master use fo whack dea shoulders, jus like wen happen befoa to da Midian peopo.” (Isaiah 9:4, NWT) Hundreds of years befoa Isaiah’s time, da Midian & Moab peopo wen make one plan fo get da Israel peopo go agains God. (Census 25:1-9, 14-18; 31:15, 16) Layta, da Midian peopo wen attack da small towns an farms of da Israel peopo an had take all dea food an animals. Dis wen on fo seven years. (Judges 6:1-6) Den Jehovah wen use Gideon fo beat da Midian army. Afta dat day, da Bible no tell dat da Midian peopo eva wen make trouble to Jehovah’s peopo again. (Local Leadas 6:7-16; 8:28) Pretty soon, Jesus Christ, jus like Gideon, goin wipe out all da guys dat go agains Jehovah’s peopo. (Jesus Show 17:14; 19:11-21) Jus like Jehovah wen do to da Midian peopo, he goin use his powa fo win ova his enemies foeva. (Local Leadas 7:2-22) Nobody goin give God’s peopo hahd time eva again!

²¹ Jus cuz Jehovah use his powa fo win, dat no mean he like war. Jesus, da “Rula of Peace”, goin wipe out his enemies an goin bring peace dat goin las foeva. Isaiah tell dat all da army gear goin get burn up: “Fo shua, all da boots da army guys wear wen dey fight, an all da clotheses dat get blood all ova um, dey goin throw all dat kine stuff on top da fire fo burn um up.” (Isaiah 9:5) Neva goin hear da boots from da army guys marching again. An neva goin see dea uniforms wit blood on top um. No goin get war no moa!—Songs Fo God 46:9.

Good Kine Tings

mwb19.12 5, Box-mwbr

God’s War Goin End All Wars

Jesus Show 19:11, 14-16, 19-21

How come Jehovah, da God dat “get plenny love an aloha,” tell his Boy, da “Rula of Peace”, fo fight one war?—2 Cor 13:11; Isa 9:6.

• Jehovah an Jesus love wass right an hate wass bad

• Gotta hemo da bad kine peopo fo tings be fair an get peace dat las foeva

• God’s army in heaven “erytime do wass right” wen dey “fight one war”, az why dey wea fancy linen clothes dat stay white an clean, an ride white horses

Wat we gotta do fo make um tru God’s war?—Zef 2:3

DECEMBA 22-28

TREASURES FROM DA BIBLE ISAIAH 11-13

Wat Da Messiah Wuz Goin Be Like?

w11 4/1 4 ¶6

Wea Jesus Wen Come From

⁶ Long time befoa had happen, da Bible wen tell da Messiah wuz goin be one “Nazaret guy.” Da Bible writa Matthew wen tell dat Jesus ohana wen “make house Nazaret town. Dis happen jalike da guys dat talk fo God long time befo time wen tell, “Dey goin call him ‘da Nazaret guy.’” (Matthew 2:​19-23) Seem like in Hebrew da name Nazaret mean “new branch”. Matthew wuz talking about Isaiah’s prophecy dat wen call da Messiah “one new branch” dat wuz goin come from Jesse. Dat mean dat da Messiah wuz from da bloodline of Jesse, da faddah of King David. (Isaiah 11:⁠1) We kno fo shua, dat Jesus wen come from Jesse bloodline tru David.—Matthew 1:​6,16; Luke 3:​23, 31, 32.

ip-1 159 ¶6-mwbr

Wen Da Messiah Rule, Peopo Goin Get Save An Be Happy

⁶ Wat kine rula da Messiah goin be? He goin be like da wild Assyria king who wen smash da ten tribes of Israel? No ways! Isaiah wen tell about da Messiah, “Da Spirit from Da One In Charge goin stay in charge a dat guy. Dat Spirit from Da One In Charge goin make him know wat fo do erytime, an make him undastan plenny stuff. Dat Spirit goin make him know wass good fo him do ery time, an give him plenny powa. Dat Spirit goin help him know plenny stuff, an get choke respeck fo Da One In Charge. Cuz he get dat kine respeck fo Da One In Charge, He goin feel good inside wen he do wat God tell um fo do. He da judge, He no goin ony look o lissen how peopo talk, an den make up his mind.” (Isaiah 11:2, 3a) Da Messiah no wuz anointed wit oil, but wit God’s spesho spirit. Dis happen wen John da Baptiza wen baptize Jesus. He wen see God’s spesho spirit show up az one dove come on top Jesus. (Luke 3:22) We see proof dat Jesus had God’s spirit cuz he kno wat fo do, he undastan plenny, an he get da powa fo be one awesome rula!

w23.06 15 ¶5

Why We Gotta Respeck Jehovah?

⁵ Somebody who respeck Jehovah love him an no like do nottin fo hurt him o jam anytin up wit him. Jesus all da time wen show God respeck. (Heb 5:7) Jesus no wuz sked of Jehovah. (Isa 11:2, 3) He had plenny respeck fo him an wanted fo lissen wat he tell. (John 14:21, 31) Jalike Jesus, we respeck Jehovah plenny cuz he get love an aloha, he smart, he always do da right ting, an he get all da powa. We know dat Jehovah get plenny love an aloha fo us an we can make him happy wen we lissen, o hurt him wen we no lissen.—Songs 78:41; Smart Guys 27:11.

ip-1 160 ¶9-mwbr

Wen Da Messiah Rule, Peopo Goin Get Save An Be Happy

⁹ Isaiah wen tell moa about how da Messiah goin be, “Cuz he get dat kine respeck fo Da One In Charge, he goin feel good inside wen he do wat God tell um fo do. He da judge, he no goin ony look o lissen how peopo talk, an den make up his mind.” (Isaiah 11:3b) If you had fo go court, you like have one judge lidat, aah? Wen Jesus judge erybody, he no goin lissen to bulais, rumors, or ony look da tings you can see, like how much money you get. Jesus can see how we stay on “da inside.” (1 From Peter 3:4) Da braddahs dat gotta judge tings in da hui can copy Jesus unreal exampo.—1 Fo Da Corint Peopo 6:1-4.

ip-1 161 ¶11-mwbr

Wen Da Messiah Rule, Peopo Goin Get Save An Be Happy

¹¹ Jesus stay one awesome exampo fo Christian eldas cuz wen his followas needed fo get correckted, he wen do um in da bes way fo dem. But he no goin let da guys dat keep doin bad tings get away wit it. Wen time fo judge erybody, da Messiah goin “smash” all da pilau peopo.” (Songs Fo God 2:9; check out Jesus Show 19:15.) Afta dat nobody goin jam up da peace. (Songs Fo God 37:​10, 11) Jesus, wit his sword tie aroun his wais, get da powa fo do dis.—Songs Fo God 45:3-7.

Good Kine Tings

w25.05 30 ¶15

Wat Jehovah’s Name Should Mean To Us

¹⁶ We gotta keep calling on Jehovah’s name. (Joel 2:32, NWT; Rome 10:13, 14, NWT.) Fo call on Jehovah’s name mean moa den jus knowing his name an using um. We really gotta kno Jehovah an da kine God him so dat we can trus him, an go to him fo help us kno da bes way fo live. (Songs 20:7; 99:6; 116:4; 145:18) Anodda way fo call on Jehovah’s name iz fo help peopo learn about his name an da kine God he iz, so dey can make changes in dea life an make him happy.—Isa 12:4; Jesus Guys 2:21, 38

DECEMBA 29-JANUARY 4

TREASURES FROM DA BIBLE ISAIAH 14-16

Jehovah Buss Up Da Guys Dat Go Agains His Peopo

ip-1 180 ¶16-mwbr

Jehovah Make One High Makamaka City Come One Rock Pile

¹⁶ Dis neva happen right away in 539 B.C.E. But today ony easy fo see dat eryting Isaiah wen tell bout Babylon had come tru. One guy who write about da Bible wen tell dat “ no moa notting dea fo hundreds of years now, ony piles of rocks.” Den he tell, “Wen you see all dis, no can help but tink dat eryting Isaiah an Jeremiah had say wen all come true.” Fo shua nobody in Isaiah’s day could predict dat Babylon wuz goin loose dea powa an come full on wipe out. Isaiah wen write dis down 200 years befoa da Medes an Persians had take ova Babylon! An dey neva come one pile of rocks till hundreds of years layta. Dis make oua fait moa strong dat da Bible really come from God. (2 Timoty 3:16) Cuz Jehovah wen make prophecies come tru befoa time, we kno fo shua dat prophecies dat neva happen yet goin come tru.

ip-1 184 ¶24-mwbr

Jehovah Make One High Makamaka City Come One Rock Pile

²⁴ Da Bible call da kings dat come from David’s bloodline “stars.” (Census 24:17) From David on, dose “stars” had rule from Mount Zion. Afta Solomon wen build da temple in Jerusalem, weneva dey use da name Zion, dey talking bout da whole city. Da rules from Moses wen tell dat all da men in Israel gotta go Zion three times a year. Az why had get called “da mountain wea dey meet.” Nebukadnezzar wanted fo control da Judah kings an den take dem away from dat mountain. Dat show he wanted fo put himself above dose “stars.” He neva give Jehovah da credit fo his win an wen take all da credit fo himself.

ip-1 189 ¶1-mwbr

Jehovah Tell Da Nations Wat Goin Happen To Dem

JEHOVAH can use odda nations fo teach his peopo one lesson. But dat no mean dey get excuse fo make any kine to his peopo an no show respeck fo da right way fo worship. Cuz of dat, Jehovah wen tell Isaiah way befoa fo write wat “goin happen to Babylon.” (Isaiah 13:1) But Babylon wuz goin make trouble bumbye. Wen Isaiah wuz alive, Assyria wuz da one giving God’s peopo hahd time. Assyria wen wipe out da ten tribes an mos of da two tribes. But Assyria’s win neva las. Isaiah write, “Da One In Charge, Da God Ova All Da Armies, awready make dis promise, “I wen plan um lidis, dass how goin be . . . Wen da Assyria guys come inside my land, I goin smash um an step all ova um on top my mountain. Dey goin try fo put da yoke on top dem, but no goin stay. Dey goin try fo make my peopo carry one heavy load on top dea back, but I goin take da load off from dea.’” (Isaiah 14:​24, 25) Not long afta Isaiah wen tell dis prophecy, Assyria no wuz one problem fo Judah anymoa.

ip-1 194 ¶12-mwbr

Jehovah Tell Da Nations Wat Goin Happen To Dem

¹² Wen dis prophecy goin come tru? Pretty soon. “Dass wat Da One In Charge wen tell bout da Moab peopo long time befo time. An now Da One In Charge tell dis too: “Da Moab peopo, get choke plenny a dem, an dey awesome. But ony three year from today, jalike da day one work contrack pau, nobody goin tink da Moab peopo stay awesome. Cuz dat time, ony goin get litto bit Moab peopo inside dea . . . Da ones dat stay back, dey no can do notting cuz dey no mo powa.” (Isaiah 16:13, 14) Jus like da scripcha tell, get proof guys wen dig up fo show dat in da eighth century B.C.E. Moab wen suffa plenny an ony had litto bit peopo living dea. Tiglat-Pileser III wen say dat Salamanu from Moab wuz one of da kings dat wen pay tribute to him. Anodda king fo Moab, Kammusunadbi wen give one tribute to Sennakerib. Assyria rulas Esar-haddon an Ashurbanipal wen tell dat dey wen rule ova da Moab Kings Musuri an Kamashaltu. Hundreds of years ago da Moab nation wen disappea. Get old cities peopo wen dig up dat dey tink wuz Moab, but odda den dat no moa much proof fo show dat dis nation wuz eva aroun.

Good Kine Tings

w25.05 10 ¶8

Look At Jehovah Fo Help You Feel Betta

⁸ From da way dey wen look at um, da Jews wen tink no ways dey wuz goin home. Da Babylon guys usually no let go da guys dey wen capcha. (Isa 14:17) But Jehovah wen give his peopo hope. He wen promise fo free his peopo so dey could go home, an notting wuz goin stop him from making um come tru. (Isa 44:26; 55:12) Da way Jehovah wen see um, Babylon wuz notting, jalike dus. (Isa 40:15) Wen you blow on dus, da buggah gone. Dass how easy would be fo Jehovah let his peopo go from Babylon. How dis hope wuz goin help da Jews? Dat wuz goin make dem feel betta. But can do moa den dat. Isaiah wen write, “But da peopo dat wait fo Da One In Charge help dem, dey goin change fo dem come mo strong still yet.” (Read um Isaiah 40:29-31.) Dey wuz goin fly up jalike da eagles cuz dea hope wuz goin make dem strong again.

[Footnotes]