Afta Solomon come king fo Israel, Jehovah wen ask him: ‘Wat you like me give you?’ Solomon tell: ‘I donno wat I doin, I jalike one small boy. Please try make me smart so I can take kea yoa peopo.’ Jehovah tell: ‘K, cuz you had ask fo be smart, I goin make you moa smart den all da odda guys on da eart. An moa den dat, I goin make you supa rich. An if you always lissen me, you goin live long time.’

Solomon start fo build Da Tempo. He wen use da bestes gold, silva, wood, an stone. Had tousans of guys an wahines dat had da skillz fo help build Da Tempo. Afta seven years of building um, now wuz ready fo give to Jehovah. Dey put sacrifices on top one altar. Den Solomon go down on top his knees in fron da altar an pray: ‘Jehovah, I kno dis tempo no stay big enuff or nice enuff fo you, but please be happy wit oua worship an try lissen to us wen we pray to you.’ How you tink Jehovah had feel about Da Tempo an Solomon’s praya? Wen Solomon pau pray, right den an dea, fiyah come down from da sky an wen eat up all da sacrifices on da altar. Dis wen show dat Jehovah wuz happy wit Da Tempo. Da Israel peopo wuz real happy too wen dey had see dat.

King Solomon had one rep fo being supa smart. Erybody inside Israel an even peopo far away wen kno about his smarts. People would go to him fo solve dea problems. Even da queen of Sheba had come fo tes him out an ask him all kine hahd questions. Wen she hea his ansas, she tell: ‘I neva believe wat peopo tell me about you. But cuz I wen see eryting wit my own eyes, now I kno dat you even moa smart den wat peopo tell. Yoa God Jehovah wen bless you big time.’ Life wuz cherreh fo Israel an da peopo wuz supa happy. But tings wuz about fo change.

Tings wen go real good fo da Israel peopo az long az Solomon had worship Jehovah. But Solomon wen marry plenny wahines from odda lands. Dese wifes wen worship idols an dis had affeck Solomon. Befoa you kno it, he started fo worship dem too. Jehovah wuz supa mad so he tell Solomon: ‘I goin take away paht of da Israel kingdom from yoa family, an split um up in two. I goin give da big paht to one of yoa worka guys, an yoa family ony goin get one small paht.’

Jehovah wen do someting else fo show dis wuz goin happen. One of Solomon’s worka guys, Jeroboam, wuz walking on da road wen he had meet da prophet Ahijah. Ahijah take off his robe an rip um in 12 pieces, an tell Jeroboam: ‘Jehovah goin take away da Israel kingdom from Solomon’s family an split um up in two. Take ten of da pieces fo you cuz you goin be king ova da ten ohanas.’ King Solomon wen hea about dis an wanted fo kill Jeroboam! So Jeroboam dig out to Egypt side. Some time layta, Solomon wen mahke an his boy Rehoboam had come king. Now Jeroboam figga wuz safe fo go back Israel.

Da olda leada guys tell Rehoboam: ‘If you treat da peopo good, dey goin stick wit you an work fo you.’ But Rehoboam’s young frenz tell: ‘Brah, no go ez on um! Make dem work moa hahd!’ Rehoboam lissen to wat da younga guys tell. He wuz so savage to da peopo, an dat wen make dem go agains him. Dass wen da 12 ohanas wen get split up. Da ten ohanas wen make Jeroboam king, an layta on dey wuz called da Israel kingdom. Da odda two ohanas wen stick to Rehoboam, an dey wuz called da Judah kingdom.

Jerusalem wuz in Rehoboam’s turf an Jeroboam neva like his peopo go worship Jehovah ova dea. You kno how come? Cuz Jeroboam wuz sked dey would jump ship an back up Rehoboam. So he wen make two gold bebe cows an tell da peopo: ‘No need go Jerusalem, az too far. You can stay hea an worship.’ Da peopo had start fo worship da gold bebe cows an foget Jehovah again.