Da ten ohanas of da Israel kingdom had choke bad kings, but Ahab wuz da worstes one. He marry one pilau wahine named Jezebel an she wen worship Baal. Dey wen spread Baal worship all ova da land an kill Jehovah’s prophets. Wat Jehovah had do? He wen send da prophet Elijah fo tell Ahab someting.

Elijah tell King Ahab: ‘Cuz of all da bad tings you do, Israel not goin have rain.’ Fo ova three years, da food neva grow an peopo wuz starving. So Jehovah had send Elijah to Ahab again. Da king tell: ‘You one trouble mayka! Dis all yoa fault.’ Elijah tell: ‘Az not my fault dat no moa rain. You da one, cuz you worship Baal az why. So you kno wat, we go challenge. Go get all da peopo an da Baal prophets an we go meet up Mount Carmel.’

On top da mountain, Elijah tell dem: ‘You guys gotta make up yoa minds awready. If Jehovah iz da true God, go wit him. But if Baal iz, den go wit him. Dis da challenge. Da 450 Baal prophets goin make ready dea sacrifice an talk to dea god, an I goin make ready my sacrifice an talk to Jehovah. Whoeva ansa wit fiyah iz da real God.’ Da peopo sed: ‘K, shoots.’

Da Baal prophets wen get dea sacrifice ready an yell out to dea god all day: ‘Eh Baal, lissen us guys!’ Wen Baal neva ansa, Elijah wen start fo tease dem an tell: ‘Yeah you! Try yell moa loud! Maybe Baal wen go moemoe an somebody gotta go wake him up.’ Da prophets wen yell until wuz almos nite time. But still yet, no ansa.

Den Elijah put his sacrifice on top one altar an pour plenny wattah all ova um. Afta dat, he pray: ‘Please Jehovah, show da peopo you da real God.’ Right den an dea, Jehovah wen make fiyah come down from da sky an eat up da sacrifice. Da peopo see dis an yell: ‘Jehovah iz da true God!’ Elijah tell: ‘No let any of da Baal prophets run away!’ Dey wen kill all 450 Baal prophets dat day.

Bumbye, wen one small cloud had show up ova da sea, Elijah tell Ahab: ‘Take yoa chariot an go home cuz one storm stay coming.’ Dark clouds roll in, da wind pick up, an den wen rain hahd. Da land no wuz dry no moa. Ahab wen go home az fas az can. But Jehovah help Elijah run so fas, he had pass Ahab’s chariot! So wat, Elijah’s problems all pau? We go find out.

Jezebel wuz all wild wen she hea about wat had happen to her Baal prophets. She send somebody fo tell Elijah: ‘Tomorrow, I goin kill you jalike you wen kill da Baal prophets.’ Elijah come supa sked an run away to da desert. He pray: ‘Jehovah, I no can take dis anymoa. Jus let me die awready.’ Elijah wen knock out unda one tree cuz he wuz all burn out.

One angel had wake him up an tell: ‘Try get up an go grind.’ Elijah spock one loaf bread on some hot stones an one wattah jug. He eat an drink, an go back sleep. Da angel had wake him up again an tell: ‘Eat up, cuz you goin need energy fo yoa trip.’ So Elijah wen go eat some moa. Den he walk fo 40 days an 40 nights, until he get to Mount Horeb. Ova dea, Elijah wen go inside one cave fo go crash out. But Jehovah talk to him an tell: ‘Elijah, wat you doin ova hea?’ Elijah ansa: ‘Da Israel peopo neva keep dea promise to you. Dey buss up yoa altars an kill yoa prophets. Now dey afta me fo kill me too.’

Jehovah tell him: ‘Go stand outside da cave.’ Firs, one strong wind wen blow pas him. Nex, da groun wen shake. Den one fiyah had blaze tru. Wen Elijah hea one calm, sof voice, he cova his face wit his robe an stand outside da cave. Jehovah ask him: ‘How come you run away?’ Elijah tell: ‘Becuz, no moa nobody but me.’ But Jehovah tell: ‘You not all by yoaself. Get 7,000 odda Israel guys dat still yet worship me. Go make Elisha one prophet fo take yoa place.’ So right away, Elijah do wat Jehovah tell him fo do. You tink Jehovah goin help you too wen you do da tings he like you fo do? Yessah! We go look at wat had happen da time wen neva have rain.