Dat time wen neva have rain, Jehovah tell Elijah: ‘Go Zarefat town. Get one widow ova dea, an she goin give you food.’ Wen he had get to da gates of da town, Elijah see one pooa widow picking up sticks fo make fiyah. He wen ask her fo one cup wattah. She wuz on her way fo get um, but den Elijah ask: ‘Can bring litto bit bread too?’ But da widow tell: ‘I no moa even one piece bread fo give you. I ony get nuff flour an oil fo make litto bit food fo me an my boy—dass it!’ Elijah tell her: ‘Jehovah promise dat if you make some bread fo me, you no goin run outa flour an oil til da rain come back again.’

So da widow wen go home fo make da bread fo Jehovah’s prophet. Da whole time neva have rain, da widow an her boy neva run out of food jalike Jehovah had promise. Her jar flour an jar oil wen stay full all da time.

Layta on, someting real bad wen happen. Da widow’s litto boy wen come so sick, he wen mahke. So she beg Elijah fo help her. Elijah take da boy from her arms an carry him to da upstairs room. He put him down on da bed an pray: ‘Jehovah, please bring dis boy back to life.’ Da boy wen come back alive again, an start fo breathe. How come dass one unreal ting fo Jehovah do? From wat we kno, dis had neva eva happen befoa wea somebody come back to life. An da widow an her boy no wuz even from Israel!

Den Elijah go tell da widow: ‘Look, yoa boy stay alive now!’ She wuz supa happy an tell Elijah: ‘You one real prophet fo God. I kno dis cuz wateva Jehovah tell you fo say, come true all da time.’

From da palace window in Jezreel, King Ahab could see one vineyard dat one guy named Nabot wen own. Ahab wen like dis vineyard fo himself, so he try buy um from Nabot. But Nabot neva sell um cuz Jehovah’s Rules tell fo no sell land dat get pass down in da ohana. You tink Ahab wen respeck Nabot fo doin da right ting? No, he neva. He had go home all salty. He wuz so habut, dat he neva like leave his room or even eat notting.

Ahab’s pilau wife, Queen Jezebel, tell him: ‘Wassamatta you, you da king fo Israel! You can take wateva you like! You kno wat, I goin get da land fo you.’ So she write lettas to da olda guys in da city, telling dem fo set up Nabot. Her plan wuz fo make like Nabot wuz talking bad about God, so dat dey would throw stones at him an kill um. Da olda guys do wat Jezebel tell dem fo do. Den Jezebel tell Ahab: ‘Dea. Nabot stay dead, an now da vineyard all yoas.’

Nabot no wuz da ony good guy dat Jezebel wen kill. She had murda plenny odda peopo dat had love Jehovah. She wen worship idols an do odda bad kine tings. Jehovah wen see all da pilau tings dat Jezebel had do. You tink he goin do someting about her, or wat?

Afta Ahab mahke, his boy Joram come da king. Jehovah wen send one guy named Jehu fo punish Jezebel an her ohana.

Jehu wen ride his war wagon to Jezreel, dass wea Jezebel stay. Joram wen pull up nex to Jehu in his wagon an ask: ‘We stay good, or wat?’ Jehu tell: ‘Brah, no can be good az long az yoa maddah Jezebel stay doin all dis pilau stuffs!’ Joram had try turn aroun his wagon an get outa dea fas. But Jehu shoot Joram wit one arrow an he had mahke.

Den Jehu go to Jezebel’s palace. Wen she hea he wuz coming, she go fix herself up. She go put on makeup, make her hair all nice, an den go wait by her upstairs window. Wen Jehu come, she talk real mean to him. Den Jehu yell to her workas dat wuz standing nex to her: ‘Throw her down hea!’ So dey push Jezebel out da window, an she fall to da groun an mahke.

Afta dat, Jehu wen kill Ahab’s 70 boys an clean up da land from all da Baal worship. From dis story, you see dat Jehovah kno eryting, yeah? An wen da time stay right, you tink Jehovah goin punish da guys dat do bad tings?