Ova an ova, da Judah peopo had bag from Jehovah an go worship fake kine gods. An all dose years, Jehovah wen keep trying fo help dem. He sen plenny prophets fo warn da peopo, but dey ony make fun of da prophets an neva lissen. How Jehovah wuz goin stop dem from worshipping fake kine gods?

Nebukadnezzar, da Babylon king, wuz taking ova one place afta anodda. Da firs time he take ova Jerusalem, he take az prisonas King Jehoiachin, da princes, da army guys, builda guys, an bring um all to Babylon side. He wen take all da treshas from Jehovah’s Tempo too. Den Nebukadnezzar wen make Zedekiah da Judah king.

At da start, Zedekiah wen lissen to Nebukadnezzar. But fake prophets an odda guys from kingdoms close by wen tell Zedekiah fo go agains Babylon. Jeremiah warn him: ‘If you do dat, peopo goin kill each odda, no goin get nuff food, an peopo goin get sick in Judah.’

Afta Zedekiah wuz king fo eight years, dass wen he choose fo go agains Babylon. He wen go ask da Egypt army guys fo help him. Den Nebukadnezzar sen his army fo attack Jerusalem. Wen dey get dea, dey camp all aroun da town. Jeremiah tell Zedekiah: ‘Jehovah say dat if you jus give up, you an Jerusalem goin live. But if you no do dat, da Babylon guys goin burn Jerusalem down an make you dea prisona.’ Zedekiah tell: ‘No ways I goin give up!’

One year an half layta, da Babylon army guys wen buss tru da Jerusalem walls an set da whole town on fiyah. Dey wen burn down Da Tempo, kill plenny peopo, an take tousans back wit dem az prisonas.

Zedekiah wen get away from Jerusalem, but da Babylon army guys wen go afta him. Dey wen catch him by Jericho an bring him back to Nebukadnezzar. Da Babylon king wen kill Zedekiah’s boys, an wen make him watch da whole ting. So nutz, yeah? Den Nebukadnezzar wen make Zedekiah go blind an throw him in prison, wea he layta mahke. But Jehovah promise da Judah peopo: ‘Afta 70 years, I goin bring you guys back home to Jerusalem.’

Wat goin happen to all da young guys dey wen take back to Babylon? Dey still goin stick close to Jehovah, or wat?

Wen Nebukadnezzar wen take da Judah princes to Babylon, he go put Ashpenaz, one palace worka guy, in charge of dem. Nebukadnezzar tell Ashpenaz fo find da smartes boys dat stay in good shape. Fo three years, dey wuz goin train dese young boys an make dem ready fo come importan govamen worka guys in Babylon. Da boys had fo learn fo read, write, an talk da Babylon language, Akkadian. Dey had fo eat da same kine food az da king an da palace guys. Four of dese boyz wuz Daniel, Hananiah, Mishael, an Azariah. But den Ashpenaz wen give dem Babylon names: Belteshazzar, Shadrak, Meshak, an Abednego. All dis training goin make dem foget Jehovah, or wat?

Notting wuz goin make dese four boys stop lissening to Jehovah. Dey wen kno dey no could eat da king’s food, cuz Jehovah’s Rules tell no can eat some of dat kine. So dey tell Ashpenaz: ‘Please no make us eat da king’s food.’ Ashpenaz tell: ‘If you no eat da food, an da king see you no look top shape, he goin kill me!’

So Daniel had one plan. He tell one of da worka guys in charge of dem: ‘Try give us ony vegetables an watta fo ten days. Den match us up wit da odda boys dat eat da king’s food.’ Da guy say: ‘Kay den.’

Afta dey tes um fo ten days, Daniel an his three frenz look way betta den all da odda boys. Jehovah wuz happy dey wen lissen to him. He even wen give Daniel da smarts fo undastan dreams.

Wen da training wuz pau, Ashpenaz bring all da boys to Nebukadnezzar. Wen da king talk wit dem, he see dat Daniel, Hananiah, Mishael, an Azariah wuz way moa smart an sharp den all da odda boys. He wen pick dese four boys fo work fo him. Importan kine stuff he would ask dem wat dey tink about um. Jehovah wen make dem moa smart den all da king’s smart guys an da guys dat do magic.

Even tho dey wuz far from home, Daniel, Hananiah, Mishael, an Azariah neva foget dat dey wen belong to Jehovah. Wat about you? You always goin rememba Jehovah, even wen yoa parents not wit you?