One night, King Nebukadnezzar had one weird dream. It wen bodda him plenny an he no could sleep. He call his guys dat do magic an tell dem: ‘Try break down my dream.’ Dey tell him: ‘Tell us wat you wen dream about, king.’ But Nebukadnezzar tell: ‘No, you tell me wat I wen dream! If not, I goin kill you!’ Dey say to him: ‘How we can break um down fo you, if you no tell us wat you wen dream?’ He tell: ‘All you guys trying fo trick me or wat? Tell me wat I wen dream!’ Dey tell da king: ‘Dass crazy! No moa nobody dat can do dat!’

Nebukadnezzar wen get so mad, he tell kill all da smart guys in da land. Dis mean dat Daniel, Shadrak, Meshak, an Abednego could mahke too. So Daniel wen ask da king fo give him some time. Den Daniel an his frenz wen pule to Jehovah an  ask him fo help. Wat you tink Jehovah wen do?

Jehovah wen show Nebukadnezzar’s dream to Daniel an tell him wat it mean. Da nex day, Daniel go to da king’s servant an tell: ‘No kill any of da smart guys cuz I can tell wat da king’s dream mean.’ Da servant take Daniel to Nebukadnezzar. Daniel tell da king: ‘God wen show you da future. Dis yoa dream: You see one mangus statue wit one gold head, silva ches an arms, coppa stomach an thighs, iron legs, an da feets wuz paht iron an paht clay. Den one rock wuz cut from one mountain, an wen hit da feets of da statue. Da statue wen get smash into pieces an blow away in da wind. Da rock had come one humangus mountain an wen fill da whole eart.’

Den Daniel tell: ‘Dis wat yoa dream mean. Da gold head rep yoa kingdom. Da silva iz da kingdom dat goin come afta you. Den goin get one dass like coppa dat goin rule ova da whole eart. Da kingdom afta dat goin be strong like iron. Den da las one goin be one kingdom dat no stick togedda, wit some pahts dat stay strong like iron, an odda pahts dat stay weak like clay. Da rock dat come one humangus mountain rep God’s Govament. God’s Govament goin smash all dese kingdoms an goin stan foeva.’

Den Nebukadnezzar go on da groun an bow down in fron Daniel. He tell: ‘Yoa God wen show you wat dis dream mean. No moa any odda God like him.’ Nebukadnezzar neva kill Daniel but put him in charge ova all da smart guys an make him one of da rulas in Babylon. You spock out how Jehovah wen ansa Daniel’s praya?

Sometime afta King Nebukadnezzar had da dream about da statue, he wen make one humangus gold statue. He wen set um up in one place called Dura, wea da land stay flat. Den he call all da importan guys in da land fo come togedda in fron da statue, even Shadrak, Meshak, an Abednego. Den da king tell: ‘Wen you hea dem play da trumpets, harps, an flutes all togedda, you gotta go on da groun an bow down to da statue! Whoeva no bow down, we goin throw um in da big fiyah oven.’ So wat you tink, da three Hebrew boys goin bow down to da statue, or dey goin ony worship Jehovah?

Da king give da order fo play da music. So erybody bow down an worship da statue. But Shadrak, Meshak, an Abednego neva. Some of da guys see dis an dey tell da king: ‘Dose three Hebrews no like worship yoa statue.’ Nebukadnezzar tell his guys fo bring dem to him. He tell da Hebrew boys: ‘I goin give you one moa chance fo worship da statue. If not, I goin throw you in da fiyah oven. No moa one god dat can save you from me.’ Dey ansa: ‘We no need anodda chance, cuz oua God can save us. But King, even if he no save us, we not goin worship da statue.’

Den Nebukadnezzar had come so mad dat he tell his guys: ‘Turn up da fiyah seven times moa hot den befoa!’ He orda his army guys: ‘Tie up dese guys an throw um in da fiyah!’ Da oven wuz so hot dat wen da army guys had get close to um, dey wen mahke. Da three Hebrews wen fall into da fiyah. But wen Nebukadnezzar look inside, he see four guys walking aroun in da fiyah, not three. He come sked an ask his guys: ‘I thought we had throw three guys in da fiyah? I see four, an one of dem look like one angel.’

Nebukadnezzar go close to da big fiyah oven an yell: ‘You guys dat worship Da Mos Importan God, come out!’ Erybody no could believe Shadrak, Meshak, an Abednego stay walk outa da fiyah witout getting hurt. Dea skin, hair, an clotheses neva get burn. Dey no even smell like smoke from da fiyah.

Nebukadnezzar tell: ‘Da God of Shadrak, Meshak, an Abednego iz so awesome. He wen sen his angel fo save dem. No moa anodda god like dea god.’

Jus like da three Hebrew boys, you goin choose fo be loyal to Jehovah no matta wat?