One night, Nebukadnezzar had one skery dream. He wen call all his smart guys in fo tell him wat his dream mean. But none of dem could tell him wat his dream wuz about. So den da king talk to Daniel.

Nebukadnezzar tell Daniel: ‘In my dream, I wen see one tree. Wen grow so high, dat da tree wen reach da sky. Anybody could see um, no matta wea dey wuz on eart. Da leaves wuz so nice, an had plenny fruit. Da animals could go undaneat fo shade, an da birds make dea house in da branches. Den one angel guy come down from heaven, an yell out: ‘Cut down da tree. Chop off all da branches. But leave da stump an roots in da groun, an put one iron an one bronze strap aroun da stump. Da heart of da tree goin change from one human one to one animal one. An goin be lidat fo seven years. Erybody goin know dat God iz Da One In Charge, an dat he can give one govament to anybody he like.’

Jehovah tell Daniel wat da dream mean. Wen Daniel undastan da dream, he come sked. He tell da king: ‘I wish dis dream wuz about yoa enemies, but stay about you. Da big tree dat wuz chop down iz you. You no goin be king anymoa, an you goin eat grass in da field jus like one wild animal. But cuz da angel tell fo leave da stump an roots in da groun, dat mean you goin come king one moa time.’

One year layta, Nebukadnezzar wuz on top da flat roof of his palace, feeling all proud az he look at Babylon. He tell: ‘Ho, dis town I wen build iz unreal! I’m da man!’ Az he wuz talking, one voice from heaven cut him off an tell: ‘Nebukadnezzar! Now you not goin be king.’

Right den an dea, Nebukadnezzar come pupule an come jus like one wild animal. He wuz kicked outa his palace an had fo live wit da animals in da field. Bumbye his hair grow long like da eagle feathas, an his nails come long like da feets of da birds.

Afta seven years, Nebukadnezzar come normal an Jehovah make him king again. Den Nebukadnezzar tell: ‘I tell good tings about Jehovah, da King in da sky. Now I kno dat Jehovah iz da Rula ova eryting. He goin make humbo da guys dat get big head, an he can give da govament to whoeva he like.’

Bumbye, Belshazzar come da Babylon king. One night, he throw one big party fo one tousan of his ali’i guys. He tell his worka guys fo bring out all da gold cups dat Nebukadnezzar wen take from Jehovah’s Tempo. Belshazzar, an erybody dea, drink from da cups an talk good about dea idol kine gods. Den outa nowea, one man’s hand show up an start fo write strange words on da wall.

Belshazzar come real sked. He call all his guys dat do magic an promise dem: ‘If anybody can tell me wat dese words mean, I goin make him da numba three leada fo da Babylon peopo.’ Dey wen try, but nobody could figga um out. Den Belshazzar’s maddah, da queen, come in an tell: ‘I kno who can tell you wat dese words mean. Get one guy named Daniel, who befoa time could tell wat dis kine tings mean to Nebukadnezzar.’

Den Daniel come to da king an Belshazzar tell him: ‘If you can read an tell me wat dese words mean, I goin put one gold chain aroun yoa neck an you goin come da numba three leada fo da Babylon peopo.’ Daniel tell: ‘Nah, dass okay. You no need give me notting. But I still goin tell you wat dese words mean. Yoa faddah, Nebukadnezzar wuz big head, an Jehovah wen humbo him. You kno wat had happen to him, but still yet, you neva show Jehovah respeck by drinking wine from da gold cups from his Tempo. So God wen write dis on top da wall: Mene, Mene, Tekel, an Parsin. Dese words mean dat da Mede an Persia army guys goin smash Babylon, an you no goin be king no moa.’

Babylon had thick walls an one deep riva fo proteck um. Dass why wen look like nobody could take um ova. But dat same night, da Mede an Persia army guys wen attack Babylon. Cyrus, da Persia king, wen figga one way fo drain da riva so dat his army could go right up to da gates of da town. Wen dey got to da gates wuz wide open awready! Da army guys wen rush in an take ova Babylon, an kill da king. Den Cyrus come da Babylon rula.

Befoa one year go by, Cyrus tell: ‘Jehovah tell me fo build up his Tempo again in Jerusalem. Any of da Jew peopo who like go help, can go.’ So jalike Jehovah wen promise, plenny of da Jews go back home 70 years afta Jerusalem wuz wipe out. Cyrus wen sen back all da gold an silva cups, an all da odda tings dat Nebukadnezzar wen take from Da Tempo. Can you spock out how Jehovah wen use Cyrus fo help his peopo?