Ezra Had Teach Jehovah’s Rules

About seventy years had go by since mos of da Israel guys wen go back Jerusalem. But still yet had some Israel guys living in diffren pahts of da Persia land. One of dese guys wuz Ezra, one pries dat teach Jehovah’s Rules. Ezra wen find out da peopo in Jerusalem no wuz following da Rules, so he wanted fo go an help dem. Da Persia King Artaxerxes wen tell him, ‘God give you da smarts so dat you can teach his Rules. Go an take anybody dat like go wit you.’ Ezra get togedda wit erybody who like go back Jerusalem. Dey pray to Jehovah fo keep dem safe on dea long trip, an den dey go.

Afta four monts, dey get to Jerusalem. Da princes ova dea tell Ezra, ‘Brah, da Israel guys no lissen Jehovah. Dey wen marry wahines dat worship fake kine gods.’ So wat Ezra wen do? In front da peopo, Ezra get down on his knees an pray, ‘Jehovah you take kea us so good, but us we ony sin agains you.’ Da peopo come sorry, but dey still wen need help fo do da right ting. Ezra pick judges an olda leada guys fo check um out. Ova da nex three monts, dey wen sen away anybody who neva worship Jehovah.

Now twelve years go by. During dat same time, dey wen build da walls aroun Jerusalem one moa time. So Ezra get togedda all da peopo in one open place fo read God’s Rules to dem. Wen he open da book, da peopo stan up. Ezra tell good tings about Jehovah, an da peopo put dea hands up. Dey tell, ‘Yessah, dass it!’ Den Ezra read da Rules, an explain um to da peopo. Dey lissen real good. Erybody wen own up dat dey wen bag again from Jehovah an cry. Come da nex day, Ezra read some moa of da Rules to dem. Dey find out dat real soon, dey gotta celebrate da spesho ceremony, Time Fo Live Inside Shacks. So right away, da peopo start fo make ready fo da spesho ceremony.

Fo da nex seven days of da ceremony, ho, da peopo had good fun an tell Jehovah mahalo fo one good harvest. Neva have one Time Fo Live Inside Shacks ceremony lidat eva since Joshua’s time. Afta da spesho ceremony wuz pau, peopo wen come togedda an say, ‘Jehovah, you wen save us from bein slaves, feed us good in da boonies, an wen give us dis beautiful place fo live. But hahd head us guys. Ova an ova we no lissen you. You sen us prophets fo warn us, but we no lissen. Still yet, you give us chance. You wen keep yoa promise to Abraham. So now we promise dat we goin lissen you.’ Dey write down dea promise, an da princes, prieses, an Levi guys put dea seal on um.