Da Walls Aroun Jerusalem

We go back coupo years. Nehemiah wuz one worka guy for King Artaxerxes. He wuz one Israel guy who wen live Susa town, Persia side. Nehemiah’s braddah wen come from Judah an had bad news fo tell. ‘Da people dat wen go back Jerusalem no stay safe. Dey neva fix da town walls an gates yet. Stay all bus up from da Babylon guys.’ Nehemiah wuz all bum out. He wanted fo go Jerusalem an help, so he had pray dat da king goin let him go.

Layta on, da king see dat Nehemiah wuz some sad. He tell, ‘Wassamatta you, I neva see you lidis befoa?’ Nehemiah tell, ‘King, I stay sad cuz my town Jerusalem stay all bus up.’ So da king ask um, ‘Wat you like me do fo you?’ Den right away, Nehemiah pray quiet kine. Den he tell, ‘If can, please let me go back Jerusalem fo build da walls one moa time.’ King Artaxerxes tell Nehemiah he can go. Da king make shua Nehemiah wuz safe on his long trip. He also wen make Nehemiah da govna fo Judah, an had give him wood fo build up da town gates.

Wen Nehemiah get to Jerusalem, he check out all da town walls. Den he hui up da pries an leada guys an tell, ‘Brah, wat iz dis? We gotta do betta an get to work.’ Da people tell, ‘Rajah dat,’ an dey start fo build da walls one moa time.

But dea wuz some enemies of da Israel peopo making fun of dem saying, ‘Brah, one dog could make dis wall fall down.’ Da worka guys neva let da teasing bodda dem. Dey had keep building da wall, an wen come moa high an strong.

From all kine diffren places aroun da wall, da enemies wen plan fo sneak attack Jerusalem. Wen da Jew peopo hea about dis, dey come all sked. Den Nehemiah tell, ‘No sked. Jehovah stay wit us.’ So Nehemiah go put security guards all aroun fo proteck da workas, dat way da enemies no could attack dem.

Ho, in ony fifty two days, da walls an da gates wuz all pau. Den Nehemiah bring all da Levi guys to Jerusalem fo throw party cuz dey wen pau build da walls. He wen set up two groups of singas. Dey wen go on da walls fo march aroun da town. Da firs group wen go one way, an da secon group wen go da odda way. Dey wen play da cymbals, harps, an had sing to Jehovah. Ezra wen go wit one group, an Nehemiah had go wit da odda group until dey meet up at Da Tempo. All da peopo, da guys, wahines, an kids wen give dea sacrifices to Jehovah an party up. You could hea all dea cheehoos from far away.