Elizabet Get One Bebe

Moa den 400 years go by since da Jerusalem walls wuz pau build. Zekariah, one pries an his wife, Elizabet, wen live close by Jerusalem. Dey wuz married long time, but neva have any keiki. One day, wen Zekariah wuz in da Spesho Place in Da Tempo burning incense, da angel Gabriel had show up. Zekariah come sked, but Gabriel tell, ‘No need be sked. I get someting good fo tell you from Jehovah. Yoa wife, Elizabet, goin born one bebe boy an his name goin be John. Jehovah wen pick John fo do one spesho work.’ Zekariah tell, ‘Nah, how can? Me an my ol lady too makule fo have one bebe.’ Gabriel tell, ‘God wen sen me fo tell you dis. But cuz you neva believe me, you no goin be able fo talk til afta yoa boy born.’

Zekariah wen stay in da Spesho Place in Da Tempo fo long time. Dis no wuz normal, so wen he came out, da people wanted fo kno wat wen happen. But Zekariah no could talk. So he try tell wat wen happen wit his hands. Dass why dey figga Zekariah wen see someting real spesho from God inside dea.

Bumbye Elizabet come hapai an give birt to one bebe boy jalike da angel wen tell. Her frenz an ohana wen come ova fo see da bebe. Dey wuz supa happy fo her. Elizabet tell, ‘We goin name him John.’ Dey tell, ‘No moa one John in yoa ohana, name him Zekariah afta his faddah.’ But Zekariah wen write on top da paypa, ‘John his name.’ Right den an dea, Zekariah could talk again. Fas plenny peopo in Judea hea about da bebe, an dey wen tink, ‘Wat dis kid goin grow up fo be?’

Den God’s spesho spirit move Zekariah fo tell dis message from God, ‘Tell good tings about Jehovah. He wen promise Abraham dat he wuz goin sen da Messiah fo save us. John goin be one prophet, an he goin teach peopo dat da Messiah stay coming.’

Someting spesho wen happen to anodda person in Elizabet’s ohana. Her name wuz Mary. We go check um out in da nex story.