Angels Tell Jesus Wuz Born

Caesar Augustus, da Rome rula, wen make one law dat all da Jews gotta go back home wea dey wuz born fo register. So Joseph an Mary wen go to Betlehem, wea Joseph’s ohana wuz from. Wuz almos time fo Mary give birt to her bebe.

Wen dey get to Betlehem, da only place dey could stay wuz one barn wea dey keep da animals. Ova dea Mary wen give birt to her boy Jesus. She wrap him up in some cloths an put um in one box wea da animals eat from.

Dat night close to Betlehem, had some sheep guys, taking kea dea sheep out in da fields. Den all of a sudden, boom! One angel wuz right in front dem! An Jehovah’s awesome light wuz shining all aroun dem. Da sheep guys come sked, but da angel tell, ‘No need be sked, I get someting awesome fo tell you. Today in Betlehem, da Messiah wuz born.’ Right den an dea, choke angels show up in da sky. Dey tell, ‘God in heaven, you stay awesome! An peace fo da good peopo on eart.’ Den da angels wuz gone. Wat da sheep guys do?

Dey tell each odda, ‘We go Betlehem now.’ So dey leave right away, an find Joseph an Mary in da barn wit dea new bebe boy.

Erybody dat hea wat da angel guy wen tell da sheep guys wuz stoked. Mary tink hahd bout wat da angel tell. She neva wen forget um. Da sheep guys go back to da fields, an dey mahalo Jehovah fo all dat dey wen see an hea.