• Wat Is God’s Govament?
    You Can Live Good Foeva!—Learn Da Bible By Talking Story
    • Lesson 31. Da King in heaven Jesus Christ in fron da awesomeness of Jehovah

      LESSON 31

      Wat Is God’s Govament?

      Da main ting da Bible talk about is God’s Govament. Jehovah goin use his Govament fo make tings da way he wanted um from da start. Wat is God’s Govament? How we know stay up an runnin now? Wat dis Govament awready wen do? An wat goin do bumbye in da future? Us goin find out da ansas in dis lesson an in da nex two.

      1. Wat is God’s Govament, an who is da King?

      Jehovah God wen set up da Govament in heaven an Jesus is da King. (Matthew 4:17; John 18:36) Da Bible tell about Jesus: “He goin stay King . . . foeva.” (Luke 1:32, 33) Cuz Jesus da King of God’s Govament, he goin be in charge of erybody on top da earth.

      2. Who goin be leadas wit Jesus?

      Jesus no lead by himself. Guys “from ery ohana, an language, an peopo, an country . . . goin lead all da peopo inside da world.” (Jesus Show 5:9, 10) Since Jesus was on top da earth, uku million peopo wen follow him. All of dem goin be leadas wit him? No. Ony 144,000 of dem goin go heaven an be leadas wit Jesus. (Read um Jesus Show 14:1-4.) All da odda peopo dat follow Jesus goin live unda God’s Govament on top da earth.—Songs Fo God 37:29.

      3. How come God’s Govament moa betta den human govaments?

      Even wen human leadas try do good kine tings, plenny times dey no moa da powa fo do eryting dey like. Afta awhile, somebody else goin take ova fo dem an maybe da new leada ony tink about himself an no like help odda peopo. But nobody eva goin have to take ova fo Jesus Christ, da Rula of God’s Govament. “God . . . set up anodda kine govmen. Dat govmen, no goin come wipe out eva.” (Daniel 2:44) Jesus goin be da leada ova erybody on top da earth. He not goin treat one guy moa betta den da odda guy. He goin treat erybody same same. He goin teach peopo fo make jalike him an treat each odda wit plenny love an aloha, fo do good tings, an fo be fair.—Read um Isaiah 11:9.

      DIG MOA DEEP

      Try look how come God’s Govament is moa betta den human govaments.

      Jesus Christ leadin ova da earth from his throne in heaven. Da guys who lead wit him stay sittin behind him. Jehovah shine real bright behind dem.

      4. One govament dat get plenny powa goin be in charge ova da whole earth

      Jesus Christ get moa powa fo rule den any odda leada eva. Read um Matthew 28:18, an den talk story about dis question:

      • How come da powa Jesus get fo rule is betta den da powa any odda human leada get?

      Human govaments change all da time, an each one of dem ony rule ova one small part of da earth. Wat about God’s Govament? Read um Daniel 7:14, an den talk story about dese questions:

      • How come az good dat “no mo nobody goin ovathrow” God’s Govament?

      • How come az good dat God’s Govament goin be in charge ova da whole earth?

      5. Human govaments, no can

      How come God’s Govament gotta take ova fo da human govaments? Play um da VIDEO, an den talk story about da question afta.

      VIDEO: Wat Is God’s Govament?—Part Of Um (1:41)

      • How tings stay now cuz of human govaments?

      Read um Da Teacha 8:9, an den talk story about dese questions:

      • You tink God’s Govament gotta take da place of human govaments o wat? How come?

      6. God’s Govament get leadas who undastan us

      Cuz oua King, Jesus, was one human befoa time, he can “undastan how us guys not strong.” (Fo Da Hebrew Peopo 4:15) Jehovah wen choose 144,000 guys fo be leadas wit Jesus. Dey come “from ery ohana, an language, an peopo, an country.”—Jesus Show 5:9.

      • Make you feel good fo know dat Jesus an his leada guys know wat az like fo live az one human o wat? How come?

      Kanes an wahines who get chance fo go heaven from da pas an now an from all diffren countries an places.

      Jehovah wen choose kanes an wahines from all ova fo be leadas wit Jesus

      7. Da laws God’s Govament get is da bes

      Govaments make laws dat suppose to be good fo da peopo an proteck um. Da peopo unda God’s Govament gotta follow laws too. Read um 1 Fo Da Corint Peopo 6:9, 10, an Fo Da Hebrew Peopo 10:22. Den talk story about dese questions:

      • How you tink da world goin be like wen erybody ack da way God tell?a

      • Jehovah expeck peopo unda his Govament fo lissen him. You tink dass fair? How come?

      • How we know peopo who no lissen God’s laws now, can change?—Go look Fo Da Hebrew Peopo 10:22.

      One policeman stop traffic at one crosswalk. Young an old peopo walk across da street.

      Govaments make laws fo do good fo da peopo an proteck dem. God get da bes laws fo do good an proteck da peopo unda his Govament

      WAT SOME PEOPO TELL: “God’s Govament, wat is dat?”

      • Wat you would tell um?

      WAT WE WEN TALK ABOUT

      God’s Govament is one real govament in heaven dat goin be in charge ova da whole earth.

      Wat You Wen Learn

      • Who da leadas of God’s Govament?

      • How come God’s Govament is da bes?

      • Wat Jehovah expeck from da peopo unda his Govament?

      Someting Fo Do

      LEARN SOME MOA

      Try look wat Jesus wen tell about wea God’s Govament stay.

      “Is the Kingdom of God in Your Heart?” (Web article)

      How come Witnesses Fo Jehovah choose fo take sides wit God’s Govament an not human govaments?

      Devoted to God’s Kingdom (1:43)

      Da 144,000 dat Jehovah wen choose fo be leadas wit Jesus, wat da Bible tell about dem?

      “Who Go to Heaven?” (Web article)

      Wat wen prove to one lady who was lock up dat ony God can make da world fair?

      “How I Found the Answer to Injustice” (Awake!, November 2011)

      a Us goin learn moa about how God like us ack in Part 3.

  • God’s Govament Stay Ruling Now!
    You Can Live Good Foeva!—Learn Da Bible By Talking Story
    • Lesson 32. Jesus Christ az da King in heaven hold da spesho stick fo show peopo dey da king an rule ova da eart.

      LESSON 32

      God’s Govament Stay Ruling Now!

      God’s Govament wen start fo rule up in heaven in da year 1914. Dat wuz also da start of da time wen human rulas was goin come pau too. How we know dat? We go look at wat da Bible tell was goin happen, wat stay happening in da world from 1914, an how peopo stay acking since den.

      1. Wat da Bible tell was goin happen?

      Da Bible book of Daniel wen tell dat God’s Govament would start fo rule at da end of one time called “seven year.” (Daniel 4:16, 17) Long time afta dat, Jesus wen call dat same time “dea time,” an he wen tell dat neva pau yet. (Luke 21:24) We goin see dat da seven year wen pau in 1914.

      2. Since 1914, wat stay happening in da world an how peopo been acking?

      Jesus guys wen ask him: “Tell us wen dese tings goin come an da way tings stay right now, wen goin pau.” (Matthew 24:3) Jesus wen tell um plenny stuff dat was goin happen bumbye wen he was goin rule az da King of God’s Govament. Goin get stuff like war, no moa nuff food, an earthquakes. (Read um Matthew 24:7.) Da Bible also wen tell befoa time dat how peopo was goin ack “befo da world goin come pau” was goin make um so dat “erybody goin presha out.” (2 Fo Timoty 3:1-5) We wen see all dis even moa since 1914.

      3. How come stuffs come moa worse since God’s Govament wen start fo rule?

      Ony litto while afta Jesus wen come da King of God’s Govament, he wen war in heaven agains Satan an da demons. Satan wen lose. Da Bible tell dat “him an his angel messenga guys get throw down on top da earth.” (Jesus Show 12:9, 10, 12) Satan stay real huhu cuz he know he goin get wipe out. So he da one who make erybody all ova da earth come soa an suffa. Dass how come eryting stay all jam up. God’s Govament goin fix all dis.

      DIG MOA DEEP

      Check out how us guys know dat God’s Govament wen start fo rule in 1914 an wat dis mean fo all us.

      4. Wat tell inside dat Bible show dat God’s Govament wen start fo rule in 1914

      Play um da VIDEO.

      VIDEO: God’s Govament Wen Start Fo Rule In 1914 (5:02)

      God wen make King Nebuchadnezzar, who wen live long time ago in Babylon, have one dream. God wen show him wat was goin happen in da future. Wat Daniel wen tell about wat mean, wen show was about Nebuchadnezzar’s rule an God’s Govament.—Read um Daniel 4:17.a

      Read um Daniel 4:20-26, an den look da chart fo talk story about da questions afta:

      • (A) Wat Nebuchadnezzar wen see in his dream?—Go look verses 20 and 21.

      • (B) Wat was goin happen to da tree?—Go look verse 23.

      • (C) Wat was goin happen wen da “seven year” pau?—Go look verse 26

      Wat Da Dream About Da Tree Gotta Do Wit God’s Govament

      WAT WEN TELL BEFOA TIME (Daniel 4:20-36)

      Somebody in charge

      (A) One mangus tree

      A mangus tree.

      Somebody stop being in charge

      (B) “Cut down da tree,” an let “seven year pass”

      One tree stump wit iron an bronze strap.

      Somebody stay in charge again

      (C) “God goin let you come da king one mo time”

      A mangus tree.

      Da firs time all dis wen come true . . .

      • (D) Who da tree wen rep?—Go look verse 22.

      • (E) How he wen stop being in charge?—Read um Daniel 4:29-33.

      • (F) Wat wen happen to Nebuchadnezzar wen “seven year” wen pau?—Read um Daniel 4:34-36.

      FIRS TIME WEN COME TRUE

      Somebody in charge

      (D) Nebuchadnezzar, King of Babylon

      King Nebuchadnezzar being high makamaka.

      Somebody stop being in charge

      (E) Afta 606 B.C.E., Nebuchadnezzar wen go pupule an no could rule fo seven years

      Nebuchadnezzar on top da ground an eating grass like one animal.

      Somebody stay in charge again

      (F) Nebuchadnezzar wen come normal an was in charge again

      King Nebuchadnezzar look up to da sky wit his arms raised up.

      Da secon time dis wen come true . . .

      • (G) Who da tree wen rep?—Read um 1 Records 29:23.

      • (H) How dey wen stop being in charge? How we know dat wen Jesus was on top da earth, still yet nobody was in charge?—Read um Luke 21:24.

      • (I) Wen an wea somebody stay in charge again?

      SECON TIME DIS WEN COME TRUE

      Somebody in charge

      (G) Israel kings who rep God being in charge

      Da line of Israel kings sittin on thrones. Bright light shine on dem.

      Somebody stop being in charge

      (H) Jerusalem stay wipe out an da Israel kings no was in charge fo 2,520 years

      One fire rip thru Jerusalem 607 Years Befoa Jesus Was Born. Den, 2,520 years go by

      Somebody stay in charge again

      (I) Jesus start fo rule in heaven az King of God’s Govament in 1914

      Jesus ruling ova da earth from his throne up in da sky from 1914. Bright light shine on him.

      How long da seven year?

      Some parts of da Bible help us fo undastan odda parts. Da Bible book Jesus Show tell dat three an half year, dass 1,260 days. (Jesus Show 12:6, 14) Times um by two, seven year, dass 2,520 days. Sometimes, da Bible use one day fo mean one year. (Ezekiel 4:6) So den, da seven year in da book of Daniel, dass 2,520 years.

      5. Da world wen change since 1914

      Play um da VIDEO.

      VIDEO: Da World Wen Change Since 1914 (1:10)

      Jesus wen tell wat da world was goin be like afta he wen come King. Read um Luke 21:9-11, an den talk story about dis question:

      • Which one of dese tings you wen see o hear about?

      Da aposal Paul wen tell how peopo would ack in da time right befoa da human rulas was goin be pau. Read um 2 Fo Timoty 3:1-5, an den talk story about dis question:

      • You wen see peopo acking like any of dese tings today? Which ones?

      Picha: Picha of wat da world stay like an how peopo ack befoa da world come pau. 1. One army leada shout from da stage wit arms out. 2. Buildins all buss afta one eartquake. 3. Military planes. 4. Peopo wearin masks walk outside. 5. Fire rip thru da Twin Towers in New York afta a terrorist attack. 6. One chronic using drugs. 7. One husban beat his wife. 8. Choke drugs an booze. 9. Two wahines all dress up wit fancy jewelry take selfies. 10. One DJ pump up da crowd at one concert. 11. Protestor throw one Molotov cocktail.

      6. God’s Govament being in charge suppose to make us like do someting

      Read um Matthew 24:3, 14, an den talk story about dese questions:

      • Wat importan kine work show dat God’s Govament stay in charge now?

      • How you can have one part in dis work?

      God’s Govament stay in charge now an pretty soon goin take ova da whole earth. Read um Fo Da Hebrew Peopo 10:24, 25, an den talk story about dis question:

      • So wat us guys gotta do den?

      Picha: 1. One Bible learna go da Meeting Place fo Witnesses Fo Jehovah. 2. Da Bible learna preach to somebody she know.

      If you wen find out someting dat could help oddas an save dem, wat you would do?

      WAT SOME PEOPO TELL: “How come Witnesses Fo Jehovah erytime talk about 1914?”

      • Wat you goin tell um?

      WAT WE WEN TALK ABOUT

      Wat da Bible tell an wat goin on in da world show dat God’s Govament stay in charge now. We show us guys believe dis by preaching about um an goin meetings wit da local hui.

      Wat You Wen Learn

      • Wat wen happen afta da seven year pau dat da Bible book of Daniel tell befoa time?

      • How you know fo shua dat God’s Govament wen start fo rule in 1914?

      • How you can show dat you believe God’s Govament stay in charge now?

      Someting Fo Do

      LEARN SOME MOA

      Try look wat da history guys an oddas tell about how da world wen change since 1914.

      “When Morals Declined Dramatically” (Awake!, April 2007)

      Try read how wat da Bible tell was goin happen at Matthew 24:14 wen change one guy’s life.

      “I Loved Baseball More Than Anything!” (The Watchtower No. 3 2017)

      How we know dat da prophecy in Daniel chapta 4 stay talking about God’s Govament?

      “When Did God’s Kingdom Begin Ruling? (Part 1)” (The Watchtower, October 1, 2014)

      Wat show dat da “seven year” dat Daniel chapta 4 wen talk about wen pau in 1914?

      “When Did God’s Kingdom Begin Ruling? (Part 2)” (The Watchtower, November 1, 2014)

      a Go look da las two articles in da Learn Some Moa part of dis lesson.

  • Wat God’s Govament Goin Do
    You Can Live Good Foeva!—Learn Da Bible By Talking Story
    • Lesson 33. Peopo living in one paradise earth.

      LESSON 33

      Wat God’s Govament Goin Do

      God’s Govament stay ruling awready. Pretty soon, goin make big kine changes on top da earth. We go look at some of da good kine tings dat we no can wait fo wen God’s Govament stay in charge on top da earth.

      1. How God’s Govament goin make eryting fair an pono on top da earth?

      Jesus, da King of God’s Govament, goin wipe out da peopo an da govaments dat do bad kine stuff at da war dey call Armageddon. (Jesus Show 16:14, 16) Dat time, wat da Bible promise goin full on come true: “Ony litto bit moa, an no goin get da peopo dat do bad kine stuff.” (Songs Fo God 37:10) Jesus goin use God’s Govament fo make shua dat erywea an erythin on top da earth goin be fair an pono.—Read um Isaiah 11:4.

      2. How life goin be on top da earth wen eryting stay da way God like?

      Wen God’s Govament stay in charge, “da peopo dat do da right ting, dey goin get da land an dey goin stay live dea foeva.” (Songs Fo God 37:29) Try picha living in one world wea erybody goin do wass right an erybody goin love Jehovah an each odda! Nobody goin get sick, an erybody goin live foeva.

      3. Wat God’s Govament goin do afta da peopo who do bad kine stuff get wipe out?

      Afta da peopo who do bad kine stuff get wipe out, Jesus goin rule as King fo 1,000 years. Dat time, him an da 144,000 guys who goin rule wit him goin help humans on top da earth fo come perfeck. Wen da 1,000 years pau, da whole earth goin be one beautiful paradise, an all da peopo goin be happy cuz dey lissen da rules from Jehovah. Den, Jesus goin turn da Govament back ova to his Faddah, Jehovah. Moa den eva, erybody goin show dat dey get “plenny respeck fo [Jehovah’s] name.” (Matthew 6:9, 10) Dat time erybody goin know fo shua dat Jehovah is one good Rula who kea about erybody. Den Jehovah goin wipe out Satan, da demons, an anybody else who choose fo go agains His rule. (Jesus Show 20:7-10) God’s Govament goin make eryting perfeck an dat goin las foeva.

      DIG MOA DEEP

      Try look how come we can trus dat God goin use his Govament fo make eryting da Bible promise about oua future, come true.

      4. God’s Govament goin wipe out human govaments

      “Peopo make any kine to [peopo] an make [dem] suffa an work real hard.” (Da Rules Secon Time 26:6) Jehovah goin use his Govament fo make all dat come pau.

      Read um Daniel 2:44 an 2 Fo Da Tessalonika Peopo 1:6-8, an den talk story about dese questions:

      • Wat Jehovah an his Boy, Jesus, goin do to human govaments an da guys dat back dem up?

      • How wat you wen learn about Jehovah an Jesus make you shua dat wat dey goin do goin be fair an pono?

      Jesus az Ali’i in heaven ruling ova one paradise earth.

      5. Jesus is da bestes King

      Az da King of God’s Govament, Jesus goin help peopo on top da earth in plenny ways. Play um da VIDEO fo see how Jesus wen show dat he like help peopo an dat God wen give him da mana fo do um.

      VIDEO: Jesus Wen Show Wat God’s Govament Goin Do (1:13)

      Wen he was on top da earth, Jesus wen give one sampo of wat God’s Govament was goin do. Which one of da blessins ova hea you no can wait fo? Read um da scripchas dat tell about da blessins.

      ON EARTH, JESUS WEN . . .

      FROM HEAVEN, JESUS GOIN . . .

      • make shua erybody’s health stay perfeck.​—Isaiah 33:24.

      6. God’s Govament goin make good kine stuff happen in da future

      God’s Govament goin give humans da awesome kine life dat Jehovah always wanted fo dem. Dey goin live foeva on one paradise earth. Play um da VIDEO fo see how Jehovah use his Boy, Jesus, fo make wat He like happen.

      VIDEO: Good Kine Stuff In Da Future Unda God’s Govament (4:38)

      Read um Songs Fo God 145:16, an den talk story about dis question:

      • How dat make you feel fo know dat Jehovah goin “give stuff to eryting dat stay alive fo dem no need notting no moa”?

      WAT SOME PEOPO TELL: “Eh, if we all work togedda, we can fix all da pilikia in da world.”

      • Wat kine pilikia God’s Govament goin fix dat human govaments no can?

      WAT WE WEN TALK ABOUT

      God’s Govament goin make da whole earth one paradise wea erybody goin be good. Dey goin worship Jehovah foeva.

      Wat You Wen Learn

      • How God’s Govament goin show plenny respeck fo Jehovah’s name an show how good an spesho it stay?

      • How we know God’s Govament goin make da Bible promises come true?

      • Of all da good kine tings God’s Govament goin do, which one you no can wait fo?

      Someting Fo Do

      LEARN SOME MOA

      Armageddon, wat is dat?

      “What Is the Battle of Armageddon?” (Web article)

      Go look wat goin happen during da time Jesus wen call “dat time erybody goin suffa to da max.”—Matthew 24:21.

      “What Is the Great Tribulation?” (Web article)

      Go look how ohanas can tink good about being togedda in Paradise.

      See Yourself in Paradise (1:50)

      In da story “I Was Troubled by Many Questions,” try learn how one guy who wen fight agains da govament wen find da ansas he was lookin fo.

      “The Bible Changes Lifes” (The Watchtower, January 1, 2012)