LESSON 22
How You Can Preach Da Good Kine Tings?
Afta you wen learn da trut from da Bible, maybe you tink, ‘Ho, erybody gotta know dis!’ Az true, aah? But maybe you stay small kine sked fo preach. We go talk about how you can start fo preach da good kine tings an no need get all presha out.
1. How you can share wat you learn wit da guys you know?
Jesus guys tell: “No way us can no talk bout da tings we wen see an hear.” (Jesus Guys 4:20) Dey wen love wat dey wen learn from Jesus so much dat dey wen like tell erybody about um. You feel lidat? If yeah, wen get chance, try tell yoa ohana an frenz wat you wen learn wit aloha.—Read um Fo Da Colosse Peopo 4:6.
How you can start
Wen you talk story wit yoa ohana, try talk about someting from da Bible by telling dem: “I wen learn someting unreal.”
If you get one fren who stay sick o all worried, share wit dem some good kine tings from da Bible.
Try tell da guys you work wit wat you wen learn while you was learning da Bible wit somebody o at one meeting wit da local hui.
Try show yoa frenz da jw.org website.
Wen you stay learning da Bible wit somebody, ask oddas fo come wit you, o show dem on jw.org how dey can get somebody fo help dem learn da Bible.
2. How come is one real good ting fo go preach wit da local hui?
Jesus guys neva ony tell da good kine tings wit peopo dey wen know. Jesus wen “sen [guys] out two by two, fo dem go befoa him, ery town an place” fo preach. (Luke 10:1) Preaching lidat wen give choke peopo da chance fo hear da good kine tings. Preaching togedda wen make Jesus guys feel real good inside. (Luke 10:17) You like make preaching wit da local hui someting you can do?
DIG MOA DEEP
Try look wat you can do fo no feel too sked an see how telling oddas about da good kine tings can make you feel real good inside.
3. Jehovah goin be wit you
Some guys who like try preach might be sked wen dey tink about how dey might look o how oddas goin ack.
You stay sked fo tell oddas about wat you wen learn o wat? How come?
Play um da VIDEO, an den talk story about da question afta.
Wat da young Witnesses wen do fo no be sked?
Read um Isaiah 41:10, an den talk story about dis question:
Wen you stay sked fo preach, how prayer goin help you?
You wen know?
Plenny Witnesses Fo Jehovah wen tink befoa time dat dey could neva share da good kine tings wit odda peopo. Had one guy, Sergey, who neva feel good about himself an was real hard fo him fo talk to peopo. But den he wen learn from da Bible. He tell: “I thought, ‛No ways I can talk to peopo about da Bible’. But still yet, I had know peopo had fo hear um. Wen blow my mind dat talking about da Bible wen make me feel good about myself an make my faith moa solid.”
4. Get respeck fo oddas
Befoa you preach to somebody, try tink about wat you like say. But not ony dat, try tink about how you can say um in one nice kine way. Read um 2 Fo Timoty 2:24, an 1 From Peter 3:15, an den talk story about dese questions:
How you can do wat dese scripchas tell wen you talk to odda peopo about da Bible?
Maybe yoa ohana o frenz no tink same same jalike you. Wat you can do? Wat is not good fo do?
How come is betta fo ask questions in one nice kine way an no jus tell dem wat fo tink?
5. You feel real good inside wen you preach
Jehovah wen give Jesus da kuleana fo preach da good kine tings. How Jesus wen feel about um? Read um John 4:34, an den talk story about dese questions:
Eating ono kine food keep us alive an make us happy. How come Jesus wen tell doing wat God like us fo do—jalike preaching—is same same az eating food?
Wat good kine tings can happen cuz you preach to oddas?
Tings dat can help you
At da middo of da week meeting, try see wat you can learn about how fo talk story wit somebody.
Try tink about signing up fo da school at da middo of da week meeting. Having one part can help you feel moa ready fo tell oddas wat you learn.
Use da “Wat Some Peopo Tell” part inside dis book fo help you practice how fo ansa questions plenny peopo get o wen dey no like lissen.
WAT SOME PEOPO TELL: “Ho, wat you been up to?”
How you can use dis chance fo tell da person about wat you wen learn from da Bible?
WAT WE WEN TALK ABOUT
You feel real good inside wen you preach. An fo start doing um, maybe az moa easy den you tink.
Wat You Wen Learn
How come we preach da good kine tings to odda peopo?
How you can do um in one way dat show aloha?
Wat you can do fo no feel az sked fo preach?
LEARN SOME MOA
Try look four easy ways you can preach da good kine tings using da jw.org contack card.
Try learn about four tings dat can help you fo preach da good kine tings.
“Are You Ready to Become a Fisher of Men?” (The Watchtower, September 2020)
Try watch how somebody in da Bible can help you fo no be sked fo preach da good kine tings to odda peopo even if you stay young yet.
Try look how you can talk about da Bible wit yoa ohana who donno about Jehovah.
“Reaching the Heart of Unbelieving Relatives” (The Watchtower, March 15, 2014)