LESSON 47
You Ready Fo Get Baptize?
You wen find out plenny about Jehovah from learning da Bible an you probly wen make changes fo match up wit wat you wen learn. But, maybe get someting dat stay hold you back from giving yoa life to Jehovah an getting baptize. Dis lesson goin talk about some of da main stuff dat hold peopo back from getting baptize an how you can get ova um.
1. You gotta know eryting befoa you get baptize o wat?
Fo get baptize, you gotta “come fo know da true stuff.” (1 Fo Timoty 2:4) Dis no mean you gotta know da ansa to ery Bible question befoa you get baptize. Even da guys who been baptize long time still yet learn. (Fo Da Colosse Peopo 1:9, 10) But you gotta know da main tings da Bible teach. Da eldas in da local hui goin help you see if you know enuff.
2. Wat some tings you gotta do befoa you get baptize?
Fo get baptize, you “gotta change how you tink an no do all da bad kine stuff you stay do befo time.” (Read um Jesus Guys 3:19.) Dis mean you feel sorry fo da bad stuff you wen do an you ask Jehovah fo let um go. Cuz you wen make up yoa mind fo live da way God like, you goin stay away from doing any bad kine stuff. On top of dat, you start fo go field service an go meetings wit da local hui an come one preacha who no stay baptize yet.
3. If you stay sked, how come you no like let dat hold you back?
Some guys stay sked dat dey no can do wat dey wen promise Jehovah. Az true, you goin jam up sometimes. Even guys in da Bible who wen trus God wen jam up. But Jehovah no expeck his guys fo be perfeck. (Read um Songs Fo God 103:13, 14.) He real happy wen you do yoa bes! He goin help you. Jehovah even wen tell us: “No mo notting dat can cut us guys off from da way God love us guys!”—Read um Fo Da Rome Peopo 8:38, 39.
DIG MOA DEEP
Try see how you can get ova da stuff dat stay hold you back from getting baptize by getting fo know Jehovah moa betta an taking his help.
4. Get fo know Jehovah moa betta
How good you gotta know Jehovah befoa you get baptize? You gotta know him good enuff fo love him an like make him happy. Play um da VIDEO fo see how Bible learnas all ova da world wen do dat. Den talk story about da question afta.
Inside da video, wat wen kokua some guys fo make ready fo get baptize?
Read um Fo Da Rome Peopo 12:2, an den talk story about dese questions:
Get anyting inside da Bible dat you not shua about o you not shua if Witnesses Fo Jehovah teach da trut?
If yeah, wat you can do about um?
5. Get ova da stuff dat can hold you back from getting baptize
Wen we choose fo give oua life to Jehovah an get baptize, all us goin go thru hard stuff. Fo see one exampo, play um da VIDEO, an den talk story about da questions afta.
Inside da video, wat stuff Narangerel had fo get ova fo serve Jehovah?
How her love fo Jehovah wen help her win ova dose tings?
Read um Smart Guys 29:25 an 2 Fo Timoty 1:7, an talk story about dis question:
Wat make us strong enuff fo get ova da tings dat hold us back?
6. Trus in Jehovah’s help
Jehovah goin help you do wat make him happy. Play um da VIDEO, an den talk story about da questions afta.
Inside da video, wat wen hold back da Bible learna from getting baptize?
Wat he wen learn fo make his trus in Jehovah moa strong?
Read um Isaiah 41:10, 13, an den talk story about dis question:
How come you know dat fo shua you can keep yoa promise fo give yoa life to Jehovah?
7. Come moa tankful fo Jehovah’s love
Da moa you tink how much Jehovah love you, da moa tankful you goin be. Den da moa you goin like serve him foeva. Read um Songs Fo God 40:5, an den talk story about dis question:
Wat good stuff from Jehovah you tankful fo?
Read um Daniel 9:19, an den talk story about dese questions:
How come is unreal fo be one Witness Fo Jehovah?
You like get baptize az one Witness Fo Jehovah?
Get anyting dat stay hold you back from doing um?
Wat you tink you gotta do so you can get baptize?
WAT SOME PEOPO TELL: “Fo get baptize, dass one mayjah kuleana. I no tink I can hando um.”
Dass how you feel?
WAT WE WEN TALK ABOUT
Wit Jehovah’s kokua, you can get ova anyting dat might stop you from getting baptize.
Wat You Wen Learn
How much you gotta know about da Bible befoa you get baptize?
Wat kine changes you gotta make befoa you get baptize?
Jus cuz you sked, how come you no like let dat hold you back?
LEARN SOME MOA
Try tink wat should be da main reason fo get baptize.
“Are You Ready to Get Baptized?” (The Watchtower, March 2020)
Learn how fo get ova stuff dat can hold you back.
“What Prevents Me From Getting Baptized?” (The Watchtower, March 2019)
Try see how one guy wen get ova some mayjah stuff so he could get baptize.
One guy, Ataa, neva like get baptize. Check out wat wen help him fo change his mind.