Wen Goin Come Pau? Wat Jesus Tell

TINK BOUT TWO OF DA TINGS JESUS WEN SAY BOUT UM:

“Watch an stay ready! Cuz you donno da day o da time.”​—MATTHEW 25:13.

“So watch out! Get ready! Cuz you guys donno wat time.”​—MARK 13:33.

So nobody kno wen all dat goin happen, da exact day or time. But God kno, cuz he had make one time wen da world was goin come pau. (Matthew 24:36) So wat, God wen leave us hangin so we dunno wen all dis goin happen? No ways! Jesus wen tell his guys wat was goin go down right befoa da end of da world.

WAT KINE STUFF GOIN HAPPEN

Dis da stuff Jesus wen tell was goin happen “wen da world goin come pau.” He tell:“One country goin start fo fight anodda country. Plenny peopo no goin get notting fo eat. Plenny diffren places, da groun goin shake hard plenny.” (Matthew 24:3, 7) Da odda ting he wen tell “peopo goin get real sick.” (Luke 21:11) You see all dis today ah?

We see um! Mean kine wars, no moa nuff food, mayjah earthquakes, diseases stay hittin us hard. Like 2004, had one mayjah earthquake in da Indian Ocean dat wen make one tsunami dat wen wipe out 225,000 peopo. Look COVID-19, in three years, 6.9 million guys wen die all ova da world. Jesus wen tell wen all dis stuff was goin go down, dat sho dat da world almos goin come pau.

“BEFO DA WORLD PAU”

Da time right befoa da end, da Bible call um “befo da world pau” (2 Peter 3:3, 4) Befoa da world pau, peopo goin be so pilau dey goin ack way moa worse den befoa, das wat 2 Timoty 3:​1-5 tell. (Spock da box “Jus Befoa da World End”) You see peopo ack like dat today? Dakine peopo dey greedy buggahs, dey only tink bout demself, dey get all nutz, dey no moa love an aloha fo peopo. All dat is proof garuntee dat da world almos goin come pau.

Dis time befoa da world pau, how long goin be? Da Bible tell “ony get litto bit mo time lef” den God goin wipe out all those pilau guys.​—Jesus Show 11:15-18; 12:12.

DA PARADISE EARTH ALMOS STAY HEA!

God already wen set da day an time fo wipe out dis pilau world. (Matthew 24:36) Anodda good ting is God “He no like nobody get cut off.” (2 Peter 3:9) Right now he giving evrybody chance fo live da way he like. How come? Cuz He like evrybody make um wen dis world pau. He like evrybody live in His new world, das wen da earth goin be one paradise.

God wen set up one way fo teach peopo all ova da world fo learn how fo be part of da new world unda His Govament. Jesus wen say dat peopo all ova da world was goin tell da good kine stuff bout God’s Govament. (Matthew 24:14) All ova da world, Witnesses fo Jehovah spend billions of hours telling peopo an teachin dem bout da Bible’s hope. Jesus wen tell all dis was goin happen on da earth befoa da world pau.

All dis is da good kine tings dat da Bible wen talk bout. Pretty soon da world goin be pau, all da humans not goin rule anymoa, an can make um to da new world dat God wen promise. Da nex ting we goin talk bout is how you can live ova dea.