You Can Reach Yoa Spiritual Goals

1. Wat plenny of us get hard time do?

YOU eva wen make one spiritual goal but was hard fo do um?b No worries, you not da ony one. Had dis one braddah, Philip, he wanted fo pray moa, an make um moa betta, but was hard fo him make da time fo pray. Erika had like be on time fo da meeting fo preach, but she was late fo almos ery one. Tomáš wen try fo read da whole Bible. He tell: “I jus neva like reading da Bible. I wen try three times fo read da whole ting, but ery time I ony made um to Da Prieses and den I wen quit.”

2. Why we not goin lose fight if we neva reach oua spiritual goal yet?

² If you awready get one goal dat you neva reach, no get all bum out. Take time an hard work fo even reach one small kine goal. Cuz you still like reach yoa goal, dat show you like stay close to Jehovah an like go all out fo him. All yoa hard work matta to Jehovah. But he no expeck moa from you den wat you can do. (Songs 103:14; Mic 6:8) Wen you chose yoa goal, make shua you can do um. If can, wat you can do fo reach um? Hea some tings dat can help.

YOU GOTTA LIKE DO UM

3. How come is importan fo really like reach yoa goal?

³ Fo reach yoa spiritual goal, you gotta really like do um. If you feel lidat, you going do wateva take fo reach um. Dass jus like da wind dat push da sailboat to wea gotta go. As long da wind keep blowing den da guy on da boat goin get to wea he like go. An if da wind stay strong he going get dea moa fas. So den, da moa we like do someting, da moa chance we get fo reach um. David, dis braddah in El Salvador tell: “Wen you like do someting, you going try moa hard. An try no let notting stop you from reaching yoa goal.” So, wat you can do fo make yoaself really like do um?

4. Wat we can pray fo? (Fo Da Philippi Peopo 2:13) (Go look da picha.)

⁴ Pray so you like do um moa. Jehovah can use his spesho spirit fo help you like reach yoa goal. (Read um Fo Da Philippi Peopo 2:13.) Sometimes we make one goal cuz we know we suppose to, dass one good ting. But maybe we no really like do um. Dass jus like one sistah in Uganda name Norina. She wen make one goal fo teach somebody da Bible. But she neva really like do um cuz she wen feel like she no was one good teacha. Wat wen help her? She tell: “I wen start fo ask Jehovah eryday fo help me like teach somebody da Bible even moa. Fo go along wit wat I wen pray, I wen work on how I teach. Afta coupo months I wen see dat I had like do um moa. Dat year, I wen start two Bible studies.”

5. Wat we can tink about fo help us like reach oua goal even moa?

⁵ Tink plenny about wat Jehovah wen do fo you. (Songs 143:5) Aposal Paul wen tink plenny about da good tings Jehovah wen do fo him even if he wen feel he neva deserve um. Dis wen make him like work moa hard fo Jehovah. (1 Cor 15:9, 10; 1 Tim 1:12-14) Same same, da moa you tink about all da tings Jehovah wen do fo you, da moa you going like reach yoa goal. (Songs 116:12) We go look at wat wen help dis sistah in Honduras. Her goal was fo come one pionea preacha. She tell: “I wen tink about how much Jehovah love me. How he wen help me find his peopo. How he wen take kea me an proteck me. Tinking hard about all dat wen make my love fo him come moa strong an wen make me really like be one pionea.”

6. Wass anodda ting dat can make us like reach oua goal even moa?

⁶ Tink of da good tings dat can happen wen you reach yoa goal. Earlia we wen talk about Erika. Try look wat wen help her wit her goal fo be on time. She tell: “I wen come fo see dat I was missing out on plenny tings cuz I was always late fo da meeting fo go preach. If I get dea earlia, I get fo talk story wit all da braddahs an sistahs befoa da meeting. I even would get chance fo lissen to wat da braddah tell, dat goin help me like field service an get betta at um.” Erika had reach her goal cuz she wen tink about all da good tings dat can happen wen she was on time. Wat good tings you can focus on? If yoa goal get someting fo do wit Bible reading or praya, try tink about how dat going make you moa close to Jehovah. (Songs 145:18, 19) If yoa goal is to work on one Christian quality, focus on how it goin make you get along betta wit oddas. (Col 3:14) Try make one lis of how come you like reach yoa goal. Make shua you look um ova all da time. Tomáš, from earlia, tell: “Da moa reasons I get fo reach one goal, da less chance fo me give up.”

7. Wat wen help Julio an his wife reach dea goal?

⁷ Hang out wit guys dat going help you reach yoa goal. (Smart Guys 13:20) Look wat wen help Julio an his wife reach dea goal fo preach moa. He tell: “We pick frenz who wen like help us reach oua goal, an we would talk to dem all da time about it. Dey could help us cuz plenny of dem awready wen do someting like dat. Oua frenz would ask us about how tings was goin, an dey would give us good kine words wen we had need um.”

WEN WE NO LIKE DO UM

8. Wat can happen if we work on one goal ony if we feel like? (Go look da picha.)

⁸ Fo real kine, all us get days wen we no like do notting. Dis mean we no can work on oua goal o wat? No. Picha dis: One strong wind is wat push one sailboat wea gotta go. But da wind not strong all da time, an some days no moa any wind. Dis mean dat da guy in da boat no can keep moving? Nah, still can. Some sailboats get one motor o get paddles. Da guy in da boat can use dese fo keep going to wea he gotta. If we like do um o not is like da wind. Some days stay real strong, so we like work on oua goal. An odda days we no like do notting, like no moa wind. So if we work on oua goal ony wen we feel like it, maybe we neva goin reach um. Jus like da guy in da boat look fo odda ways fo get to wea he goin, we can still work on oua goal even if we no feel like it. Even tho not goin be easy, goin be worth it. Befoa we go talk about dis, we go talk about dis question dat might come up.

9. Is wrong fo keep working on one goal wen we no feel like it, o wat? Try tell how come.

⁹ Jehovah like wen us happy fo work fo him. (Songs 100:2; 2 Cor 9:⁠7) If we no feel like working on oua spiritual goal, should we keep doing um? Try look wat Paul wen do. He tell: “Jalike I make my body tough an work um hard.” (1 Cor 9:25-27, NWT) Paul wen make himself do wat was right even wen he neva feel like it. Was Jehovah happy wit wat Paul wen do fo Him? Fo shua! An Jehovah wen reward him cuz he wen work hard.​—2 Tim 4:7, 8.

10. Wat good kine tings goin happen wen you work on yoa goal even wen you no like?

¹⁰ Same same, Jehovah stay happy wen he see us try fo reach oua goal even wen we no feel like it. He stay happy cuz even if we no love wat we stay doing, he know we doing um cuz we get love fo him. Jus like how Jehovah had bless Paul, He goin bless us fo wat we do. (Songs 126:5) Wen us see how Jehovah bless us, dat can make us like doing um even moa. One sistah name Lucyna from Poland tell: “Sometimes, I no like go preach, speshly wen I stay tired. But afta I go out, I feel so happy an dass one unreal gif.” We go see wat we can do wen we no like work on oua goal.

11. How Jehovah help you control yoaself moa betta?

¹¹ Pray fo hold back wen gotta. Wen you hold back wen gotta, dat mean you can control how you feel an wat you do. Mos time, dis mean holding back from doing someting bad. But can even mean control ouaself fo do someting good, speshly wen hard o we no like. Rememba, wen you hold back dass part of da fruit of God’s spesho spirit, so ask Jehovah fo his spesho spirit fo show dat importan quality moa betta. (Luke 11:13; Gal 5:22, 23, NWT) Earlia we wen talk about David an how praya wen help him. He wanted fo study fo himself moa regula. He tell: “I would ask Jehovah fo help me control myself wen gotta. I wen start one good study schedule an wen do um regula kine wit His help.”

12. How Da Teacha 11:4 help us reach oua spiritual goals?

¹² No wait fo tings be perfeck. In dis world, mos times tings neva goin line up perfeck. If we wait fo dat, we neva going reach oua goal. (Read um Da Teacha 11:4.) One braddah name Dayniel tell: “No such ting as da perfeck time. Dass up to you, no wait, you gotta jus start.” One braddah in Uganda name Paul give anodda reason why we no should wait: “Wen we jus start um even wen hard, we give Jehovah someting fo bless.”​—Mal 3:10.

13. Why moa betta fo start wit small goals?

¹³ Start small. Sometimes we no feel like doing oua goal cuz look like too hard fo reach. Dis happen to you o wat? Try break up yoa big goal into smalla ones. If yoa goal is fo come moa betta at one quality, try start by showing um in small ways. If yoa goal is to read da whole Bible, try set um up so you read fo shorta times. We wen talk about Tomáš in da beginning, his goal was fo read da whole Bible in one year but he had hard time. He tell: “I wen come fo see dat it was too much fo me. So I wen hana hou an dis time go moa slow. I wen ony read some verses ery day an den tink about um. Since I wen do dat, I had start fo like reading da Bible.” Cuz a dat, Tomáš wen start fo read um longa. Pretty soon, he wen read da whole Bible.c

NO COME BUM OUT IF SOMETING JAM YOU UP

14. Wat some tings dat can jam us up?

¹⁴ No matta how much we like o how hard we try, still goin have tings dat jam us up. Sometimes, wen we “figga notting bad goin happen,” but den happen, dat can take away da time we need fo work on oua goal. (Teacha 9:12) Maybe we get hard times dat make us lose fight an no moa da mana fo keep goin. (Smart Guys 24:10) Cuz we no stay perfeck, dat can make us ack one way dat not going help us reach oua goal. (Rome 7:23) O maybe us jus tired. (Mat 26:43) Wat can help us if someting jam us up o if we get one bad day?

15. If we jam up, dat mean we gotta give up o wat? Try tell how come. (Songs Fo God 145:14)

¹⁵ Rememba, even if you jam up dat no mean you should give up. Da Bible tell we goin have problems ova an ova again. But it tell we can always get back up again, speshly wit Jehovah’s help. (Read um Songs Fo God 145:14.) Braddah Philip from earlia tell: “I no focus on da times I jam up an no reach my goal. Radda, I look at how many times I get back up an start fo work on my goal again.” David from earlia tell: “I try fo see tings dat jam me up an da bad days as one chance fo show Jehovah how much I love him.” Wen you no stop trying fo reach yoa goal even tho tings jam you up, you prove to Jehovah dat you like make him happy. Garans Jehovah mus be happy too wen he see you doing eryting you can fo reach yoa goal.

16. Wen we jam up wat dat can teach us?

¹⁶ Learn from da times you wen jam up. Tink about how come wen happen an ask yoaself, “I can change someting so no happen again?” (Smart Guys 27:12) Sometimes wen you jam up, dis show dat you neva was goin reach yoa goal anyway. If you feel like dat, try tink about yoa goal again an see if az someting you still can do fo real.d Jehovah not goin tink you wen fail jus cuz you neva reach one goal you no could do.​—2 Cor 8:12.

17. Why good fo rememba wat we awready wen do?

¹⁷ No foget wat you awready wen do. Da Bible tell “God, he erytime do da right ting . . . he no goin foget how plenny you guys wen work fo him.” (Heb 6:10) We no should foget too. Tink about wat you awready wen do—like come frenz wit Jehovah, tell oddas about him, o get baptize. Jus like how you wen work hard an reach yoa spiritual goals befoa, you can keep on working on da goal you get now.​—Php 3:16.

18. Wat we should rememba fo do wen working on oua goal? (Go look da picha.)

¹⁸ Wit Jehovah’s help, you can reach yoa goal, jus like da guy on da boat who stay happy wen he get to wea he like go. But rememba, plenny sailors enjoy da ride. Same ting fo us, wen you no stop working on yoa spiritual goal, no foget fo always be happy wen you see how Jehovah help an bless you. (2 Cor 4:7) If you no give up, you goin get even moa betta good kine tings.​—Gal 6:9.