You Wen Kno?

How we kno music wuz importan in Israel befoa?

Da Israel peopo wen love music. Plenny times da Bible talk about peopo playing instruments an singing songs. About one tenth of da Bible iz songs, like Songs Fo God, Da Love Song, an Da Sad Song. One book about how life wuz like in Bible times wen say dat da Bible show real clear dat da Israel peopo wen use music in all kine ways in dea life.

Music in eryday life. Da Israel peopo wen play music fo show how dey wen feel. (Isa 30:29) Wahines wen play tambourines, sing songs, an wen dance at celebrations like wen had one new king, wen da soldiers had win one war, an wen dey wen get togedda fo worship Jehovah. (Leadas 11:34; 1 Sam 18:6, 7, 1 Ki. 1:39, 40) Da Israel peopo even wen sing songs fo show how soa dey wuz inside wen somebody mahke. (2 Rec 35:25) Easy fo see dat da Israel peopo wen love music plenny.

Da kings of Israel wen love music. King Saul wen bring David to da palace fo play da harp fo him. (1 Sam 16:18, 23) Layta on wen David wen come king, he wen invent instruments fo play music, wen write songs, an wen put togedda one orchestra dat wen play at Jehovah’s temple. (2 Rec 7:6; Amos 6:5) King Solomon wen have guy an girl singas in his palace.​—Teacha 2:8.

Da Israel peopo wen use music fo worship Jehovah. In fact, 4,000 guys wen play music at da temple in Jerusalem. (1 Rec 23:5) Dey wen play cymbals, string instruments, harps, an trumpets (2 Rec 5:12) But dese professionals no wuz da ony ones who wen worship Jehovah wit music. Plenny of da Israel peopo wen sing wen dey wuz goin Jerusalem fo celebrate da festivals ova dea. Dese songs wuz called da Songs of da Ascents. (Songs 120-134) From wat da Jewish writings wen tell, da Israel peopo wen sing some of da Songsa Passova time.

Music iz still supa importan to Jehovah’s peopo today. (Jam 5:13) We sing songs to Jehovah fo tell how awesome him. (Efe 5:19) We feel moa close to oua braddahs an sistahs wen we sing songs to Jehovah togedda. (Col 3:16) An it make us moa strong wen we go tru hard time. (Jesus Guys 16:25) Music iz one awesome way fo show oua fait in Jehovah an how much we love him.