Help Fo Study Regula

YOU get hard time study da Bible ery week fo yoaself? You feel like sometimes az boring? Fo shua we feel lidat sometimes. But tink about odda tings we do regula, like we bocha eryday. Take time an work, but we feel betta afta. Jus lidat, studying da Bible can make us feel betta. (Efe 5:26) Hea some stuff dat can help:

• Make one skedule. Studying da Bible fo yoaself iz one of da “bestes kine stuff” one Christian gotta do. (Php 1:10) Fo help you follow yoa skedule, put um someplace wea you can see um, like on one board on da wall or da icebox. Anodda ting you can do fo remind you fo study iz you can set one reminda on yoa phone.

• Pick da bes time an way fo study dat work fo you. Iz it moa easy fo you focus fo one longa time or plenny shorter times? You kno wass bes fo you. So try tink about dese tings wen you plan wen you goin study. Wen time fo study, an you no like, jus try um fo ten minutes. Ten minutes of study iz moa betta den notting. Den once you start, maybe you goin like keep goin.​—Php 2:13.

• Choose wat fo study befoa you study. If you ony tink about um wen iz time fo study, dass jalike wase time. (Efe 5:16) Try make one lis of stuff you like study. If you get questions about someting, write um down. An wen you pau yoa study sesh, write down odda stuff you like study about.

• Be flexible. Try be flexible wit yoa skedule like how long you study or wat you pick. Wat matta da mos iz not wen, how long, or wat you study, but dat you study regula.

If we study ery week, good tings goin happen. We goin come moa close to Jehovah, we goin make good choices, an we goin feel betta.​—Josh 1:8.