How War An Fighting Affeck All Us
“Right now all ova da world get da mos fighting goin on since World War II. 2 billion peopo in da world, dass 1 out of ery 4 peopo, live wea get fighting.”
United Nations Deputy Secretary-General Amina J. Mohammed, January 26, 2023.
In places wea you neva tink would happen, war an fighting can start. Even peopo dat live in one place wea no moa war can suffa. An even afta da fighting stay pau, da suffaring las long time. Try look dese exampos:
No moa nuff food. Da World Food Programme tell, “Da main reason why plenny peopo no moa nuff food iz cuz dey live in one place wea get war an fighting.”
Physical an mental healt kine problems. In one place wea war could start any time, da peopo dea can feel plenny stress an anxiety. Peopo dat live wea get fighting get moa chance fo get hurt, an dey can suffa from depression an stuff lidat. An plenny times dey get hahd time fo get help from one doctor.
Forced fo move. Da United Nations High Commissioner fo Refugees wen tell dat up to Septemba 2023, moa den 114 million peopo all ova da world had fo runaway from wea dey live. Da main reason iz cuz of war an fighting.
War makes da economy moa worse. Cuz of war, plenny peopo suffa from money kine problems. One reason iz tings can cost moa den befoa. Anodda ting iz plenny times da govament use moa money fo dea military dat suppose to be fo skools an healt kea. An afta one war, cost plenny money fo fix up eryting.
Da eart get buss up. Peopo suffa wen da land dey live on get buss up cuz of war. Peopo can get all kine healt problems dat las long time cuz da water, air, an da land come pilau. An even afta da war, peopo can still get hurt or mahke cuz of land mines dass lef behind.
Fo shua, war make choke problems an cost plenny money.