Can Peopo Hemo War An Fighting?
Get plenny reasons how come peopo fight. Some peopo fight fo change tings in politics, da economy, or fo be treated fair. Odda peopo fight fo get control ova da land an da tings dat come from um like oil, wood, an odda tings. Some peopo fight cuz dea culture or wat dey believe stay diffren. Wat govaments doin fo stop da fighting an get peace? Can dey do um?
Drazen_/E+ via Getty Images
MAKE DA ECONOMY BETTA
Wat dey like do: Make um so dat peopo live betta. Plenny times peopo fight cuz da way dey live not da same az odda peopo. If da govament make da economy betta, den less chance fo peopo fight.
Why az hard fo do: Cuz da govament would have fo change how dey spend money. All ova da world, in 2022, govaments wen spend ova 34 billion dollars (US) fo help peopo have one betta life. But same time, dass notting wen you compare um to wat dey wen spend on stuff fo da military.
“We spend way moa money trying fo help peopo dat stay affeckted by war den trying fo stop wars from happening.”—António Guterres, secretary-general of da United Nations.
Wat da Bible tell: Da govaments an huis in dis world can help da pooa, but dey no can eva make um so dat nobody pooa.—Da Rules Secon Time 15:11; Matthew 26:11.
MAKE DEALS FO PEACE
Wat dey like do: Govaments get togedda fo talk an make deals dass good fo both sides. Dey do dis fo try make peace.
Why az hard fo do: Sometimes da govaments no like work tings out, give up someting, or make one deal. An plenny times govaments no stick to da deals dey wen make.
“Tings no always work wen govaments try fo make deals. Sometimes da deal is so bad dat dey end up fighting moa layta on.”—Raymond F. Smith, American Diplomacy.
Wat da Bible tell: Peopo should “work hard fo be frenz wit erybody.”(Songs Fo God 34:14) But plenny guys today no “show respeck fo wass good . . . dey no goin give chance to nobody . . . dey goin set up odda peopo.” (2 Fo Timoty 3:1-4) Cuz peopo ack lidis, da govament guys no can stop war an fighting no matta how hard dey try.
CUT BACK OR HEMO WEAPONS
Wat dey like do: Cut back or hemo weapons, speshly da nuclear, chemical, an biological kine.
Why az hard fo do: Plenny times govaments no like give up dea weapons cuz dey sked dey goin lose powa or no can proteck demself. Even if da govaments hemo all dea weapons, dat no get rid of how come peopo fight.
“Afta da Cold War in 1991, plenny of da govaments wen make promises fo make da world moa safe. Dey wuz suppose fo get rid of dea weapons, stop fighting, an make peace wit odda countries. But dey neva keep dea promises.”—“Securing Our Common Future: An Agenda for Disarmament.”
Wat da Bible tell: Peopo should get rid of dea weapons an “take dea swords, an make um come plows.” (Isaiah 2:4) But fo hemo war, peopo gotta change dea heart an no like fight.—Matthew 15:19.
HUI UP FO PROTECK EACH ODDA
Wat dey like do: Govaments hui up fo help each odda go agains dea enemy. Dey tink dat if dey hui up, dea enemy not goin like start one war an fight agains moa countries.
Why az hard fo do: Wen govaments hui up fo proteck each odda agains da enemy, dat no mean garanz goin have peace. Govaments no always do wat dey promise, an dey no always agree about wat dey goin do agains da enemy or wen dey goin do um.
“Even tho da League of Nations an da United Nations wen work hard fo get govaments fo hui up, dat neva stop war from happening.”—“Encyclopedia Britannica.”
Wat da Bible tell: Mos times tings go betta wen moa peopo work togedda. (Da Teacha 4:12) But govaments no can make real peace dat goin las. Songs Fo God 146:3, 4 tell, “No trus some guy jus cuz he one leada guy . . . cuz he ony one guy! He no goin get you outa trouble . . . bumbye he no goin breave no moa, he goin go back inside da groun . . . eryting da guy plan fo do goin come poho.”
Even tho plenny govaments wen try hard fo make peace, we still get war.