How War An Fighting Goin Pau

GOD GOIN HEMO HUMAN GOVAMENTS

God goin hemo human govaments in one war dat da Bible call Armageddon.a (Jesus Show 16:16) Dat time, “all da king guys in charge in da whole world” goin come togedda “fo fight on da Big Day fo Da God Dat Get All Da Powa.” (Jesus Show 16:14) Armageddon iz da las war dat goin pau all wars.

God goin get rid of human govaments an his Govament, or Kingdom, goin rule from heaven an iz goin las foeva. (Daniel 2:44) God wen pick his Boy, Jesus Christ, fo be da King. (Isaiah 9:6, 7; NWT, Matthew 28:18) Dis da Govamentb dat Jesus wen teach his followas fo pray fo. (Matthew 6:9, 10, NWT) Erybody goin live unda dis govament wit Jesus az dea Rula.

Jesus not like human rulas. He no goin use his powa fo ony do tings he like do. Cuz Jesus treat erybody fair, you no need worry dat you goin be treated bad cuz of wat you look like or how you wuz raised. (Isaiah 11:3, 4) An nobody need fight fo be treated fair. How come? Cuz Jesus goin like take kea ery one of us. “Da peopo dat need plenny, an da ones dat no mo nobody fo help dem, wen dey yell fo help . . . He goin get um outa trouble . . . Wen odda peopo make any kine to da pooa peopo an bus um up . . . [he] make shua dey stay alive . . . [he] kea plenny bout dat.”​—Songs Fo God 72:12-14.

God’s Govament goin hemo all da weapons on eart. (Micah 4:3) An it goin hemo all da bad peopo dat no like stop fighting an hurting oddas. (Songs Fo God 37:9, 10) Erybody goin feel safe weaeva dey go on eart.​—Ezekiel 34:28.

Wen God’s Govament takes ova, all da peopo goin have one perfeck life. Iz goin hemo all da problems dat make peopo fight, like no mo nuff money or food, an no moa place fo live. Erybody goin have choke ono kine food an goin have one nice place fo live.​—Songs Fo God 72:16; Isaiah 65:21-23, NWT.

God’s govament goin hemo all da bad tings dat wen happen cuz of war. It goin take away all da physical, mental, an emotional pain dat peopo wen go tru. Even da peopo dat wen mahke goin come back to life an live on eart again. (Isaiah 25:8; 26:19; 35:5, 6) Families goin be togedda again an no goin get bad kine memories of war cuz “all dose tings dat wen happen befoa going be pau.”​—Jesus Show 21:4, NWT.

GOD GOIN HEMO SIN

Wen God’s Govament rule ova da eart, erybody goin worship Jehovahc, da ony tru God, who “get plenny love an aloha . . . an help [erybody] stay good wit each odda.” (2 Fo Da Corint Peopo13:11) Peopo goin learn how fo live good togedda. (Isaiah 2:3, 4; 11:9) Da guys who lissen wat God tell no goin have sin an goin come perfeck.​—Fo Da Rome Peopo 8:20, 21.

GOD GOIN HEMO SATAN AN HIS BAD ANGELS

God’s Govament goin hemo Satan an his bad angels, da ones dat get peopo fo fight wars. (Jesus Show 20:1-3, 10) Witout dem aroun, “goin get plenny peace.”​—Songs Fo God 72:7, NWT.

You can kno fo shua dat God’s promise fo hemo war an fighting goin come tru. He get da powa fo hemo war an he really like do um.

• God get da smarts an da powa fo stop war an fighting. (Job 9:4) No moa notting can stop him from doin wat he like.​—Job 42:2.

• God hate fo see peopo suffa. (Isaiah 63:9) An “he hate da peopo dat like bus up odda peopo.”​—Songs Fo God 11:5.

• God always do wat he say he goin do, he no can lie.​—Isaiah 55:10, 11; Titus 1:2.