How Fo Find Peace Even Tho Get War An Fighting
Gary, who used to be in da military, wen tell, “Befoa I had study da Bible, I neva kno how come tings no wuz fair an how come bad tings happen. But I no worry about dat anymoa. I kno dat Jehovah God goin make da world one safe place.”
Gary not da ony one dat feel lidis. Try look how da Bible wen help oddas..
DA BIBLE TELL: “You my Boss, an you get one good heart. You stay ready erytime fo let me go fo da bad tings I wen do.”—Songs Fo God 86:5.
HOW DIS HELP: “Dis scripcha help me fo kno dat Jehovah really kea about me an like fogive me. I kno he goin let me go fo all da tings I wen do in war.”—Wilmar, Colombia.
DA BIBLE TELL: “Look! I stay make one new sky an new earth. Nobody goin rememba da stuff dat wen happen befo time. Nobody goin even tink bout dat.”—Isaiah 65:17.
HOW DIS HELP: “Cuz of wat I wen go tru in da military, I suffa from post-traumatic stress disorder (PTSD) an depression. Dis scripcha help me rememba dat pretty soon, Jehovah goin make me foget all da bad memories I get. Dey goin be gone foeva. Dass one awesome gif!”—Zafirah, United States.
DA BIBLE TELL: “All da time dat he rule, da peopo dat do wass right goin be like grass dat grow all ova, an goin get plenny peace foeva jus like da moon stay foeva.”—Songs Fo God 72:7, NWT.
HOW DIS HELP: “I tink about dis scripcha all da time. Pretty soon war an all da bad tings dat come wit it goin be pau, an we not goin worry anymoa about da guys we love being safe.”—Oleksandra, Ukraine.
DA BIBLE TELL: “Yoa mahke guys goin come alive one mo time! . . . All you guys dat was inside da dirt, wake up an yell cuz you feel good inside!”—Isaiah 26:19.
HOW DIS HELP: “Almos erybody in my ohana had get kill wen peopo from da odda tribe wen try fo kill all da Tutsi tribe. But dis scripcha help me kno fo shua dat I goin see dem again. I no can wait fo hea dem again wen dey come back to life!”—Marie, Rwanda.
DA BIBLE TELL: “Ony litto bit moa, an no goin get da peopo dat do bad kine stuff . . . But da peopo dat no get big head . . . dey da ones goin get da land dat Da One In Charge wen promise dem, an dey goin stay good inside cuz eryting go good fo dem.”—Songs Fo God 37:10, 11.
HOW DIS HELP: “Even tho da war stay pau, tings still not fair an still get bad peopo. Dese scripchas wen really help me. Jehovah see eryting an undastan wat I goin tru. He promise dat real soon nobody goin suffa an rememba da bad tings dat wen happen.”—Daler, Tajikistan.
Da peopo dat dis magazine wen talk about iz jus some of da millions of Witnesses Fo Jehovah dat da Bible wen help fo find peace. Dey wen learn fo no hate oddas cuz dey no like um, cuz dey look diffren, come from odda countries, or tribes. (Fo Da Efesus Peopo 4:31, 32) Witnesses Fo Jehovah no take sides in politics an neva goin be paht of wars or fighting.—John 18:36.
Witnesses Fo Jehovah take kea each odda like one big ohana wit plenny love. (John 13:35) Try look wat wen happen to Oleksandra, who we wen talk about befoa. She had fo run away wit her sistah to anodda country cuz of war. She tell, “Right afta we had cross da border, had Witnesses waiting ova dea ready fo take kea us. Cuz we wuz refugees, dea help wen make um moa easy fo us live in da new country.”
We like you come oua meetings wea you can learn how da Bible can help you find peace now an how goin get peace all ova da world bumbye. Go look jw.org/hwc fo find one meeting place nea you or fo ask dat one Witness Fo Jehovah come help you learn moa about da Bible fo free, wit da book You Can Live Good Foeva!