Questions Readas Get
Wen da preaching work goin pau?
Jesus wen say, “All ova da world goin get peopo dat goin tell all da Good Kine Stuff bout how fo get God fo dea king. All da diffren kine peopos goin hear wass fo real, an den, eryting goin come pau.” (Mat 24:14) Da Greek word fo “pau” in dis verse, an in verses 6 an 13, mean da end of Satan’s world at Armageddon. (Jesus Show 16:14, 16) So dis mean we goin preach all da way up until right befoa Armageddon. Dis iz one change from wat we use to undastan.
We use to tink dat we wuz goin stop preaching wen Babylon Da Great get wipe out at da big trouble. (Jesus Show 17:3, 5, 15, 16, NWT.) We wen tink befoa dat once da big trouble start, peopo no moa chance awready fo lissen to da good news. (Isa 61:2) An we use to tink dat da guys who would make um tru da big trouble wuz faitful befoa da ting would start. We wen compare um to da Jews who wen survive wen Jerusalem wen get wipe out in 607 B.C.E. Dese guys wen get one mark on top dem earlia fo get save cuz dey wen worship Jehovah an hate wass bad. (Eze 5:11; 9:4) But dis no match up wit Matthew 24:14 wea Jesus wen say dat peopo goin get chance fo lissen to da good news all da way up until right befoa Armageddon.
Cuz we undastan Matthew 24:14 moa betta now, we gotta change up wat we kno about Jesus Show 16:21 dat talk about one hailstorm message. Afta we wen check um out moa betta, we wen see dat da two scripchas back each odda up. Wat help us undastan dat, iz how da peopo reack to da message. Paul wen say dat fo da guys who goin get save, da message iz good news like one “sweet smell.” But fo da guys who go agains God, goin be bad news like one “hauna kine smell.” (2 Cor 2:15, 16) Dey hate da message cuz it show dat da world iz wicked, Satan iz da rula, an dat it goin get wipe out.—John 7:7; 1 John 2:17; 5:19.
Da hailstorm dat Jesus Show 16:20 talk about goin be so bad. Dat mean dat wen da big trouble come, da preaching work goin hit hahd. Goin be moa powaful an goin reach moa peopo den eva befoa. An cuz of dat, moa peopo goin kno Jehovah’s name. (Eze 39:7) Dat time afta Babylon Da Great get smash, some maybe goin like da message, goin be like one sweet smell to dem. Maybe dey goin rememba dat Witnesses Fo Jehovah wen talk about dat fo long time awready about wat goin happen to Babylon Da Great, an now dey goin see um all coming tru.
Someting lidat wen happen in Egypt afta da Ten Plagues. Afta Jehovah wen show dat da Egypt gods wuz notting, “plenny guys from da odda peopos” wen join up wit Jehovah’s peopo. (Egypt 12:12, 37, 38) Dese guys maybe wen choose fo lissen to Jehovah wen dey wen see wat Moses wen say about da Ten Plagues had come tru.
Anybody who follow Jehovah afta Babylon Da Great get wipe out goin have chance fo support Christ’s braddahs who goin still be on top da eart. (Mat 25:34-36, 40) But dat chance fo be judge az sheep goin pau wen da anointed go heaven right befoa Armageddon.
Dis new undastanding show how much love an pity Jehovah get. “He like erybody fo come sorry an no do all da bad kine stuff no moa. He no like nobody get cut off from him!”—2 Pet 3:9.