Questions Readas Get

Da guy dat wen write Smart Guys 30:18, 19 wen say, “How one guy make um fo one young wahine like um” stay “too much . . . fo undastan.” Wat he wen mean?

Smart Guys 30:18, 19 tell, “Get three ting dat too much fo me, I no can undastan: How da eagle can go inside da sky? How da snake can go on top one big rock? How da big boat can go inside da middo a da deep ocean? An da numba four ting dat I no can undastan, cuz I donno: How one guy make um fo one young wahine like um?! Dis too, too much fo me fo undastan!” Plenny guys like undastan wat dose verses mean, even guys dat kno choke about da Bible.

Wea da verse say, “how one guy make um fo one young wahine like um,” befoa we used to tink dat wuz someting bad. How come? Cuz da verses aroun um talk about tings dat iz bad. (Smart Guys 30:15, 16) Verse 20 talk about one “wahine [dat] fool aroun behind her husban back” an say dat she “neva do notting wrong!” So we thought in verse 19 wea it talk about one eagle, snake, an big boat all moving witout anybody knowing wat wuz happening, wuz like one girl wen get tricked fo have sex wit one guy witout knowing wat wuz happening.

But look like get reason fo believe dat dese verses stay talking about someting good. Da writa stay talking about tings dat blow his mind.

Even ol Hebrew writings show dat dis verse stay talking about someting good. Da Theological Lexicon of da Old Testament tell dat da Hebrew word fo “I no can undastan” at Smart Guys 30:18 mean someting dass awesome or unreal.

Professor Crawford H. Toy at Harvard University in da United States also wen say dat dese verses stay talk about someting good. He tell, “Da writa wuz trying fo say how dese tings iz awesome.”

So make sense fo say dat Smart Guys 30:18, 19 stay talking about tings dat blow oua mind. We feel jus like da Bible writa. Iz so unreal how one eagle can fly way up in da sky, how one snake can move ova da rocks real fas even tho no moa legs, how one big boat can go across da sea, an how one guy an one wahine can fall in love an live happy togedda.