How Fo Show You Tankful Fo Da Ransom

1-2. Wat we like do cuz of da ransom, an how come? (2 Fo Da Corint Peopo 5:14, 15) (Go look da picha.)

IF YOU wuz trapped unda one building dat wen fall down an somebody wen save you, how you would feel about him? Garantee you neva goin foget how he wen save yoa life an you goin do eryting you can fo show him you tankful.

² In da las lesson, we wen learn how we need somebody fo free us up from sin an death. An dass wat Jehovah wen do. He wen give us da ransom so dat he can (1) fogive oua sins, (2) heal us from da sin dat we stay stuck in, (3) an make um so dat we can come close wit him. An cuz of da ransom, we get da hope fo live foeva in paradise. Fo shua da ransom show dat Jesus love peopo plenny. If fact, he wen love peopo way befoa he wen come to da eart. (Smart Guys 8:30, 31) Paul wen write “Christ wen get choke love an aloha fo erybody. Dass why us guys like do wat we gotta do.” (Read um 2 Fo Da Corint Peopo 5:14, 15.) Dis mean dat da love Jesus get goin make us like show dat we tankful fo wat he wen do fo us an we neva goin foget dat.

3. How come da way you show you tankful fo da ransom goin be diffren from oddas?

³ How you goin show you tankful fo da ransom? Yoa ansa might be diffren from somebody else. How come? Try picha dis, get three diffren peopo coming from diffren spots, but dey all heading to da same place. Da way each of dem get dea goin be diffren. Same same, da way you show you tankful fo da ransom goin depend on wea you stay in yoa relationship wit Jehovah now. Wedda you one (1) Bible study, (2) baptized Christian, (3) or one Christian not close to hui right now, dis article goin talk about how you can show you tankful fo da ransom.

BIBLE STUDIES

4. How Jehovah feel about da guys who study da Bible?

⁴ If you studying da Bible, try tink about dis: Da fact dat you like kno bout Jehovah show dat he helping you, an he like you come his fren. (John 6:44; Jesus Guys 13:48, NWT) Jehovah see wass in yoa heart. He see all you do fo learn about him, an he supa happy wen you make changes fo live da way he like. (Smart Guys 17:3; 27:11) Cuz of da ransom, you can come Jehovah’s fren. (Rome 5:10, 11) Always rememba dat.

5. How Fo Da Philippi Peopo 3:16 help one Bible study?

⁵ If you studying da Bible, how you can show you tankful fo da ransom? One way iz fo do wat Paul wen tell da Philippi peopo: “You guys stay good how you stay, so stick wit da stuff you know an do um.” (Php 3:16) So from wat Paul tell, no let nottin stop you. Keep goin on da “road dat take you to life.”​—Mat 7:14, NWT; Luk 9:62.

6. Wat can Bible studies do if dey having hahd time undastan someting or make changes? (Da Rules Secon Time 30:11-14) (Go look da picha.)

⁶ Wat if iz not easy fo you believe someting you jus wen learn from da Bible. Try do research an pray to Jehovah fo help you undastan um moa betta. (Songs 86:11) If you still get hahd time undastan um, try no worry bout um too much fo right now. Jus keep studying da Bible. You probly goin undastan um moa betta layta on. An wat if iz not easy fo stop doin someting dat Jehovah no like? Rememba dat wateva Jehovah ask us fo do, iz neva too hahd. So you can live da way he like you fo live. (Read um Da Rules Secon Time 30:11-14.) An he promise fo help you. (Isa 41:10, 13; 1 Cor 10:13) So no give up, keep trying. No tink too much bout wat iz hahd fo you, but tink bout all da good tings Jehovah doin fo you. Like how he wen sen His boy fo die fo you. Wen you come fo love Jehovah moa, you goin see dat all “da stuff he tell fo do, az not too hard.”​—1 John 5:3.a

7. If you young an raise in da truth, wat you can tink about?

⁷ If you iz young an raised in da trut, you kno dat you one Bible study too? In fact, you da mos importan Bible study yoa parents get. Da Bible tell, “Come close to God, an he goin come close to you.” (Jam 4:8; 1 Rec 28:9) So wen you do tings fo come good frenz wit Jehovah, he goin do tings fo come good frenz wit you. Jehovah no look at you jus cuz you wen grow up in one witness family. But he look at you cuz he like be good frenz wit you. So wat Jehovah wen do so dat can happen? He wen give you da ransom, one special gif. Always rememba dat. (Rome 5:1, 2) So befoa you go to da Memorial dis year, try tink bout wat Jesus sacrifice means fo you. Dis goin help you like keep working on yoa spiritual goals fo show Jehovah you tankful.b

BAPTIZED CHRISTIANS

8. How da guys dass baptize show dey tankful fo da ransom?

⁸ If you baptize, you awready wen show in plenny ways dat you tankful fo da ransom. Like you wen make plenny changes in yoa life fo live da way Jehovah like. You wen lissen to wat Jesus tell an go preach. You wen give yoa life to Jehovah an get baptize. An even if you had fo deal wit peopo giving you hahd time cuz you serve Jehovah, you neva let dat stop you. Dis show you love Jehovah an tankful fo da ransom.​— 2 Tim 3:12, Heb 12:2, 3, NWT.

9. Wat baptized Christians gotta watch out fo?

⁹ If we baptize, we gotta watch out dat we no take da ransom fo granted. How dat can happen? Try tink about wat Jesus wen tell da braddahs an sistahs in Efesus. He wen tell dem wuz good dat dey wen hang in dea. But same time he wen tell dem: “I get dis agains you guys, dat you guys no mo love an aloha jalike wen you guys wen trus me firs time.” (Jesus Show 2:3, 4) So from wat Jesus wen say, one Christian could start fo jus go thru da motions wen doin tings fo Jehovah. Like he could be praying, goin meetings an field service, but his heart no really in um. He not doin um out of love anymoa. Wat you can do if you feel like yoa love fo Jehovah iz not az strong az befoa?

10. How you can do wat Paul wen tell Timoty? (1 Timoty 4:13, 15)

¹⁰ Wen come to da tings dat Timoty had do fo Jehovah, da aposal Paul wen tell him fo “do dose tings erytime ova an ova” an “go all out fo do um”. (Read um 1 Timoty 4:13, 15.) You can do dat too. Try tink of ways you can “go all out wen you work fo Da One In Charge.” (Rome 12:11) Maybe you can spen moa time studying fo da meeting so you can pay attention moa betta wen you dea. Or maybe you can go somewea quiet fo do personal study so you can tink moa deep bout wat you learning an get moa outa um. If you do dese tings, dat goin help you stay tankful fo da ransom an eryting Jehovah give you. Iz jalike like you stay adding wood to one fiyah fo keep um burning. An befoa da Memorial, try tink about da blessings you get cuz you one Witness Fo Jehovah. Fo shua dat goin help you be even moa tankful fo da ransom cuz dass da reason you can be good frenz wit Jehovah.

11-12. If sometimes you no feel like goin all out fo Jehovah, dat mean you no moa his spesho spirit? (Go look da picha.)

¹¹ Even if you feel like you not goin all out fo Jehovah like you wen do befoa, no beat yoaself up an tink dat you no moa Jehovah’s spesho spirit. Try tink about wat Paul wen write to da Corint peopo. He wen tell, “If I do um cuz I gotta do um, den az jalike God stay trus me fo take kea his stuffs fo him.” (1 Cor 9:17) Wat he wuz talking about?

¹² Sometimes Paul neva like preach, but he wen do um anyway. Us too, we goin have times wea we no feel like doin da stuff Jehovah ask us fo do. But we like copy Paul an jus do um. We can pray to Jehovah fo help us like do um an have da powa fo do um (Php 2:13) If you keep doin da tings dat help you stay close to Jehovah, den garantee yoa love fo him goin come moa strong again.

13. How we can “check out real good” how we stay?

¹³ Sometimes iz good fo do wat 2 Fo Da Corint Peopo 13:5 tell: “Look inside you fo make shua you guys trus Christ fo real kine. Check out real good how you stay.” Can ask yoaself, ‘I making God’s Govament da main ting in my life?’ (Mat 6:33, NWT) ‘Da stuff I watch an do fo fun show dat I hate da stuff dass bad?’ (Songs 97:10) ‘I keep da peace wit my braddahs an sistahs?’ (Efe 4:2, 3) Da Memorial iz one good time fo check ouaselfs, cuz dass da time dat we really like show dat we tankful fo da ransom.c

CHRISTIANS WHO NOT CLOSE WIT DA HUI RIGHT NOW

14. How come some Christians stop goin meetings?

¹⁴ Some braddahs wen stop goin to da meetings even afta dey wen serve Jehovah fo long time. How come? Some wen start fo worry about all kine stuff. (Luk 21:34) Oddas wen get mad cuz somebody wen do or say someting fo rub dem da wrong way. (Jam 3:2) Oddas wen do someting real bad an neva ask fo help. Wateva it wuz, wat can help you be close wit Jehovah’s family again? Wat da ransom can make you like do?

15. How Jehovah show he kea about da guys dat wen stray away? (Ezekiel 34:11, 12, 16)

¹⁵ Try tink about how Jehovah feel about da guys who wen stray away. He no foget dem an he not mad at dem. Dey jalike his sheep dass los an he looking fo dem. He feed an help dem fo come back to him. (Read um Ezekiel 34:11, 12, 16.) You tink Jehovah doin dat fo you? Garantee! Da fact dat you reading dis show dat you still yet love him. Jehovah wen see someting good in you, an dass how come he wen bring you into his hui. An he still see da good in you, an dass why he like you come back into his family.

16. Wat can help somebody come back to Jehovah? (Go look da picha.)

¹⁶ Try tink about dese real encouraging words inside da Return to Jehovah brochure: “Garanz Jehovah goin be dea fo you wen you trying to come back to him. He goin help you deal wit all da stuff you worry about an da hurt feelings you get. An he goin fogive you so you can have one good conscience. All dis goin make um easier fo you serve Jehovah wit yoa braddahs an sistahs again.” An rememba da eldas like help you too. Dey can be jalike “one place fo da peopo hide from da strong wind o da rain.” (Isa 32:2) Fo make tings right wit Jehovah an show you tankful fo da ransom, wat you can do now? (Isa 1:18, NWT; 1 Pet 2:25) Go to one meeting. Talk to da eldas fo get help. Dey might even set up one Bible study fo you. Wateva you do fo come back to Jehovah an show you tankful fo da ransom, Jehovah goin bless you fo dat.

HOW YOU GOIN SHOW YOU TANKFUL?

17-18. Wat we can do befoa dis year’s Memorial?

¹⁷ Talking about da ransom, Jesus wen say, “erybody dat trus me no goin get cut off from God foeva! Dey goin get da real kine life dat goin stay to da max foeva!” (John 3:16) Da ransom iz how Jehovah save us from sin an death. We always like be tankful fo dat. (Rome 3:23, 24; 2 Cor 6:1) Befoa da Memorial, iz good fo us take time fo tink about da love dat Jehovah an Jesus wen show, cuz dat goin move us fo like show oua love fo dem.

¹⁸ How you goin show you tankful fo da ransom? Wat you say maybe goin be diffren from somebody else. But kno fo shua dat Jehovah goin bless you an all yoa braddahs an sistahs aroun da world who “no do stuffs fo ony dem no moa. Dey do eryting ony fo Christ, da Guy dat wen mahke fo dem.”​—2 Cor 5:15.