Մեքսիկայի բանտերում հանցագործները վերափոխվում են
Մեր թղթակիցը՝ Մեքսիկայից
ՀԱՃԱԽ կարելի է լսել, թե հանցագործներին բանտարկում են վերադաստիարակելու նպատակով։ Սակայն հանցագործին հնարավոր չէ վերադաստիարակել՝ պարզապես նրան ազատազրկելով։ Կյանքում փոփոխություններ կատարելու ցանկությունը պետք է բխի անհատի մտքից ու սրտից։ Նախքան դա նա պետք է անկեղծ զղջա նախկինում իր կատարած սխալ արարքների համար և ցանկանա այլ կերպ վարվել։ Աշխարհի բազմաթիվ բանտերում Աստվածաշնչի կրթական ծրագրի միջոցով Եհովայի վկաները լավ արդյունքների են հասել։ Եկեք տեսնենք, թե ինչպես է դա իրականացվում Մեքսիկայում։
Եհովայի վկաները Մեքսիկայում 150 բանտեր են այցելում՝ առաջարկելով Աստվածաշնչի ընթերցանության ծրագիր, ինչպես նաև բարոյականության ու աստվածաշնչյան ուսմունքների վերաբերյալ անցկացնելով կրթական դասընթացներ։ Օրինակ՝ Սյուդադ Խուարեսի (Չիուաուա) ուղղիչ աշխատանքային գաղութում նրանք կանոնավորաբար քարոզում են մոտ 1200 բանտարկյալների։ Վերջիններս մեծ հարգանքով են լցված Վկաների հանդեպ և նույնիսկ պաշտպանում են նրանց վտանգավոր իրավիճակներում։ Մի անգամ, երբ բանտարկյալները խռովություն էին բարձրացրել բանտում, տեղի հեղինակավոր հանցագործներից մի քանիսը ճնշեցին այն, որպեսզի Վկաները կարողանային բարեհաջող կերպով դուրս գալ բանտից։
«Արթնացե՛ք» պարբերագրի 2001 թ. մայիսի 8–ի համարում տպագրված «Կարո՞ղ են արդյոք հանցագործները փոխվել» (ռուս., անգլ.) հոդվածը գրավեց բանտարկյալների, ինչպես նաև բանտապետների ուշադրությունը։ Սան Լուի Ռիո Կոլորադո քաղաքի (Սոնորա նահանգ) ուղղիչ աշխատանքային գաղութում 12 Եհովայի վկա այդ պարբերագրից տարածեցին 2149 օրինակ։
Երբ բանտարկյալները անկեղծ հետաքրքրություն են ցուցաբերում, Վկաները ամեն շաբաթ վերադառնում են Աստվածաշունչ ուսուցանելու և կրոնական միջոցառումներ անցկացնելու։ Սակայն որքանո՞վ է աստվածաշնչյան այս կրթությունը արդյունավետ եղել հանցագործներին վերափոխելու հարցում։
Բանտարկյալները սկսում են ծառայել Աստծուն
Ջորջ անունով մի բանտարկյալ դեռ 20 տարին չլրացած սկսել էր զբաղվել հանցագործությամբ։ Լաս Թրես Մարիասի ուղղիչ աշխատանքային գաղութում 13 տարի ազատազրկված մնալուց հետո նա ազատ էր արձակվել։ Սակայն կարճ ժամանակ անց նորից սկսել էր զբաղվել թմրանյութերի առևտրով։ Նա դարձավ վարձկան մարդասպան և հատուկ պատվերով սպանություններ էր կատարում։ Ի վերջո նա մեղադրվեց 32 մարդ սպանելու մեջ։ Բանտում Ջորջի իրավաբանները տեղեկացրին նրան, որ հանցագործ աշխարհի իր նախկին տերերը պատրաստ են մեծ գումար վճարել իրեն բանտից ազատելու համար։ Այդ մարդիկ ուզում էին, որ նա մեկ հոգու էլ սպաներ։ Սակայն այդ ժամանակ Ջորջը արդեն Աստվածաշունչ էր ուսումնասիրում Եհովայի վկաների հետ։ Նա հոգևորապես առաջադիմել էր և արդեն պատրաստ էր մկրտվել ու դառնալ լիաժամ քարոզիչ։ Արդյոք նա կնախընտրե՞ր ազատ արձակվել և աշխատել որպես վարձկան մարդասպան, թե՞ կմնար բանտում և կծառայեր Եհովային։ Ջորջը պատասխանել էր. «Ես նախընտրում եմ մնալ բանտում և վճարել այն ամեն վատ արարքների համար, որ կատարել եմ։ Հիմա ես ծառայում եմ Եհովա Աստծուն՝ Տիեզերքի Տիրոջը»։ Նա հավատարմորեն ծառայեց Աստծուն մինչև մահ՝ իր մեջ վառ պահելով հարության հույսը։ Բանտի նրա ընկերները, որոնք նույնպես Աստվածաշունչ են ուսումնասիրում, այսպես են արտահայտվում նրա մասին. «Նա ‘ճանաչեց ճշմարտությունը և ճշմարտությունը ազատեց նրան’» (Յովհաննէս 8։32)։
Դեյվիդը, որը 110 տարով ազատազրկված էր սպանության, մարդկանց առևանգման և գողության համար, բանտարկված էր անվտանգության բարձր համակարգ ունեցող հատուկ բաժնում, որը նախատեսված է վտանգավոր հանցագործների համար։ Սակայն Եհովայի վկաների հետ Աստվածաշունչ ուսումնասիրելու արդյունքում իր վարքում նշանակալից փոփոխություններ կատարելու շնորհիվ նա հատուկ թույլտվություն ստացավ բանտապահի հսկողությամբ հաճախել ժողովի հանդիպումներին։ Առաջնորդվելով Աստվածաշնչի պահանջներով՝ նա այնպիսի փոփոխություններ կատարեց իր կյանքում, որ այժմ մասնակցում է քարոզչական գործին և աստվածաշնչյան ուսումնասիրություններ է անցկացնում բանտի այդ մասում գտնվող 8 բանտարկյալների հետ։ Դեյվիդի ընտանիքի անդամները այնքան են տպավորված նրա կատարած փոփոխություններով, որ այցելում են նրան Աստվածաշունչ ուսումնասիրելու համար։ Դեյվիդը պատմում է. «Երբեք չեմ ձանձրանում Եհովային շնորհակալություն հայտնելուց այն բանի համար, որ նա ինձ հոգևոր ազատություն է պարգևել»։
Եհովայի վկաների կողմից անցկացվող աստվածաշնչյան այս կրթական ծրագրի շնորհիվ Մեքսիկայի 79 բանտերից 175 բանտարկյալներ, որոնցից 80–ը մկրտված են, հնարավորություն ունեն մասնակցելու քարոզչական գործին։ Բանտի այլ կալանավորների հետ նրանք անցկացնում են 703 աստվածաշնչյան ուսումնասիրություններ։ Բացի այդ, գրեթե 900 բանտարկյալներ հաճախում են քրիստոնեական հանդիպումներին, որոնք տեղի են ունենում բանտերում։
Գովեստի խոսքեր բանտի ղեկավարության կողմից
Բանտի ղեկավարությունը գնահատում է այն գործը, որ կատարում են Եհովայի վկաները։ Օրինակ՝ Տեկաշ քաղաքի (Յուկատան) ուղղիչ աշխատանքային գաղութի պաշտոնյաները մի շնորհակալագիր տվեցին Վկաներին 2002 թվականի ընթացքում բանտարկյալների համար իրենց կատարած «անշահախնդիր գործի և արժեքավոր օգնության համար»։
Երբ բանտում առաջին անգամ Վկաները սկսեցին Աստվածաշնչի կրթական ծրագիր անցկացնել, նրանց հանդիպումները տեղի էին ունենում մի քանի բանտապահների խիստ հսկողության ներքո։ Սակայն որոշ ժամանակ անց, երբ բանտարկյալների վարքում փոփոխություններ նկատվեցին, նրանք շահեցին բանտապահների հարգանքը և նրանց հսկելու համար միայն մեկ բանտապահ նշանակվեց։
Սյուդադ Խուարեսի ուղղիչ աշխատանքային գաղութը ունի իր սեփական Թագավորության սրահը։ Այս երկրպագության վայրը կառուցելու համար տրամադրվել էր մի տարածք, որը չէր օգտագործվում բանտի իշխանությունների կողմից։ Ամբողջ շինարարական գործը կատարեցին 13 բանտարկյալներ իրենց հետաքրքրվողների հետ միասին։ Թագավորության սրահը ունի ձայնի կարգավորման սարքավորումներ, զուգարան և այնպիսի աթոռներ, ինչպիսին լինում են կինոսրահներում։ Սրահում կարող է ներկա գտնվել 100 մարդ։ Ժողովի շաբաթական հինգ հանդիպումներին կանոնավորաբար հաճախում են 50 հոգի։
Այո՛, Աստվածաշնչի միջոցով հնարավոր է վերափոխվել։ Ինչպես Հուդայի Մանասե թագավորը, որը շատ չարագործություններ էր արել և Բաբելոնում բանտարկվել, զղջաց և աղոթքի միջոցով ներում խնդրեց Եհովայից, բանտարկյալները նույնպես կարող են վերափոխվել և դառնալ աստվածավախ անձնավորություններ (Բ Մնացորդաց 33։12, 13)։
[Նկար 20–րդ էջի վրա]
Մկրտություն բանտում
[Նկար 21–րդ էջի վրա]
Լիաժամ քարոզիչները և նրանց ուսուցիչները բանտում անցկացվող Ռահվիրայական ծառայության դպրոցում