Աստվածաշնչի տեսակետը

Ամուսնական հավատարմություն. ի՞նչ է դա նշանակում

Շատերը ակնկալում են, որ կողակիցը հավատարիմ լինի։ Աստվածաշունչը նույնպես խոսում է ամուսնական հավատարմության մասին՝ ասելով. «Թող ամուսնությունը բոլոր մարդկանց կողմից պատվական համարվի, և ամուսնական անկողինը՝ առանց պղծության» (Եբրայեցիներ 13։4)։

ԱՄՈՒՍՆԱԿԱՆ հավատարմություն. ի՞նչ է դա։ Արդյո՞ք հավատարիմ լինել նշանակում է միայն սեռական հարաբերություն չունենալ մեկ ուրիշի հետ։ Ինչպիսի՞ հետևանքներ կլինեն, եթե կողակիցներից մեկն ընկնի ռոմանտիկ երազանքների գիրկն ու իրեն պատկերացնի ուրիշի հետ։ Հակառակ սեռի անձնավորության հետ մտերիմ փոխհարաբերությունները կարելի՞ է համարել «անհավատարմության» մի ձև։

Ռոմանտիկ երազանքներն անվնա՞ս են

Աստվածաշնչում նշվում է, որ սեռական հարաբերությունը ամուսնական կյանքի մի մասն է, որը կողակիցներին ուրախություն և բավարարվածության զգացում է պարգևում (Առակաց 5։18, 19)։ Շատ մասնագետներ, սակայն, կարծում են, թե նաև նորմալ է և նույնիսկ օգտակար, երբ ամուսնացած անհատը ռոմանտիկ երազանքների գիրկն է ընկնում և իրեն պատկերացնում է մեկ ուրիշ անձնավորության հետ։ Որոշ մարդիկ գուցե այդ երազանքներն անվնաս համարեն՝ մտածելով, որ իրենք անբարո արարք չեն գործում։

Սակայն երբ անհատը տրվում է ռոմանտիկ երազանքներին, նա կենտրոնանում է իր սեփական հաճույքների վրա։ Այդպիսի եսակենտրոն մտածելակերպը հակասում է ամուսնացածների վերաբերյալ Աստվածաշնչի հետևյալ խորհրդին. «Կինը իշխանություն չունի իր մարմնի վրա, այլ նրա ամուսինն ունի, նմանապես և ամուսինը իշխանություն չունի իր մարմնի վրա, այլ նրա կինն ունի» (1 Կորնթացիներ 7։4)։ Եթե ամուսիններից յուրաքանչյուրը հետևի այս հորդորին, ապա սեռական հարաբերությունները իր համար չեն լինի ռոմանտիկ երազանքների արդյունքում ծնված ցանկությունները բավարարելու միջոց։ Իսկ արդյունքը կլինի այն, որ կողակիցները կապրեն երջանիկ ամուսնական կյանքով (Գործեր 20։35; Փիլիպպեցիներ 2։4)։

Այնուհանդերձ, եթե ամուսիններից մեկը անընդհատ մտածում է մեկ ուրիշի մասին, նա էմոցիոնալ մեծ ցավ է պատճառում իր կողակցին։ Իսկ կարո՞ղ են ռոմանտիկ երազանքները դրդել անհատին դավաճանության։ Այո՛։ Աստվածաշունչը ցույց է տալիս, որ սերտ կապ գոյություն ունի մտքերի և գործողությունների միջև՝ ասելով. «Ամեն մեկը փորձվում է՝ տարվելով և հրապուրվելով իր սեփական ցանկություններով։ Այնուհետև երբ ցանկությունը հղիանում է, մեղք է ծնում» (Հակոբոս 1։14, 15)։

Հիսուսն ասել է. «Յուրաքանչյուր ոք, ով շարունակում է նայել որևէ կնոջ այնպես, որ իր մեջ կրքեր են արթնանում նրա հանդեպ, նա արդեն շնություն գործեց նրա հետ իր սրտում» (Մատթեոս 5։28)։ Եթե դադարես այդ ռոմանտիկ երազանքներով ապրելուց, կպահպանես թե՛ սիրտդ, թե՛ ամուսնությունդ (Առակաց 4։23)։

Ինչո՞ւ լինել հավատարիմ

Որպեսզի ամուսինները երջանիկ լինեն, նրանք պետք է «բացարձակ նվիրվածություն» դրսևորեն իրար հանդեպ (Երգ Երգոց 8։6, ՆԱ; Առակաց 5։15–18)։ Ի՞նչ է դա նշանակում։ Թեև ընկերներ ունենալը բնական է, սակայն հիշիր, որ առաջին հերթին միայն կողակցիդ պետք է տրամադրես քո ժամանակը, ուշադրությունը և ողջ էներգիան։ Եթե որևէ մեկի հետ քո ընկերությունը խլում է քեզնից այն, ինչ իրականում պատկանում է կողակցիդ, ուրեմն դու «անհավատարիմ» ես նրա հանդեպ։ Դա այդպես է նույնիսկ այն դեպքում, երբ անբարոյություն չի գործվումa։

Իսկ ինչպե՞ս է հնարավոր, որ կողակիցներից մեկը մտերմանա հակառակ սեռի անհատի հետ։ Գուցե այդ անհատը քո կողակցից ավելի գրավիչ կամ ավելի կարեկից լինի։ Եթե աշխատավայրում կամ մեկ ուրիշ վայրում նրա հետ ժամանակ անցկացնես, միգուցե անձնական հարցեր քննարկեք, այդ թվում նաև կողակցիդ հետ ունեցած խնդիրները։ Այդպես էմոցիոնալ կապվածություն կառաջանա քո և այդ անձնավորության միջև։ Հաշվի առ նաև, որ եթե կողակիցդ բացահայտի, որ դու Ինտերնետի կամ հեռախոսի միջոցով հաղորդակցվում ես հակառակ սեռին պատկանող անձնավորության հետ, ապա կկորցնի քո հանդեպ իր վստահությունը։ Ինչ խոսք, կան հարցեր, որոնք պետք է միայն ամուսինների միջև քննարկվեն, և այդ «մտերմիկ զրույցը» պետք է գաղտնի մնա (Առակաց 25։9, ՆԱ)։

Մի արդարացրու ինքդ քեզ՝ պնդելով, որ ռոմանտիկ զգացմունքներ չունես ուրիշի հանդեպ, եթե իրականում դա այդպես չէ։ «Խորամանկ է սիրտը»,— գրված է Երեմիա 17։9–ում։ Եթե ընկերություն ես անում հակառակ սեռի անհատի հետ, հարցրու ինքդ քեզ. «Փորձո՞ւմ եմ արդյոք արդարանալ, երբ ուրիշները հարցեր են տալիս ինձ մեր ընկերության մասին, կամ էլ փորձո՞ւմ եմ գաղտնի պահել մեր ընկերությունը։ Ի՞նչ կզգամ, եթե կողակիցս լսի մեր խոսակցությունները, կամ եթե նա՛ այսպիսի մտերիմ հարաբերություններ ունենա ուրիշի հետ» (Մատթեոս 7։12)։

Այդպիսի հարաբերությունները կարող են կործանարար լինել, քանի որ հակառակ սեռի անհատի հետ էմոցիոնալ կապվածությունը ի վերջո հանգեցնում է շնության։ Հիսուսը զգուշացրեց, որ «սրտից են դուրս գալիս .... շնությունները» (Մատթեոս 15։19)։ Սակայն նույնիսկ եթե շնություն չի գործվում, կորում է կողակիցների միջև փոխադարձ վստահությունը, ինչը կարող է վտանգել ամուսնությունը։ Քերընb անունով մի կին պատմում է. «Երբ հայտնաբերեցի, որ օրը մի քանի անգամ Մարկը հեռախոսով գաղտնի զրուցում է մի կնոջ հետ, սիրտս փշուր–փշուր եղավ։ Դժվար է հավատալ, որ նրանց միջև ոչինչ չի եղել։ Չգիտեմ՝ երբևէ կկարողանա՞մ վստահել նրան»։

Չափից շատ մի՛ մտերմացիր հակառակ սեռի անհատի հետ։ Թույլ մի՛ տուր, որ քո մեջ անպատշաճ զգացմունքներ արթնանան, մի՛ փորձիր արդարացնել քո անմաքուր մղումները։ Եթե զգում ես, որ հակառակ սեռի անհատի հետ քո հարաբերությունները վտանգի տակ են դնում ձեր ամուսնությունը, անմիջապես գործի անցիր և սահմանափակիր կամ էլ դադարեցրու քո շփումը այդ անհատի հետ։ Աստվածաշնչում գրված է. «Խորագէտը տեսնում է չարիքը եւ իրան պահում» (Առակաց 22։3)։

Պահպանիր քո ամուսնական միությունը

Աստվածաշնչում գրված է, որ ամուսնությունը պետք է լինի ամենամտերիմ միությունը երկու անհատների միջև։ Մեր Արարիչն ասել է, որ ամուսինն ու կինը պիտի «մեկ մարմին լինեն» (Ծննդոց 2։24)։ Այդ ամուր միության մեջ մտնում է ոչ միայն սեռական հարաբերությունը, այլև էմոցիոնալ կապվածությունը, որն առաջանում է անշահախնդիր սիրո, փոխադարձ վստահության ու հարգանքի շնորհիվ (Առակաց 31։11; Մաղաքիա 2։14, 15; Եփեսացիներ 5։28, 33)։ Այս սկզբունքները կօգնեն պաշտպանելու ձեր ամուսնական միությունը այն վտանգներից, որոնք առաջ են գալիս անհավատարմության պատճառով։

[Ծանոթագրություններ]

ԳԻՏԵԻ՞Ք ԱՐԴՅՈՔ

◼ Կարո՞ղ են ռոմանտիկ երազանքները շնության առաջնորդել (Հակոբոս 1։14, 15)։

◼ Հակառակ սեռի հետ մտերմությունը կարո՞ղ է վտանգել ձեր ամուսնությունը (Երեմիա 17։9; Մատթեոս 15։19)։

◼ Ինչպե՞ս կարող ես ամրացնել ձեր ամուսնական միությունը (1 Կորնթացիներ 7։4; 13։8; Եփեսացիներ 5։28, 33)։

[Մեջբերում 29–րդ էջի վրա]

«Յուրաքանչյուր ոք, ով շարունակում է նայել որևէ կնոջ այնպես, որ իր մեջ կրքեր են արթնանում նրա հանդեպ, նա արդեն շնություն գործեց նրա հետ իր սրտում» (Մատթեոս 5։28)