«Դուք դրական տրամադրվածություն եք պահպանել»
● Կամիլան տառապում է սակավարյունությամբ, նա նյարդային համակարգի, ինչպես նաև աճի հետ կապված խանգարումներ ունի։ Այս ամենի պատճառով ութ տարեկանում նրա հասակը ընդամենը 75 սանտիմետր էր։ Կամիլայի ծնողները, որոնք Եհովայի վկա են, որոշեցին երեխային տանել բժշկական մի կոնֆերանսի, որը տեղի էր ունենալու իրենց հայրենիքում՝ Արգենտինայում՝ տեղի թատրոններից մեկում։ Նրանք նստեցին երկրորդ շարքում։ Դահլիճում ներկա էր 500 հոգի։
Դասախոսության ժամանակ հռետորը, որը բժիշկ էր, որպես օրինակ մատնացույց արեց Կամիլային, որի առողջական վիճակը թվում էր, թե լավ է։ Չիմանալով երեխայի տարիքի և առողջական խնդիրների մասին՝ նա հարցրեց. «Քանի՞ տարեկան է մանկիկը»։
— Ութ տարեկան,— պատասխանեց Կամիլայի մայր Մարիսան։
— Դուք ասացիք ութ ամսակա՞ն,— հարցրեց բժիշկը։
— Ո՛չ, ութ տարեկան,— հաստատեց մայրը։
Հետաքրքրությունից դրդված՝ բժիշկը խնդրեց, որ մայրն ու աղջիկը բեմ բարձրանան՝ պատասխանելու մի քանի հարցերի։ Երբ Մարիսան պատմեց, թե բժիշկները ինչ հետազոտություններ են կատարել Կամիլայի վրա և թե բուժման ինչ ձևեր են փորձել, բժիշկն ասաց. «Մայրեր կան, ովքեր լաց են լինում, երբ իրենց երեխաները սովորական գրիպով են վարակվում։ Սակայն դուք յոթ տարի տևող բուժումներից և ամեն հնարավոր բան փորձելուց հետո դրական տրամադրվածություն եք պահպանել։ Ինչպե՞ս է դա ձեզ հաջողվել»։
Ի պատասխան՝ Մարիսան ունկնդիրներին պատմեց Աստվածաշնչի վրա հիմնված արդար նոր աշխարհի իր հույսի մասին, որտեղ ամեն տեսակ հիվանդություն, տառապանք և նույնիսկ մահ չեն լինի (Եսայիա 33։24; Հայտնություն 21։3, 4)։ Վերջում նա ասաց, թե համաշխարհային ինչ մեծ եղբայրություն են վայելում Եհովայի վկաները և թե ինչպես է իրար հանդեպ սերը օգնում նրանց դիմադրելու փորձություններին ու կյանքում ծագող տարբեր դժվարություններին (Հովհաննես 13։35)։
Երբ ծրագիրը ավարտվեց, մի կին մոտեցավ Մարիսային ու խնդրեց, որ ավելի մանրամասն պատմի այն մտքերի մասին, որոնք նշել էր։ Քանի որ այդ կինը սովորելու մեծ ցանկություն ուներ, նա համաձայնեց Աստվածաշնչի անվճար ուսումնասիրություն սկսել։ Եհովայի վկաները ամբողջ աշխարհում առաջարկում են այդպիսի ուսումնասիրություն այն մարդկանց, ովքեր անկեղծորեն ցանկանում են հասկանալ Աստվածաշունչը և իմանալ Աստծու հրաշալի նպատակը մարդկության առնչությամբ։
[նկար 28-րդ էջի վրա]
Ութ տարեկան Կամիլան մոր՝ Մարիսայի հետ