Քայլեր ձեռնարկիր՝ բարելավելու առողջությունդ

ՀԻՇՈ՞ՒՄ ես Ռամին, որի մասին նշվեց առաջին հոդվածում։ Շատերի պես՝ նա չէր գիտակցում, որ ճիշտ սնվելը և ամեն օր մարմնամարզություն անելը կարևոր նշանակություն ունեն լավ առողջություն ունենալու հարցում։ Նա պատմում է. ««Արթնացե՛ք» պարբերագրում «Սննդարար կերակուրը մատչելի է բոլորիս» հոդվածը (8 մայիսի, 2002, անգլ., ռուս.) օգնեց ինձ հասկանալու, թե ինչու է կարևոր շատ բան իմանալ ճիշտ սնվելու մասին»։

Ռամն ասում է. «Մենք փորձեցինք այդ հոդվածում նշված խորհուրդներով առաջնորդվել։ Որոշ ժամանակ անց զգացինք, որ մեր իմունիտետը բարձրացել է։ Նախկինում մենք հաճախ էինք մրսում ու հիվանդանում, բայց հիմա հազվադեպ է այդպես լինում։ «Արթնացե՛ք»-ում տպագրված «Վեց միջոց առողջությունը պահպանելու համար» (22 սեպտեմբերի, 2003, անգլ., ռուս.) հոդվածի շնորհիվ սովորեցինք նաև, թե ինչպես է հնարավոր մեր միջոցները խնայելով հանդերձ՝ մաքուր ջուր ունենալ։

«Արթնացե՛ք»-ի մեկ ուրիշ հոդված էլ, որի վերնագիրն է «Օճառ. վակցինա, որը միշտ ձեռքիդ տակ ունես» (22 նոյեմբերի, 2003, անգլ., ռուս.), օգնեց, որ բարելավենք մեր առողջական վիճակը։ Կարդալուց հետո անմիջապես սկսեցինք կիրառել հոդվածի խորհուրդները։ Հիմա այլևս առաջվա պես աչքի բորբոքումներ չենք ունենում։

Մեր բնակավայրում մարդիկ տեղյակ չեն, թե ինչպիսի վնաս կարող են պատճառել ճանճերն ու մոծակները։ Երբ մենք դիտեցինք «Աստվածաշունչ. նրա ազդեցությունը ձեր կյանքում»a տեսաֆիլմը (անգլ., ռուս.), հասկացանք, որ հարկավոր է զգույշ լինել այդ միջատներից։ Դա էլ իր հերթին նպաստեց մեր առողջությանը»։

Մի՛ հանձնվիր։ Ինչպիսի փոփոխություն անելու անհրաժեշտություն էլ որ լինի, ավելի մեծ հաջողության կհասնես, եթե անհասանելի նպատակներ չդնես քո առաջ, այլ աստիճանաբար փոխես կենսակերպդ։ Օրինակ՝ ավելի լավ է նվազեցնել պակաս օգտակար կերակուրի օգտագործումը, քան միանգամից հրաժարվել դրանից։ Փորձիր պառկել քնելու սովորականից փոքր-ինչ շուտ և քիչ-քիչ սկսիր վարժություններ անել։ Հիշիր, որ ավելի լավ է գոնե մի քիչ անել, քան ոչինչ չանել։ Սովորաբար նոր սովորություն մշակելու համար շաբաթներ ու ամիսներ են պահանջվում։ Ուստի եթե ջանքերիդ արդյունքը անմիջապես չտեսնես, մի՛ հուսահատվիր։ Շարունակ ձգտիր առողջ ապրելակերպ ունենալ, եթե նույնիսկ երբեմն դա քեզ չհաջողվի։ Ժամանակի ընթացքում կնկատես, որ առողջությունդ լավանում է։

Անկատար մարդու համար անհնար է կատարյալ առողջություն ունենալ։ Երբեմն հիվանդության պատճառը ոչ թե անտարբեր վերաբերմունքն է, այլ մարդու անկատար վիճակը։ Ուստի թույլ մի՛ տուր, որ առողջության հետ կապված խնդիրները ավելորդ սթրեսի ենթարկեն քեզ և մտահոգության պատճառ դառնան։ «Ձեզանից ո՞ր մեկը մտահոգվելով կարող է իր կյանքը մեկ կանգունով երկարացնել»,— հարցրեց Հիսուսը (Ղուկաս 12։25)։ Փոխարենը՝ խուսափիր այնպիսի բաներից, որոնք ոչ միայն կկրճատեն կյանքիդ տարիները, այլև կխանգարեն լիարժեք կյանքով ապրելու։ Այդպես վարվելով՝ դու հնարավորինս լավ առողջություն կունենաս, մինչև որ գա այն օրը, երբ Աստծու հաստատած նոր աշխարհի «ոչ մի բնակիչ չի ասի. «Ես հիվանդ եմ»» (Եսայիա 33։24)։

[ծանոթագրություն]