Գլուխ 60
Կանխապես ցույց է տրվում Քրիստոսի թագավորական փառքը
ՀԻՍՈՒՍԸ եկել է Փիլիպպոսի Կեսարիայի կողմերը և ուսուցանում է մարդկանց մի բազմության, որի մեջ են նաև իր առաքյալները։ Նա հետևյալ ապշեցուցիչ հայտարարությունն է անում. «Ճշմարիտ ասում եմ ձեզ, որ այստեղ կանգնածների մեջ կան ոմանք, ովքեր մահ չեն ճաշակի, մինչև որ նախ չտեսնեն մարդու Որդուն իր թագավորությամբ գալիս»։
«Ի՞նչ է ուզում ասել Հիսուսը»,— գուցե մտածեն աշակերտները։ Մոտ մի շաբաթ հետո նա իր հետ վերցնում է Պետրոսին, Հակոբոսին ու Հովհաննեսին և բարձրանում է մի բարձր լեռ։ Ամենայն հավանականությամբ գիշեր է, քանի որ աշակերտների քունը տանում է։ Աղոթք անելիս Հիսուսը այլակերպվում է նրանց աչքի առաջ։ Նրա դեմքը սկսում է փայլել ինչպես արեգակը, իսկ հանդերձները դառնում են լույսի պես պայծառ։
Ապա հայտնվում են ևս երկու հոգի՝ «Մովսեսն ու Եղիան», ու սկսում են Հիսուսի հետ խոսել նրա «հեռանալու մասին, որը պետք է կատարվի Երուսաղեմում»։ Հեռանալը, հավանաբար, վերաբերում է Հիսուսի մահվանը և հարությանը։ Այս զրույցը փաստում է, որ նա չի կարող խուսափել այդ նվաստացուցիչ մահից, ինչպես որ Պետրոսն էր ուզում։
Այժմ աշակերտները՝ լրիվ արթուն վիճակում, ապշած նայում ու լսում են։ Թեև սա տեսիլք է, բայց այնքան իրական է թվում, որ Պետրոսը ակամայից ինքն էլ է մասնակցում այդ տեսարանին՝ ասելով. «Տե՛ր, լավ է, որ մենք այստեղ մնանք։ Եթե ուզում ես, այստեղ երեք վրան կկանգնեցնեմ՝ մեկը՝ քեզ համար, մեկը՝ Մովսեսի, մյուսն էլ՝ Եղիայի»։
Մինչ Պետրոսը խոսում է, մի լուսավոր ամպ ծածկում է նրանց, և այդ ամպից մի ձայն է գալիս, որն ասում է. «Սա՛ է իմ սիրելի Որդին, որին ես հավանել եմ, նրա՛ն լսեք»։ Ձայնը լսելով՝ աշակերտներն իրենց երեսների վրա են ընկնում։ Բայց Հիսուսն ասում է. «Վե՛ր կացեք, մի՛ վախեցեք»։ Երբ վեր են կենում, Հիսուսից բացի՝ ուրիշ ոչ ոքի չեն տեսնում։
Հաջորդ օրը լեռան վրայից իջնելիս Հիսուսը պատվիրում է. «Ոչ ոքի մի՛ պատմեք այս տեսիլքի մասին, մինչև որ մարդու Որդին հարություն առնի մահացածների միջից»։ Քանի որ տեսիլքում հայտնվել էր Եղիան, աշակերտների մտքում հարց է ծագում.
— Ինչո՞ւ են դպիրներն ասում, թե նախ Եղիան պիտի գա։
— Եղիան արդեն եկել է,— ասում է Հիսուսը,— և նրանք չճանաչեցին նրան։
Սակայն Հիսուսը խոսում է Հովհաննես Մկրտչի մասին, որը կատարեց այնպիսի առաջադրանք, ինչպիսին որ Եղիային էր տրվել։ Հովհաննեսը ճանապարհ պատրաստեց Քրիստոսի համար, ինչպես Եղիան՝ Եղիսեի համար։
Անկասկած, այս տեսիլքը զորացրեց Հիսուսին ու նրա աշակերտներին։ Այս տեսիլքով կանխապես ցույց տրվեց Քրիստոսի թագավորական փառքը։ Փաստորեն, աշակերտները տեսան «մարդու Որդուն իր թագավորությամբ գալիս», ինչը որ մի շաբաթ առաջ խոստացել էր Հիսուսը։ Հիսուսի մահից հետո Պետրոսը գրեց, որ իրենք ականատես եղան Քրիստոսի մեծափառությանը, երբ նրա հետ այն սուրբ լեռան վրա էին։
Փարիսեցիները Հիսուսից նշան էին պահանջել՝ որպես ապացույց այն բանի, որ նա է Սուրբ Գրություններում խոստացված՝ Աստծու ընտրյալ Թագավորը։ Սակայն նրանց ոչ մի նշան չտրվեց, իսկ Հիսուսի մտերիմ աշակերտներին թույլ տրվեց տեսնել նրա այլակերպությունը, որն էլ Թագավորության մասին մարգարեությունների հաստատումն էր։ Ուստի Պետրոսը հետագայում գրեց. «Մենք մարգարեական խոսքի հանդեպ ավելի շատ համոզվածություն ունենք»։ Մատթեոս 16։13, 28–17։13; Մարկոս 9։1–13; Ղուկաս 9։27–37; 2 Պետրոս 1։16–19։
▪ Մինչև մահ ճաշակելը ինչպե՞ս են ոմանք տեսնում Քրիստոսին իր Թագավորությամբ գալիս։
▪ Տեսիլքում Մովսեսն ու Եղիան ինչի՞ մասին են խոսում Հիսուսի հետ։
▪ Այդ տեսիլքն ինչո՞ւ այդքան զորացրեց աշակերտներին։