ՄԱՆԿԱԲԱՐՁՈՒՀԻ

«Մանկաբարձուհի» թարգմանված եբրայերեն բառը յալադ (ծնել, լույս աշխարհ բերել) բայի՝ իգական սեռի դերբայական ձևն է և մատնանշում է այն կնոջը, ով ծնունդ է ընդունում (տես ԾՆՈՒՆԴ)։ Ծննդաբերության ընթացքում մանկաբարձուհին օգնում է ծննդկանին, և երբ երեխան ծնվում է, կտրում է նրա պորտալարն ու լողացնում նրան։ Հին ժամանակներում մանկաբարձուհիները նաև մանկիկին շփում էին աղով ու բարուրում (Եզկ 16։4)։

Մանկաբարձուհու դերը երբեմն ստանձնում էր ծննդկանի մտերիմ ընկերուհին, ազգականուհին կամ տարիքով ավելի մեծ հարևանուհիներից մեկը։ Բայց քանի որ ծնունդ ընդունելու համար, հատկապես բարդությունների դեպքում, հատուկ գիտելիքներ, հմտություններ և փորձ էր պահանջվում, մասնագիտացած մանկաբարձուհիները քիչ էին։ Երբ Ռաքելը մեծ դժվարությամբ ծննդաբերում էր Բենիամինին ու սաստիկ ցավերի մեջ էր, մանկաբարձուհին հավաստիացրեց նրան, որ նա կկարողանա լույս աշխարհ բերել իր որդուն։ Այդպես էլ եղավ, թեև Ռաքելը մահացավ (Ծն 35։16-19)։ Մեկ այլ բարդ ծննդաբերության ժամանակ, երբ Թամարը ունենում էր իր երկվորյակներին, մանկաբարձուհին ուշադիր հետևում էր, թե ով առաջինը կծնվի։ Երբ առաջնեկը՝ Զարան, դուրս հանեց իր ձեռքը, նա երեխայի ձեռքին անմիջապես ալ կարմիր թել կապեց։ Սակայն փոքրիկը հետ քաշեց ձեռքը, ու առաջինը նրա եղբայրը՝ Փարեսը դուրս եկավ, ինչի պատճառով մոր մոտ շեքի պատռվածք առաջացավ (Ծն 38։27-30)։

Եգիպտոսում ստրկության ժամանակ եբրայեցի մանկաբարձուհիներ Սեփրան ու Փուան շատ ծանր ու վտանգավոր իրավիճակում հայտնվեցին։ Փարավոնը կանչեց այդ երկու կանանց և հրամայեց, որ եբրայեցի կանանց ծննդաբերության ժամանակ օգնելիս սպանեն նորածին տղա երեխաներին։ Հավանաբար, նրանք գլխավոր մանկաբարձուհիներն էին, և իրենց պատասխանատվությունն էր փարավոնի հրամանները փոխանցել մյուս մանկաբարձուհիներին։ «Սակայն [Սեփրան ու Փուան] ակնածալից վախ ունեին ճշմարիտ Աստծու հանդեպ և չէին անում Եգիպտոսի թագավորի ասածը։ Նրանք ողջ էին թողնում տղա երեխաներին»։ Այդ պատճառով փարավոնը կանչեց նրանց և ասաց. «Ինչո՞ւ եք տղա երեխաներին ողջ թողել»։ Ձևացնելով իբր իրավիճակը իրենց վերահսկողությունից դուրս է՝ նրանք ասացին, որ եբրայեցի կանայք «առույգ են» և մինչև իրենց գալը ծննդաբերում են (Ելք 1։15-19)։ Քանի որ այս մանկաբարձուհիները աստվածավախ էին ու չցանկացան մանկասպան դառնալ, Եհովան օրհնեց նրանց և ընտանիքներ պարգևեց (Ելք 1։20, 21)։