Պատմում են Թագավորության քարոզիչները
Ազնիվ մարդիկ փառք են բերում Եհովային
ՀԱՄԱՅՆ աշխարհում Եհովայի վկաները՝ մեծ թե փոքր, հայտնի են իրենց ազնվությամբ։ Խորհենք մի քանի դեպքերի շուրջ, որոնք տեղի են ունեցել երեք տարբեր մայրցամաքներում։
Նիգերիայում բնակվող տասնյոթամյա Օլուսոլան մի օր դպրոցից տուն վերադառնալիս մի դրամապանակ գտավ։ Նա այն տվեց դպրոցի տնօրենին, որը հաշվեց դրամապանակում եղած գումարը. այն կազմում էր 6 200 նայրա (մոտ 45 ամերիկյան դոլար)։ Տնօրենը դրամապանակը վերադարձրեց ուսուցչին, որը կորցրել էր այն։ Ի նշան երախտագիտության՝ ուսուցիչը Օլուսոլային տվեց 1 000 նայրա (մոտ 7 դոլար) և ասաց, որ այդ գումարով նա վճարի դպրոցի վարձը։ Համադասարանցիները, իմանալով այդ դեպքի մասին, ծաղրեցին Օլուսոլային։ Մի քանի շաբաթ անց աշակերտներից մեկն ասաց, որ իր փողերը գողացել են։ Ուսուցիչներին ասվեց, որ նրանք ստուգեն բոլոր աշակերտներին։ «Դու մի կողմ կանգնիր,— ասաց ուսուցիչը Օլուսոլային։— Ես գիտեմ, որ դու Եհովայի վկա ես և գողություն չես անի»։ Գումարը գտնվեց երկու տղաների մոտ, որոնք նախկինում ծաղրել էին Օլուսոլային, և նրանց խստորեն պատժեցին։ Օլուսոլան գրում է. «Ես շատ երջանիկ եմ, որ ինձ ճանաչում են որպես Եհովայի վկայի, իսկ Եհովայի վկաները երբեք գողություն չեն անում և դրանով փառք են բերում Եհովային»։
Արգենտինացի Մարսելոն մի օր տանից դուրս գալիս պայուսակ գտավ իր տան հետնամուտքից մի քանի մետր հեռու։ Պայուսակը տուն բերելով՝ նա իր կնոջ հետ զգուշությամբ բաց արեց այն։ Ի զարմանս իրենց՝ նրանք պայուսակում տեսան հսկայական գումար, վարկաքարտեր և մի քանի ստորագրված վճարագրեր, որոնցից մեկը 1 միլիոն պեսոյի արժեք ուներ (մոտ 250 000 եվրո)։ Պայուսակում գտնվեց նաև հեռախոսահամար։ Նրանք զանգահարեցին տիրոջը և պայմանավորվեցին հանդիպել Մարսելոյի աշխատավայրում՝ պայուսակն իր պարունակությամբ նրան հանձնելու համար։ Երբ պայուսակի տերը եկավ պայմանավորվածության վայր, նա կարծես անհանգիստ էր։ Մարսելոյի գործատերն ասաց նրան, որ անհանգստանալու կարիք չկա, քանի որ Մարսելոն Եհովայի վկա է։ Պայուսակը վերադարձնելու համար Մարսելոն պարգև ստացավ ընդամենը 20 պեսո (մոտ 4 եվրո)։ Դա խիստ զայրացրեց գործատիրոջը, քանի որ նրան անչափ տպավորել էր Մարսելոյի ազնվությունը։ Մարսելոն հնարավորություն ունեցավ բացատրելու, որ լինելով Եհովայի վկա՝ ցանկանում է միշտ ազնվորեն վարվել։
Ահա մի դեպք էլ Ղրղզստանից։ Վեցամյա Ռինատը գտավ մի դրամապանակ, որը պատկանում էր մոտակայքում ապրող մի կնոջ։ Այնտեղ կար 1 100 սոմ (մոտ 25 դոլար)։ Երբ Ռինատը դրամապանակը վերադարձրեց այդ կնոջը, վերջինս հաշվեց փողը և հայտնեց Ռինատի մորը, որ 200 սոմ (մոտ 5 դոլար) պակասում է։ Ռինատն ասաց, որ ինքը ոչինչ չի վերցրել։ Նրանք գնացին գումարը փնտրելու և այն գտան ոչ հեռու այն վայրից, որտեղ գտնվել էր դրամապանակը։ Կինն ապշել էր։ Նախ՝ նա շնորհակալություն հայտնեց Ռինատին և նրա մորը՝ կորած գումարը վերադարձնելու համար, ապա՝ տղայի ստացած քրիստոնեական դաստիարակության։